Wahyu 8:3 - Abun Scripture

³ Malaikat ge dik yo o mu mo meja gato ye grem suk wa ye som Yefun Allah su mone, ete an ti mo meja ne de. Malaikat ne jom sukbo emas. Malaikat ne ku suk gato ye gre ete i-bu basmi grik ndo ne mwa tepsu suksom wa ye som Yefun Allah su. Yé gato onyar kem mo Yefun, án ki suk su Yefun petok sor. Sukdu gato án ki nai Yefun Allah ne, malaikat gwat sukdu ne, ete syo nai Yefun sisu suksom gato grik ndo ne. Malaikat ne grem suksom si sukdu mwa gato yé ki nai Yefun ne mo meja gato ye gre suk wa som Yefun Allah su mone. Meja gane, ye nggo su emas ete ye grem mo Yefun bi kursi tak de gwem.

Wahyu 8:3 ပူးပေါင်းရင်းမြစ်များ

Lukas 1:10

Zakaria do sok mu gre suk gato grik ndo ne mo Yefun Allah bi nu mit sa, yé mwa ma sum mo nu de nden wa án benadi mone.

Roma 8:34

Ye yo ku os wa ki men gum ibit ne mó e? Yo mo nde, we Yesus Kristus gato kwop wa men ete mbau satu o, Yesus Kristus ne kem tak Yefun Allah de syim ge, anato Kristus gwa yawa men gum mo sukdu gato ye kiket men daret re.

Ibrani 7:25

Sane anato Yefun Yesus nggiwa ben suk tepsu yegweswai wa ós men yé gato iwa ma mo Yefun Allah bi nat-i sor to kapyo mato kapyo. Yefun Yesus kem gesyos, An ós wa ki suk su Yefun Allah tepsu yegweswai wa men petok sor.

Ibrani 9:4

Mo Yefun Allah bi gumwak fo mit ne, yé grem meja gato ye nggo su emas mone. Mo meja ne yé gre suk gato i-bu basmi grik ndo wa som Yefun Allah su. Mo gumwak ne dom, peti dik yo kwop mone. Mo peti ne, ye ut emas wairi wa. Mo peti mit ne yé bok sukbo emas su sugit napyo gato gum do manna. {Suga nyim tuya, Yefun Allah ben bí ro subere krat tepsu roti wa ye Israel git, sugit ne ye kendo gum do manna}. Mo peti mit ne dom, yé bok Harun bi kwepu gato nyim tuya kwana kom mó re. Sane dom, yé bok jok det we gato Yefun Allah krom sukduno kwa musyu dik ne kwop mone dom re. {Ye grem peti mone subere tik nje bi sukjimnut subere yé napawa os gato Yefun kak suga nyim tuya ne.}

Wahyu 10:1

Orete ji sokme malaikat ge dik yo o gato nggi is ma kadit gu. Ben sato malaikat ne pis nyotem sato yetu pis san pis ne. Bres dik yo kem wairi wa an su. An gro ru nggi tepsu kam su. An gwes tepsu kwedi gato bot ru mó.

Wahyu 14:18

Or o malaikat ge dik yo o ma kadit meja gato ye grem suksom mone wa ye som Yefun Allah su mo gu ne. Malaikat ne mewa bot mo meja ne. Malaikat ne ma an saiye nai malaikat gato jom nyom gato ot ne do, ”Nan gwat nan bi nyom gato ot ne mu, nan tot anggur bo mo kwe anggur mwa mo bur ré, nan nai bo ne nan gwat ma, we anggur bo ne um it.”

Wahyu 5:8

Domba Gan ne nai buku sa, suge at si yenggras ge musyu we sop at ne bare nggwa sino mo Domba Gan gwem. Án sino jom kecapi si mbem emas ses su suk yo gato ye gre ete i-bu basmi grik ndo. Suk gato grik ndo ne tepsu sukdu gato yé gato onyar kem mo Yefun Yesus ki nai Yefun Allah ne.

Wahyu 6:9

Domba Gan kak lilin gum domek ne wé sa, ji sokme yetu da gesyos ge bok yo mo meja gato ye gre suge wa som Yefun Allah su mone. Yé bok ne kem mo meja desnak mo bur. Suga nyim yé bok ne mbau mo bur ré tó, án kibot Yefun Allah bi sukdu. Án kibot sukndo gato Yefun ben su án nai ye yi jam gat pe sor anato yé gu án kwop wé mone.

Wahyu 7:2

Ji sokme malaikat ge dik yo o gato ma kadit nobu nim it mu mo gu. Malaikat ne gwat Yefun Allah gato gesyos ne bi ja gato Yefun syat wa An bi rus-i. Yefun syat ja wa bi rus-i ne gedik-gedik mo án git det subere ye jam do, ye ne sok mo Yefun bi rus-i it anane. Malaikat ne saiye nai malaikat ge at gato ku suktinggi wa ben bur si sem ibit ne.

Wahyu 8:4

Suk gato grik ne, ye syo bot git, ete i-bu gato basmi grik ndo it sisu sukdu gato yé gato onyar kem mo Yefun Yesus ki nai Yefun Allah ne sino. I-bu gato grik ndo it kadit sukbo mo malaikat syim mu kom mo Yefun Allah gwem. Yé gato onyar kem mo Yefun ki suk su Yefun ete sukdu gato án ki ne it mu kom mo Yefun Allah gwem dom.

Wahyu 8:5

Orete malaikat gwat sukbo, ete nai bot kadit meja gato ye grem suk wa som Yefun Allah su ne. An bok bot mo sukbo mit, orete an am sukbo ne ges mo bur ré re. Sukbo ne ma rek mo bur ré sa, nogu pu e, sukyo-sukyo pu e, nowarek e, sui juwai bur ré e ne.

Wahyu 9:13

Malaikat kedomumat fuf bi trompet-i ba o sa, ji jam sukdu ma kadit suk suti at mo meja emas gato ye grem suksom wa ye som Yefun Allah su mone, mo Yefun Allah gwem.