Wahyu 3:14 - Abun Scripture

¹⁴ Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Laodikia sare do: Ji gato Sangge, Ji gato ki Ji bi sukdu-i subot Yefun Allah ne sangge, Ji gato ki Yefun Allah bi sukdu-i sisu ri-roi sor, Ji gato jom suk mwa gato Yefun Allah ut mo i-ke ne sino, Ji bi sukdu-i anare:

Wahyu 3:14 ပူးပေါင်းရင်းမြစ်များ

Yohanes 1:3

Yefun Allah ut suk mwa ne sino, su Yefun Yesus gato ye kendo do Sukdu ne. Sukdu do yo mo nde yo, Yefun Allah yo ut suk mo gu nim si bur ré mo nde.

Yohanes 8:14

Yefun Yesus ki nai án do, ”Kapre Ji ki sukdu rer subot Ji dakai, sukdu gato Ji ki ne sangge, we Ji jam pe gato Ji ma kadit ne si Ji jam pe gato Ji mu mone dom. Sarewo nin jam nde pe gato Ji ma kadit ne. Sane dom nin jam nde pe gato Ji mu mone.

2 Korintus 1:20

Sane suk mwa ne sino gato Yefun Allah tom su men, Yefun ki do, suk mwa ne ”Sangge,” mo suk gato Kristus ben ne re. Men me suk gato Yesus Kristus ben, sane men ki do, suk gato Yefun Allah tom su men ne ”Sangge,” bere Yefun benbot re, anato men bes Yefun Allah gum kok mone.

Kolose 1:15

Men yo me Yefun Allah su men gro nde, sarewo Kristus gato men ku ne, An tepsu Yefun Allah dakai. Kristus ré, An gum kok wai kadit suk mwa gato Yefun Allah ut ne sino, sane anato ye kendo An gum do, Yefun Allah bi Pa doketke.

Kolose 1:18

Men sino gato onyar kem mo Yefun Yesus mo nu ari mwa ne anato tepsu Kristus kaim ne. Kristus anato tepsu su mo men kaim ne. Sane Kristus anato tepsu i-ke wa men yé gato onyar kem mo An re. An anato tepsu Pa doketke gato Yefun Allah sun kadit sukkwop, subere An wadigan sor ete gum kok wai kadit suk mwa neya.

Kolose 2:1

Ji iwa nin jam do, ji wergat ji nggwa wa ji ben sukndo su nin si ye gato kem mo kota Laodikia, si yé yi neya gato yo ku ji nde tó.

Kolose 4:16

Nin do baca surat ré or, eteyo nin meret os yo subere ye yo gwat surat ete yé baca surat ré wa ye gato onyar kem mo Yefun Yesus mo Laodikia ne waii jam dom et. Sane nin do ku surat dik yo kadit Laodikia yo, nin waii baca wa nin sino jam dom et.

Wahyu 1:11

Ji jam ye ne ki sukdu sare do, ”Suk gato bere nan sokme ne yo, nan krombot mo buku. Orete nan syo buku ne nai yé gato onyar kem mo Yefun Yesus mo nu ari mo kota Efesus e, Smirna e, Pergamus e, Tiatira e, Sardis e, Filadelfia si Laodikia ne et.”

Wahyu 1:5

Yesus Kristus gato jam Yefun Allah sisu ndo, An ki bi sukdu-i subot Yefun Allah ri-roi petok sor. Yesus Kristus anato ye doketke gato Yefun Allah sun kadit sukkwop. Yesus Kristus anato jowa yeraja mwa ne sino mo bur ré. Yesus Kristus ete mewa nin. Yesus Kristus ete uttok nin petok sor. Yesus Kristus anato bi sukjimnut sye kas subot men ndo nde petok sor. Yesus Kristus anato kwop, An dé sye wa tot men bi suktot mo sukibit gato men ben ne wé.

Wahyu 19:11

Orete ji sokme Yefun Allah bi nu mo gu kak sa, ji me kuda kwo ge dik yo ti mo ji gwem. Ye gato it mo kuda ne gum do, ”Ri-roi si Sangge.” Ye ne syo sukye nai yetu sisu ri-roi tepsu sukibit gato yetu ben ne sor. Ye ne ndobot suk gato yetu ben ne sisu sangge, sane anato An futma gu nje kwop win sukibit gato yé ben ne.

Wahyu 2:1

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Efesus sare do: Ji gato jom bí mufit mo Ji syim ge, ete mubot suk gato ka sa dem sor gato ye dum sukru bo mufit mone, Ji bi sukdu-i sare do:

Wahyu 21:6

Yefun ki o do, ”Suk mwa ne Ji ben or it! Ji anato Yefun gato ut suk kadit ketke ete jom sane sor kom mo pe gato or mó. Bere Ji syo syur nai ye gato sosa kadit syur nggrup gato ben yetu mbau. Bere Ji syo syur ne ma wa án da, án yo bi suk yo wa nde.

Wahyu 22:13

Ji anato Yefun gato ut suk kadit ketke ete Ji jom sane sor kom mo pe gato or mó. Ji anato kem kadit ketke sor to kapyo mato kapyo.”

Wahyu 22:6

Orete malaikat ne ki nai ji do, ”Sukdu gato ji ki ré sangge, sukdu ne tep wa yé onyar kem mó. Men bi Yekwesu Yefun Allah gato bok An Gen mo yenabi anato syogat An bi malaikat ma kadum suk gato bere bor nai An bi pakwerut mwa ne jam et.”

Wahyu 3:7

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Filadelfia sare do: Ji gato ben Ji bi suk-i ndo petok, Ji gato ben Ji bi suk-i ri-roi sor, Ji gato jom yeraja Daud bi kunci ne, suk gato Ji kak, ye yo nggiwa grem suk yo krat yawa satu nde. Sane dom, suk gato Ji grem krat yawa, ye yo nggiwa kak o nde. Ji bi sukdu-i anare: