EPHESOS 1:5 - Khasi CL Bible (BSI)

⁵ Namar ka jingieit jong u, U Blei u la rai lypa ba da U Jisu Khrist un pynlong ïa ngi ki khun jong u — kane ka long ka jingsngewbha bad ka jingthmu jong u.

KA BAIBL

⁵ haba u la lah thung lypa ïa ngi sha ka jingtingkhun da U Jisu Khrist sha lade hi, katba kum ka jingsngewbha ka mon jong u,

EPHESOS 1:5 ပူးပေါင်းရင်းမြစ်များ

JEREMAÏAH 3:19

U Trai u ong, “Ko Israel, nga la kwah ban pdiang ïa pha kum u khun jong nga bad ai ha pha ïa ka ri kaba pynkmen, ka ri kaba itynnat tam ha ka pyrthei baroh kawei. Nga la kwah ïa pha ban khot pa ïa nga bad ban ym phai shuh da lei lei na nga.

JEREMAÏAH 3:4

“Bad mynta pha ong ha nga, ‘Me long u kpa jong nga, bad me la ieit ïa nga naduh ba nga dang khunlung.

DANIEL 4:35

U la khmih halor ki briew jong ka pyrthei kum bym long ei ei; ki angel ha bneng bad ki briew ha ka pyrthei ki don hapoh ka jingsynshar jong u. Ym don mano mano ba lah ban pyrshah ïa ka mon jong u lane kylli jingkylli ïa kaei kaba u leh.

HOSIA 1:10

Ki briew ka Israel kin sa bun kum u shyiap ka duriaw, kin bun haduh bym lah shuh ban ñiew lane ban thew. Mynta U Blei u ong ïa ki, “Phim dei ki briew jong nga,” hynrei ka sngi kan poi ha kaba un ong ha ki, “Phi dei ki khun jong U Blei uba im.”

MATHAÏOS 1:25

Hynrei um shym la ïathiah shongkha bad ka ha shuwa ban kan kha ïa u khun jong ka. Bad u Joseph u la khot kyrteng ïa u, U Jisu.

MATHAÏOS 11:26

Ho-oid, Ko Kpa, kane ka la long kumno me la kwah ïa ka ba kan jia.

LOUKAS 10:21

Ha kata ka por la pyndap ïa U Jisu da ka jingkmen da U Mynsiem Bakhuid bad u la ong, “Ko Kpa, U Trai jong ka bneng bad ka pyrthei! Nga ainguh ïa me namar ba me la pyn-i ha ki bymnang bymstad ïa kaei kaba me la buhrieh na kiba stad bad kiba shemphang. Ho-oid, ko Kpa, kane ka la long kumno me la kwah ïa ka ba kan jia.

LOUKAS 11:32

Ha ka Sngi Bishar ki briew jong ka Ninebeh kin ïeng joit bad mudui ïa phi, namar ki la phai noh na ki pop jong ki haba ki la ïohsngew ba u Jonah u ïalap; bad nga pynthikna ïa phi ba don uei re uei hangne uba kham khraw ban ïa u Jonah!

LOUKAS 12:32

“Wat sheptieng, ko kynhun barit, naba U Kpa jong phi u la sngewbha ban ai ha phi ïa ka Hima.

ÏOANNIS 1:12

Katto katne pat, ki la pdiang ïa u bad ki la ngeit ha u; kumta u la ai bor ha ki, ban long ki khun U Blei.

ÏOANNIS 20:17

“Wat ktah ïa nga,” U Jisu u la ong ha ka, “namar ngam pat shym la leit kiew sha U Kpa. Hynrei khie leit sha ki para jong nga bad ïathuh ïa ki ba ngan leit phai sha u, uba long U Kpa jong nga bad U Kpa jong ki, U Blei jong nga bad U Blei jong ki.”

KI KAM 13:48

Haba ki Jentil ki la ïohsngew ïa kane, ki la kmen bad ki la ïaroh ïa ka khubor jong U Trai, bad kito ïa kiba la jied na ka bynta ka jingim bymjukut ki la long ki riewngeit.

Ka Shithi U Paul Sha Ki Nong Rom 8:23

Hynrei ym dei tang ki jingthaw kiba ud; ma ngi ruh kiba don ïa U Mynsiem kum ki jingai banyngkong jong U Blei, ngi ïa-ud hapoh lade hi, katba ngi dang ap ïa U Blei ba un pynlong ïa ngi ki khun jong u bad ban pyllaitluid phar ïa ngi.

1 KORINTH 1:1

Na u Paul, ïa uba la khot ban long u apostol U Khrist Jisu da ka mon U Blei, bad na u Sosthenes u parabangeit jong ngi —

1 KORINTH 1:21

Naba U Blei ha ka jingstad jong u, um shym la pynlah ïa ki briew ban ithuh ïa u da ka jingstad jong ki hi. Pynban da kata kaba la khot ka khubor “ba-ibieit” kaba ngi ïalap, U Blei u la ibit ban pynim ïa kito kiba ngeit ïa ka.

2 KORINTH 6:18

Ngan long U Kpa jong phi, bad phin long ki khun shynrang bad ki khun kynthei jong nga, ong U Trai Badonbor Baroh.”

GALATIA 3:26

Ka dei lyngba ka jingngeit ba phi baroh phi long ki khun U Blei ha U Khrist Jisu.

EPHESOS 1:11

Ïa kiei kiei baroh la leh kat kum ka jingthmu bad ka jingrai U Blei; bad U Blei u la jied ïa ngi ban long ki briew jong u hi ha U Khrist namar ka jingthmu jong u hi, ba la pynshong nongrim ha kaei kaba u la rai naduh kaba mynnyngkong.

EPHESOS 1:9

U Blei u la leh ïa kata ha ka jingstad bad jingïohi jong u baroh ïa kaei kaba u la thmu, bad u la pynpaw shynna ha ngi ïa ka jingthmu ba la buhrieh ïa kaba u la lah thmu lypa ban pyndep da U Khrist.

PHILIPPI 2:13

namar U Blei u trei borabor hapoh jong phi, ban pynlong ïa phi kiba don ka mon bad kiba lah ban kohnguh ïa ka jingthmu jong u hi.

KOLOSSAI 1:19

Naba ka la long da ka jingrai ka jong U Blei hi ba U Khun u la don ha lade hi ïa ka jinglong ba-pura jong U Blei.

2 THESSALONI 1:11

Dei kata keiñ balei ba ngi ïai duwai borabor na ka bynta jong phi. Ngi kyrpad ïa U Blei jong ngi ban pynlong ïa phi kiba bit ïa ka jingim kaba u la khot ïa phi ban im. Ai ba un pyndap da ka bor jong u ïa ka jingkwah jong phi baroh na ka bynta ka jingbha bad ban pyndep ïa ka jingtrei ka jingngeit jong phi.

HEBRU 2:4

Ha kajuh ka por, U Blei ruh u la ai shuh ïa la ki sakhi ha ki, da kaba leh bun ki kambah bad ki kamphylla bad da kaba ïasam ïa ki jingai U Mynsiem Bakhuid kat kum ka mon jong u.

1 ÏOANNIS 3:1

Ha khmih haduh katno U Kpa u la ieit ïa ngi! Ka jingieit jong u ka long kaba khraw katta katta ba ïa ngi la khot ki khun U Blei — bad kumta, ha ka jingshisha, ngi long. Dei kane ba balei ka pyrthei kam ithuh ïa ngi: Kam pat la ithuh ïa U Blei.

JINGPYNPAW 21:7

Uno uno uba ïoh ïa ka jingjop un ïohpdiang ïa kane na nga: Ngan long U Blei jong u, bad un long u khun jong nga.