Wahyu 5:12 - Abun Scripture

¹² Malaikat mwa ne ba sukbadek, án ba sye sare do, ”Domba ga ye gu ne e, Domba ga kwop ne e, Nan sa, Nan gum kok ne o, gum sye ne o. Men un An gum a we, Men bes An gum a we, Domba ne tep wa ku suktinggi mwa ne o, tep wa suk mwa ne sino o. Men un An gum a we, Men bes An gum a we, Domba ne tep wa ku suktinggi mwa ne o, tep wa dakai rer kom mo mit ne o. Men un An gum a we, Men bes An gum a we, Domba ne tep wa ye bes An gum kok ne o, tep wa ye un An gum petok ne o.”

Wahyu 5:12 ပူးပေါင်းရင်းမြစ်များ

Matius 28:18

Orete Yefun Yesus ma karowa pakon ne, ete An ki do, ”Yefun Allah bes ji gum tepsu Yekwesu mo gu nim si bur ré sino.

Yohanes 1:29

Bi ik, ete Yohanes me Yefun Yesus ma mo an. Orete Yohanes ki do, ”Nin me Ye ré. An anato tepsu Domba Gan gato Yefun Allah syogat ma mo bur ré wa tot suktot mo sukibit gato men ben ne wé.

Yohanes 17:2

Nan bes Ji gum Yekwesu wa Ji jom yetu mwa ne sino mo bur ré re, subere yé mwa ne sino gato Nan syo nai Ji ne, Ji ós án kem gesyos.

2 Korintus 8:9

Men jam do men bi Yekwesu Yesus Kristus ben An bi suk-i ne ndo dakai yi su men, men yo ben suk yo nyim wa An nde. An tepsu yepasye gato bi suk mwa. An da bi suk mwa, sarewo An ma mo bur ré sa, An bi sukjimnut sye kas subot men yetu anato An ben An nggwa tepsu ye gato yewa suk, subere An kak os ndo wa men, subere ri ma, men ku os wa men ku suk mwa mo Yefun Allah bi de-i o re.

1 Timotius 1:17

Sane men un Yefun Allah gato men bi Yekwesu kadit kapyo sor kom mo kapyo. Men bes Yefun Allah gato gesyos ne gum petok sor. Yefun Allah gato men me su men gro nde, men un An sor. Men un Yefun Allah dik ne sor, men bes An gum kok su ré to kapyo mato kapyo. Sangge.

Wahyu 1:6

Yesus Kristus anato bes men tepsu An dakai bi yewis-i dor kadit yewis yi neya. Yesus Kristus anato bes men tepsu yesu gato rer mo Yefun bi suk-i, men ben suk wa An bi Ai, Yefun Allah. Yesus Kristus anato nggiwa jowa suk mwa mo bur ré. An anato gum kok to kapyo mato kapyo sor. Sangge.

Wahyu 13:8

Yetu mwa ne sino gato kem mo bur ré bere bes suge ne gum kok, wo yetu bok gato Yefun Allah krom gum mo Domba Gan gato ye gu kwop wé ne bi Buku Yegesyos suga nyim tuya Yefun ut bur ré nde tó, bere yé bok ne yo bes suge krok ne gum kok nde.

Wahyu 15:3

Án kamo kecapi ete án ba sukbadek dik yo. Yé mwa ne sino badekbot Musa gato Yefun Allah bi pakwerut ne, si Domba Gan bi sukbadek-i sare do, ”Yefun ga nggi wai ne e, Yefun ga sye wai ne e, Nan gum kok wai ’dit men ne o, Nan yesu ga nggi wai ne o. Yefun ga nggi wai ne e, Yefun ga sye wai ne e, Nan ben suk ga ndo yé, Nan man suk ga ndo wai. Yefun ga yesu wa men yetu ne e, Yefun ga yesu mo bur ré e, Nan ben Nan bi suk-i ri-roi ne o, Nan ben Nan bi suk-i sangge ne o.

Wahyu 19:1

Malaikat ne ki bi sukdu ne or sa, ji jam suk yo ba sye tepsu yetu mwa yé mo gu saiye sare do, ”Men un Yefun Allah et. Yefun ne sa, nggi, Yefun Allah sa, gum kok wai o re. An sa, nai men wé kadit sukye subere men kem ndo to kapyo mato kapyo.

Wahyu 4:11

”Men bi Yekwesu ne e, Yefun gato jom men ne e, Nan sa, tep wa men bes Nan gum kok ne o, Men bes Nan gum sye ne o. Men bi Yekwesu ne e, Yefun gato jom men ne e, Nan sa, tep wa men un Nan gum ne o, Nan sa, tep wa ku suktinggi ne o. Men bes Nan gum kok a we, Men un Nan gum a we, Nan ut suk mwa ne sino o, Nan bi mas mo suk mwa ne sino o.”

Wahyu 5:13

Orete ji jam suk mwa gato mbau mo gu nim e, mo bur ré e, mo bur desnak e, mo sem e ne sino, suk mwa gato mbau mo pe mwa ne sino ba sukbadek sare do, ”Yefun ga kem mo kursi sye ne e Domba Gan ga mone e Men un An we ne gum ne o Men bes An we ne gum kok ne o. Yefun si Domba Gan ne e An we ete gum ne sye wai ne e. An we ete nggi wai kadit suk mwa ne o Su ré to kapyo to kapyo ne o.”

Wahyu 5:6

Orete ji sokme Domba Gan ge dik yo ti mo yekwesu bi kursi mwa ne miten. Yefun bi pakwerut ge at mo gu gato ka sato suge at si yenggras ge musyu we sop at ne ti wairi wa Domba Gan ne si kursi ne. Domba Gan ka sato suge gato ye gu kwop wa som Yefun su ne. Domba Gan suti mufit mó, An gro gan mufit mó. An gro gan tepsu Yefun Allah Gen mufit gato Yefun Allah syogat mubot bur ré iwedewe.

Wahyu 5:8

Domba Gan ne nai buku sa, suge at si yenggras ge musyu we sop at ne bare nggwa sino mo Domba Gan gwem. Án sino jom kecapi si mbem emas ses su suk yo gato ye gre ete i-bu basmi grik ndo. Suk gato grik ndo ne tepsu sukdu gato yé gato onyar kem mo Yefun Yesus ki nai Yefun Allah ne.

Wahyu 5:9

Án sino ba sukbadek be yo sare do, ”Domba ga gum kok ne o, Domba ga sye wai ne o, Nan sa, gum kok tep wa Nan nai buku ne o, tep wa Nan kak lilin gum wé ne o. Nan gum kok a we, Nan gum sye wai a we, Ye gu Nan, Nan dé sye wa yetu ne o, Nan bi nggwa tepsu suktot wa ne o. Nan dé sye wa yetu o, Nan tepsu suktot wa yetu o, Nan dé sye wa yeyo-yeyo gato sok mo Yefun bi rus-i ne o, Yetu mwa ne mo buryo-buryo sino o. Nan dé sye wa yetu o, Nan tepsu suktot wa yetu o, Nan dé sye wa yetu wisyo-wisyo sino ne o, Yetu mwa gato ki ayo-ayo sino o.

Wahyu 6:1

Ji sokme saresa, Domba Gan ne kak lilin gum gato ye ut buku krat su ne. An kak lilin gum dik yo wé. Orete ji jam suge at ge dik yo saiye. Suge dik ne saiye tepsu nogu pu sare do, ”Nan ma se!”

Wahyu 7:12

Malaikat mwa ne sino ki do, ”Sangge. Men un Yefun Allah gato jom men. Men bes An gum kok sye wai o re. An sa, jam suk rer kom mo mit re. An nggi wai kadit suk mwa ne. An jom suk mwa ne sino. Sane men un Yefun Allah et. Men ki ndo mo An su kapre to kapyo mato kapyo. Sangge.”