EKSODOS 28:3 - Khasi CL Bible (BSI)

³ Khot ïa ki nongsuhjaiñ batbit kiba nga la ai ha ki ka sap bad ong ïa ki ba kin suh ïa ki jaiñkup u Aaron khnang ba yn ïoh pynkyntang ïa u kum u lyngdoh ban shakri ïa nga.

KA BAIBL

³ Men kren ruh ha kita baroh kat ki bastad ka dohnud, ïa kiba nga la pyndap da ka mynsiem ka jingstad, ba kin ïathain ïa ki jaiñkup ïa u Aaron ïa ka ban pynkyntang ïa u, ban kam ïa ka kam lyngdoh ïa nga.

EKSODOS 28:3 ပူးပေါင်းရင်းမြစ်များ

1 SYIEM 7:14

U kpa jong u, uba la ïap noh, u dei na Tyros, bad u la long ruh uba tbit ha ka jingshna tiar rnong; ka kmie jong u ka dei na ka jait Naphtali. U Huram u long u nongshna tiar uba stad bad uba la nang bha. U la pdiang ïa ka jingkhot sngewbha u Syiem Solomon ban long u nongpynïaid ïa baroh ka jingtrei rnong.

EKSODOS 35:10

“Baroh ki nongtrei kiba tbit napdeng jong phi ki dei ban ïawan shna ïa kita baroh ïa kiba U Trai u la hukum:

EKSODOS 35:25

Baroh ki kynthei kiba nang ban thir ki wallam ïa u ksai linen uba ni, bad ïa u 'saiwul uba jngum, uba sawbthuh, bad uba rong saw.

EKSODOS 35:30

U Moses u ong ha ki Israel, “U Trai u la jied ïa u Besalel, u khun jong u Uri bad u khun ksiew jong u Hur, na ka jait Judah.

EKSODOS 35:31

U Trai u la pyndap ïa u da ka bor jong u, bad u la ai ruh ha u ïa ka jingtbit, ka jingnang, bad ka jingshemphang ban trei ïa ki jait kam ohdur kiba har rukom,

EKSODOS 35:35

U la ai ha ki ïa ka jingtbit ban trei ïa ki jait kam baroh ba la ju trei da ki nong-ohdur, ki nongthawdur, bad ki nongsuh nongthain ïa ka linen kaba ni; ïa u 'saiwul uba jngum, uba sawbthuh, bad uba rong saw; bad ïa kiwei pat ki jait jaiñ. Ki nang ban trei ïa ki jait kam baroh, bad ki long ruh ki nongpruid dur kiba tbit.

EKSODOS 36:1

“U Besalel, u Oholiab, bad kiwei pat ki nongtrei ïa kiba U Trai u la ai ka jingtbit bad ka jingshemphang, kiba tip ban trei ïa ka kam baroh kaba ïadei bad ka jingtrei ïa ka Ïingjaiñ kaba kyntang, ki dei ban shna ïa kaei kaei baroh kumba U Trai u la hukum.”

EKSODOS 36:2

U Moses u la khot ïa u Besalel, ïa u Oholiab, bad ïa baroh ki rangbah kiba tbit ha kiba U Trai u la ai ïa ka jingnang bad kiba kloi mon sngewbha ban ïarap, bad u ong ïa ki ban sdang trei noh ïa kata ka kam.

PROBERB 2:6

Dei U Trai uba ai ïa ka jingstad; na u ka wan ka jingtip bad ka jingshemphang.

ISAÏAH 11:2

U Mynsiem jong U Trai un ai ha u ka jingstad bad ka jingtip bad ka jingtbit ban synshar ïa ki briew jong u. Un tip ïa ka mon jong U Trai bad un pyndonburom ïa u,

EPHESOS 1:17

Nga kynmaw ïa phi ha ki jingduwai jong nga; bad nga kyrpad na U Blei jong U Jisu Khrist uba U Trai jong ngi, u Kpa uba dap da ka burom, ba un ai ha phi ïa U Mynsiem, u ban pynlong ïa phi kiba stad bad un pynpaw ha phi ïa U Blei, khnang ba phin ïoh tip ïa u.

DEUTERONOMI 34:9

U Joshua u khun jong u Nun u long uba la pyndap da ka jingstad, naba u Moses u la thung ïa u ban long u nongshimti pateng. Ki Israel ki kohnguh ïa u Joshua bad ki sumar ïa ki hukum ba U Trai u la ai ha ki lyngba u Moses.

JAKOB 1:17

Ka jingai kaba bha baroh bad kaba janai baroh ka wan na bneng; ka wan hiar na U Blei, u Nongpynlong ïa ki jingshai ba kynja bneng, u bym ju kylla lane pynlong jingdum da ka jingpynphai.