Wahyu 5:8 - Abun Scripture

⁸ Domba Gan ne nai buku sa, suge at si yenggras ge musyu we sop at ne bare nggwa sino mo Domba Gan gwem. Án sino jom kecapi si mbem emas ses su suk yo gato ye gre ete i-bu basmi grik ndo. Suk gato grik ndo ne tepsu sukdu gato yé gato onyar kem mo Yefun Yesus ki nai Yefun Allah ne.

Wahyu 5:8 ပူးပေါင်းရင်းမြစ်များ

Yohanes 1:29

Bi ik, ete Yohanes me Yefun Yesus ma mo an. Orete Yohanes ki do, ”Nin me Ye ré. An anato tepsu Domba Gan gato Yefun Allah syogat ma mo bur ré wa tot suktot mo sukibit gato men ben ne wé.

Yohanes 5:23

Ji bi Ai bes Ji gum wa Ji ndobot yetu subere yé mwa ne sino jammo An bi Gan tepsu yé jammo An. Ye gato yo jammo Ji nde yo, ye ne yo jammo Ji bi Ai gato syogat Ji ma mo bur ré dom nde.

Ibrani 1:6

Sarewo Yefun Allah syogat An bi Gan gato gum kok wai o re ma mo bur ré sa, Yefun Allah ki do, ”Ji bi malaikat mwa ne sino som Pa ne et!”

Wahyu 13:8

Yetu mwa ne sino gato kem mo bur ré bere bes suge ne gum kok, wo yetu bok gato Yefun Allah krom gum mo Domba Gan gato ye gu kwop wé ne bi Buku Yegesyos suga nyim tuya Yefun ut bur ré nde tó, bere yé bok ne yo bes suge krok ne gum kok nde.

Wahyu 15:2

Orete ji sokme suk gato ka sa kaca mwa tepsu sem si bot fros yu. Ji sokme yetu mwa gato Yesus Kristus nai kadit bur ré tepsu An bi rus-i ne ti mo sem de. Yé mwa ne nggi wai kadit suge doketke ne re. Suge doketke si suk gato ye ut ka sa suge ne yo nggiwa jom yé mwa ne nde, wo yé mwa ne nggi wai kadit suge doketke gato ku gum tepsu nomor ne. Yé mwa gane jom kecapi gato Yefun Allah syo nai án ne.

Wahyu 15:7

Orete suge at mone ge dik yo syo mbem mufit ses su Yefun Allah gato gesyos ne bi sukmaskwa nai malaikat ge mufit ne gwat mu.

Wahyu 19:4

Yenggras ge musyu we sop at sisu suge at bare nggwa ete som Yefun Allah gato kem mo An bi kursi sye ne. Án sino ki do, ”Sangge, men un Yefun Allah et.”

Wahyu 4:10

yenggras ge musyu we sop at bare nggwa mo An gato kem mo kursi ne gwem. Yenggras ne un Yefun gato kem to kapyo mato kapyo. Yenggras ne bare bi topi gato án bom tepsu yekwesu ne mo Yefun bi kursi de gwem, ete án badek su do,

Wahyu 4:4

Kursi musyu we sop at yo o kem wairi wa Yekwesu gato gum kok wai ne bi kursi. Mo kursi mwa ne, yenggras gato gum kok ge musyu we sop at kem mó. Yenggras bok ne it san gato kwo ndo. Án bom yekwesu bi topi emas mo án su.

Wahyu 4:6

Sane dom, ji me suk yo tepsu em mo kursi ne gwem. Em ne tepsu kaca gato rer ok tepsu syur gun gato ram nde. Yefun Allah bi pakwerut ge at mo gu ka sato suge ne mó. Suge at ne kem wairi wa Yefun bi kursi, ge dik yo mo kursi de gwem, ge dik yo o mo kursi de dari, ge dik yo o mo kursi de syim ge, ge dik yo o mo kursi de syim jam. Suge at ne gro gan mo án kaim ne sino, gro deyo mo án kaim de gwem si gro deyo o mo án kaim de dari ne sino.

Wahyu 4:8

Suge at ne sino í mumat mó. Suge at ne sino gro gan bot kaim ne sino, gro gan deyo mo i de nden si gro gan deyo o mo i de mit dom. Noru nombrak suge at ne yo not nde, án badek petok sare do, ”Yefun ga kok wai ne, Yefun ga ndo wai ne, Nan gum kok wai ’dit men, Nan anato men bi Yekwesu ga nggi wai. Yefun ga ketke ne mó e, Yefun ga su ré mó e, Bere kam sari Nan mó o, Bere Nan mó o tó e.”

Wahyu 5:11

Orete ji sokme mone o. Ji jam malaikat yaino, mwa yé re, ki bi sukdu-i. Malaikat ne mwa yé ndo nde, mwa wai o re, nat ne buk su. Malaikat yaino ne ti wairi wa suge at sisu yenggras ge musyu we sop at ne.

Wahyu 5:12

Malaikat mwa ne ba sukbadek, án ba sye sare do, ”Domba ga ye gu ne e, Domba ga kwop ne e, Nan sa, Nan gum kok ne o, gum sye ne o. Men un An gum a we, Men bes An gum a we, Domba ne tep wa ku suktinggi mwa ne o, tep wa suk mwa ne sino o. Men un An gum a we, Men bes An gum a we, Domba ne tep wa ku suktinggi mwa ne o, tep wa dakai rer kom mo mit ne o. Men un An gum a we, Men bes An gum a we, Domba ne tep wa ye bes An gum kok ne o, tep wa ye un An gum petok ne o.”

Wahyu 5:14

Suk mwa ne ba sukbadek ne, sane anato suge at ne ki do, ”Sangge!” ete yenggras ge musyu we sop at ne bare nggwa ete som Yefun dom.

Wahyu 5:6

Orete ji sokme Domba Gan ge dik yo ti mo yekwesu bi kursi mwa ne miten. Yefun bi pakwerut ge at mo gu gato ka sato suge at si yenggras ge musyu we sop at ne ti wairi wa Domba Gan ne si kursi ne. Domba Gan ka sato suge gato ye gu kwop wa som Yefun su ne. Domba Gan suti mufit mó, An gro gan mufit mó. An gro gan tepsu Yefun Allah Gen mufit gato Yefun Allah syogat mubot bur ré iwedewe.

Wahyu 6:1

Ji sokme saresa, Domba Gan ne kak lilin gum gato ye ut buku krat su ne. An kak lilin gum dik yo wé. Orete ji jam suge at ge dik yo saiye. Suge dik ne saiye tepsu nogu pu sare do, ”Nan ma se!”