Wahyu 3:8 - Abun Scripture

⁸ Ji jam suk mwa gato nin ben ne or re. Nin me ré, Ji kak os wa nin sok mo Yefun bi rus-i. Ji kak os mo nin gwem nyim wé re. Ye yi yo nggiwa grem suk yo yawa wa nin muket os ne nde. Ji jam do, nin yo nggi teker eta nde, wo nin werwa nin benbot Ji bi sukdu-i petok sor, nin yo rewa Ji gum nde.

Wahyu 3:8 ပူးပေါင်းရင်းမြစ်များ

Lukas 12:9

Wo ye gato rewa Ji mo yé mwa gwem, bere Ji waii rewa ye ne mo Yefun Allah bi malaikat gwem dom. Sarewo ye to da jam Ji gum sarewo an bambrai wa ki Ji gum mo yé mwa gwem, sane bere Yetu bi Pa waii rewa ye ne gum mo Yefun Allah bi malaikat gwem.

Yohanes 15:20

Nin napawa Ji bi sukdu-i gato Ji ki nai nin ne do, ’Pakwerut yo sye wai kadit bi yenggras gato kon an nde.’ Ye deyo ben sukye nai Ji it yo, bere yé ne ben sukye nai nin dom. Ye deyo benbot Ji bi sukduno-i yo, bere ye ne benbot nin bi sukduno-i dom.

Yohanes 17:6

Ji kadum Nan nai yé mwa gato Nan syo nai Ji mo bur ré, yé mwa ne jam Nan re. Yé mwa ne anato Nan bi rus-i. Nan syo án nai Ji re. Án benbot Nan bi sukdu-i re.

Suk Gato Yerasul Ben Ne 14:27

An we mu kom mone, or an we kendo ye gato onyar kem mo Yefun Yesus sum sino, orge an we ki subot suk mwa gato Yefun Allah ben su an we mo pe bok yo gato an we mu mone. An we ki do, ”Yefun Allah ben men ka we nggiwa men ka we ki subot An bi sukdu, Yefun Allah ben men ka we nggiwa ben sukye gato ben nje yeket. Yefun Allah kak os wa men ka we ki An bi sukdu nai yewis yi, ete yewis yi mwa ne nai sukjimnut do, án onyar kem mo Yefun Yesus mone dom.”

1 Korintus 16:9

we, kapre yé mwa duwer ji, Yefun kak os wa ji ben An bi suk-i gato ós nje more tó.

2 Korintus 2:12

Ji mu mo kota Troas wa ji kibot os ndo gato Kristus kak wa men yetu ne. Ji mu kom mone sa, Yefun Yesus kak os wa ji kibot sukdu mone.

Filipi 4:13

Yesus Kristus anato ben ji nggiwa ji ben suk mwa ne sino re.

Kolose 4:3

Nin do ki suk su Yefun yo, nin ki suk su Yefun wa men more dom, subere Yefun Allah kak os ndo wa men ki sukdu subot Kristus ne frek subot ye yi neya. Sukdu ne, suga nyim neya Yefun Allah gurik re. Ji kibot sukdu ne anato ye sok ji mo sel.

1 Timotius 5:8

Ye gato yo mewa an bi nje mo sukye gato yé ne ku nde, tepsu an misyar Yefun bi sukduno-i it anane. Sane dom, ye gato yo mewa an dakai bi rus-i nde anato ibit wai o re, an ben an bi suk-i ibit wai kadit ye gato jam nde Yefun.

2 Timotius 4:7

Ji sa, ji wergat ji nggwa sor kom mo pe gato or mó, tepsu ye gato kas bitanding yu kas sor kom mo pe gato or mó. Ji sa, ji onyar kem pe mo Yefun Yesus sor kom mo pe gato or mó, ji yo brek kadit An nde.

Yudas 1:4

we, su ré ji jam do, yetu ge bok yo gato misyar Yefun Allah da ma fros men mo nu ari re, sarewo men jam nde án si men mone. Yefun Allah bi sukdu-i subot os ndo gato An fro wa men ne, yé ne brek sukdu ne tara kadit bi sukjimnut gato sangge ne or re, subere án ku os wa án dakai ben siri su nggon ket án í sor. Án bariket men bi Yekwesu ka dik ne sor. Án misyar Yesus Kristus gato gum kok sye wai o re. Sane kam sari ne ma án ku sukye tepsu ye krombot mo Yefun Allah bi sukdu suga nyim tuya re.

Wahyu 2:13

Ji jam do, nin kem mo nat gato biris bi yekwesu kem mone. Nin da kem mone, sarewo nin onyar kem pe mo Ji, nin yo misyar Ji nde. Antipas gato ben Ji bi suk-i e, ki Ji bi sukdu-i ne petok sor, ye gu an kwop. Kapre ye gu an kwop wé mo nin gwem mo nin dakai bi kota, gato biris bi yekwesu kem mone, nin yo misyar Ji dom nde.

Wahyu 2:2

Ji jam subot suk mwa gato nin ben ne. Ji jam do, nin ben nin bi suk-i, nin samok. Kapre nin ku sukye, nin misyar Ji nde, wo nin ben Ji bi suk-i pe sor. Ji jam do, nin yo kak nin mit wa ye gato ben sukibit bu ne nde. Ji jam do, nin watbot yé bok yo gato ki do, án sa, Yefun Allah bes án gum yerasul wa ben Yesus Kristus bi suk-i. Nin watbot yé bok gato ki sane sor nin jam do, yé bok ne kidar.

Wahyu 22:7

Yefun Yesus ki do, ”Nin jammo suk gato Ji ki ré et, bergan sor ete Ji ma. Ye gato jammo sukdu subot suk gato bere bor mo buku ré, ye ne sa, mit at wa, we bere Yefun ben sukndo su ye ne re.”

Wahyu 3:1

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Sardis sare do: Ji gato jom Yefun Allah Gen ge mufit gato mu ben Yefun Allah bi suk-i, Ji gato jom bí ge mufit ne bi sukdu-i sare: Ji jam subot suk mwa gato nin ben mone o re. Yé mwa ne nut do, nin sa, mbau, nin onyar kem mo Ji, sarewo Ji jam do, nin misyar Ji anato nin tepsu yé gato kwop re.

Wahyu 3:10

Kapre nin ku sukye, nin misyar Ji nde, wo nin benbot Ji bi sukdu-i petok sor tepsu Ji ki ne. Sane bere kam gato yetu mwa ne sino mo bur ré iwedewe ku sukye ndo nde, bere Ji mewa nin kadit re. Bere yetu mwa ne sino ku sukye subere yé gato misyar Ji, bere bor mone.

Wahyu 3:15

Ji jam subot suk mwa gato nin ben ne or re. Nin yo ben Ji bi suk-i su nin mit dik nde. Nin yo bariwa ben Ji bi suk-i dom nde, tepsu nin kam nde, nin dek dom nde. Sa ndo sa, nin nai os dik sor, sare: nin ben Ji bi suk-i yo, nin ben su nin mit dik sor, ondewo nin ben Ji bi suk-i nde.

Wahyu 3:7

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Filadelfia sare do: Ji gato ben Ji bi suk-i ndo petok, Ji gato ben Ji bi suk-i ri-roi sor, Ji gato jom yeraja Daud bi kunci ne, suk gato Ji kak, ye yo nggiwa grem suk yo krat yawa satu nde. Sane dom, suk gato Ji grem krat yawa, ye yo nggiwa kak o nde. Ji bi sukdu-i anare: