Wahyu 3:1 - Abun Scripture

¹ Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Sardis sare do: Ji gato jom Yefun Allah Gen ge mufit gato mu ben Yefun Allah bi suk-i, Ji gato jom bí ge mufit ne bi sukdu-i sare: Ji jam subot suk mwa gato nin ben mone o re. Yé mwa ne nut do, nin sa, mbau, nin onyar kem mo Ji, sarewo Ji jam do, nin misyar Ji anato nin tepsu yé gato kwop re.

Wahyu 3:1 ပူးပေါင်းရင်းမြစ်များ

Lukas 15:24

Ji nut do, ji bi pa gato mu ré kwop re, sarewo pa ré mbau o re. Ji nut do, ji bi pa ré muri re, an yo ma o nde, sarewo an satu ma ku ji o re.’ Sane pakwerut benbot suk gato yenggras ki ne. Yé mo nu ne konwa pa gato satu ma ne.

Lukas 15:32

Sarewo men konwa nan bi nji dowok, men kamowa, we men nut do, nan bi nji gato mu ne kwop re, sarewo nan bi nji ne satu ma an mbau o re. Nan bi nji, men nut do an muri re, an yo ma o nde, sarewo nan bi nji satu ma ku men sisu ndo o re. Sane men konwa an.’ ”

Yohanes 1:16

Yefun Allah bi sukjimnut sye kas subot men petok sor. Yefun Allah syo suk mwa nai men dakai yi, An ben sukndo su men mo suk mwa ne sino.

Yohanes 1:33

Nyim ne, ji dakai jam An nde tó, sarewo Yefun Allah gato syokom ji ras nje mo syur ki nai ji suga nyim tuya wé re do, ’Bere nan me Yefun Allah Gen is kadit gu ma bur ete tom mo yetu ge dik it yo, Ye ne anato bere ras yetu mo Yefun Allah Gen.’

Yohanes 20:22

Orete An fuf An mas mo An bi pakon ne, ete An ki do, ”Nin nai Yefun Allah Gen mo nin mit et!

Yohanes 3:34

We, Ye gato Yefun Allah syogat ma mo bur ré, Yefun Allah syo Yefun Gen bok nggwa mo An, Yefun Gen bi suktinggi ne pe gato or mó yo mo nde. Sane Yefun Allah bi Gan ki Yefun Allah dakai bi sukdu-i ne rer wa men jam sor.

Suk Gato Yerasul Ben Ne 2:33

Yefun Allah bes Yefun Yesus kem tak Yefun Allah de syim ge. Yefun Yesus si Yefun Allah jom suk mwa neya tepsu Yekwesu sino mone. Yefun Allah syo An Gen bok nggwa mo Yefun Yesus tepsu Yefun Allah tom ne. Sane, Yefun Yesus waii syo Yefun Allah Gen bok nggwa mo men, anato men ki suk su a mwa neya ré, nin dakai jam ete nin me su nin gro re. Yefun Yesus sa, An it su An kaim mu mo gu tepsu Yekwesu,

Efesus 2:1

Nin ré, suga nyim nin ben sukdaret, nin ben siri kadit Yefun Allah mit, nin jam nde Yefun Allah, ben sato nin kwop kadit Yefun Allah it.

Efesus 2:5

Yefun Allah bi sukjimnut sye kas subot men sye teker, sane kapre ben sato men kwop mo sukibit gato men ben ne, Yefun Allah sun men mbau satu, ete men si Kristus kem ndo it. Men yo ben suk yo nyim wa Yefun Allah nde, wo An dakai bi sukjimnut sye kas subot men yi sor anato An nai men wa men si An kem ndo to kapyo mato kapyo.

Kolose 2:13

Suga nyim nin yo onyar kem mo Kristus nde tó, nin ben sukibit ket nin í petok sor. Sukjimnut gato tik nin mit wa nin ben sukibit bu ne, Kristus yo kum toko wé nde tó, ben sato nin kwop mo sukibit ne. Wo su ré, ben sato Yefun Allah sun nin kadit sukkwop, tepsu An sun Kristus ne. Sane Yefun Allah yo maskwa nin mo sukibit mwa gato nin ben ne o nde, An yo nutbot o nde.

1 Timotius 5:6

Sarewo nggonna gato ben bi suk-i ket mom í sor, mom da mbau, sarewo Yefun Allah bi sukjimnut mo nggon ne do, nggon ne kwop re.

Yakobus 2:26

Yetu gato kaim mó, sarewo an gen mu kadit it yo, an yo mbau o nde, ye ne kwop it anane. Sane dom, men ki do, men onyar kem mo Yefun Allah, sarewo men yo ben suk gato Yefun ki ne nde yo, men tepsu yetu gato kwop, men onyar kem mo Yefun sisu sangge anane nde.

1 Petrus 1:11

Yenabi bok ne jam sukdu subot sukye gato bere Kristus ku ne. Kristus Gen bok nggwa mo yenabi, ete ki sukdu napyo nai yenabi bok ne jam re. Yenabi jam do, bere ye bes Kristus gum kok mo os ndo gato An kak ne. Sane yenabi werwa án jam kom mo mit o et, án ndobot do, ”Os ne bere Yefun kak sa u ne? Kam ot ete bere Yefun kak os ne?” Yenabi ne ndobot, sarewo án yo jam sukdu mwa ne or sino nde.

Yudas 1:12

Yé gato ben bi suk-i sato yé bok ne, án si nin sum wa git sugit sino sa, án ben nin sino gum ibit mo sukdaret gato án ben ket án í mone sor, tepsu án jam nde án nggwa re, án yo damen dom nde. Án nutbot án dakai sor re, án yo nutbot ye yi nde re, tepsu ye gato mewa suksi, wo án dakai nai sugit wa án dakai sor, án yo syo sugit nai suksi ne nde, wokgan yo dom nde. Án tepsu nyotem gato nofuf sam ma, ndendu, men nut do bere nogi, sarewo nogi yo mo nde. Men nut do, bere án ós men tepsu nogi os men, sarewo suk yo mo nde. Án tepsu kwe gato bi aina tep wa bo, sarewo kwe ne yo bo mo nde. Men nut do, bere án syo suk gato ndo nai men, wo suk yo mo nde. Án tepsu kwe gato yé tik i-brot buk kadit bur re, sane bere kwe ne te re, yo kom o nde it. Án tepsu suk gato men nut do ndo wa ós men, ondewo suk yo mo nde.

Wahyu 1:11

Ji jam ye ne ki sukdu sare do, ”Suk gato bere nan sokme ne yo, nan krombot mo buku. Orete nan syo buku ne nai yé gato onyar kem mo Yefun Yesus mo nu ari mo kota Efesus e, Smirna e, Pergamus e, Tiatira e, Sardis e, Filadelfia si Laodikia ne et.”

Wahyu 1:16

An jom bí ge mufit mo An syim ge. Nyom gato ot de we syesyar kadit An syokwet. An gro ru nggi tepsu kam yor sugato kam ti ri.

Wahyu 1:20

Ji ki rer subot bí mufit gato nan me mo Ji syim ge ne si suk gato ka sa dem sor gato ye ben kadit emas wa ye dum sukru bo mufit ne. Suk we ne bi sukjimnut ne Yefun gurik kadit yetu, wo su ré Ji ki bi sukjimnut ne rer wa nan jam. Bí mufit bi sukjimnut do, malaikat ge mufit gato mewa yé gato onyar kem mo Yefun Yesus mo nu ari mo kota mufit ne {Efesus e, Smirna e, Pergamus e, Tiatira e, Sardis e, Filadelfia si Laodikia ne}. Or o, suk gato ka sa dem sor wa ye dum sukru mufit mone bi sukjimnut do, yé gato onyar kem mo Yefun Yesus mo nu ari mo kota mufit ne.”

Wahyu 1:4

Ji, gato gum do Yohanes, ji krom sukdu ré wa nin, yé gato onyar kem mo Yefun Yesus mo nu ari mufit mo bur Asia. Yefun Allah gato su ré mó, kadit ketke mó, si kam sari ne ma bere mó tó ne, Yefun Allah ete mewa nin. Yefun Allah ete uttok nin petok sor. Yefun Allah Gen ka mufit gato kem mo Yefun Allah bi kursi tak de gwem, Yefun Allah Gen ete mewa nin, Yefun Allah Gen ete uttok nin petok sor.

Wahyu 2:13

Ji jam do, nin kem mo nat gato biris bi yekwesu kem mone. Nin da kem mone, sarewo nin onyar kem pe mo Ji, nin yo misyar Ji nde. Antipas gato ben Ji bi suk-i e, ki Ji bi sukdu-i ne petok sor, ye gu an kwop. Kapre ye gu an kwop wé mo nin gwem mo nin dakai bi kota, gato biris bi yekwesu kem mone, nin yo misyar Ji dom nde.

Wahyu 2:19

Ji jam subot suk mwa gato nin ben ne. Ji jam do, nin bi sukjimnut sye kas subot yu e, nin onyar kem mo Yefun e, nin ós ye gato yewa suk e; kapre nin ku sukye, nin misyar Yefun nde, wo nin jom An bi sukdu-i ne krat sor. Ji jam do, su ré, nin ben suk sane mwa wai kadit suk gato nin ben su ketke nin onyar kem mo Ji ne o re.

Wahyu 2:2

Ji jam subot suk mwa gato nin ben ne. Ji jam do, nin ben nin bi suk-i, nin samok. Kapre nin ku sukye, nin misyar Ji nde, wo nin ben Ji bi suk-i pe sor. Ji jam do, nin yo kak nin mit wa ye gato ben sukibit bu ne nde. Ji jam do, nin watbot yé bok yo gato ki do, án sa, Yefun Allah bes án gum yerasul wa ben Yesus Kristus bi suk-i. Nin watbot yé bok gato ki sane sor nin jam do, yé bok ne kidar.

Wahyu 2:9

Ji jam do, nin ku sukye, nin yewa suk, sarewo Yefun syo suk mwa wa nin da gesyos ne mó re. Ye Yahudi bok yo ki do, án sa, Yefun nai án gum sok mo Yefun bi rus-i. Án ma ki nin gum ibit ket kwayo-kwayo. Ji jam sukibit gato án kiket nin su ne o re. Yé bok ne jam nde Yefun, wo yé gato ben bi suk-i sane sok mo biris bi yekwesu bi rus-i ne sor re.

Wahyu 3:15

Ji jam subot suk mwa gato nin ben ne or re. Nin yo ben Ji bi suk-i su nin mit dik nde. Nin yo bariwa ben Ji bi suk-i dom nde, tepsu nin kam nde, nin dek dom nde. Sa ndo sa, nin nai os dik sor, sare: nin ben Ji bi suk-i yo, nin ben su nin mit dik sor, ondewo nin ben Ji bi suk-i nde.

Wahyu 3:2

Sane nin sun tom! Kom more, nin yo ben suk tepsu pe gato Yefun Allah iwa ne nde tó, bergan nin tepsu yé gato kwop rok re. Sane nin misyar Yefun bi suk-i o nde, wo nin wergat nin nggwa subere nin ben suk tepsu Ji mit o et.

Wahyu 3:8

Ji jam suk mwa gato nin ben ne or re. Nin me ré, Ji kak os wa nin sok mo Yefun bi rus-i. Ji kak os mo nin gwem nyim wé re. Ye yi yo nggiwa grem suk yo yawa wa nin muket os ne nde. Ji jam do, nin yo nggi teker eta nde, wo nin werwa nin benbot Ji bi sukdu-i petok sor, nin yo rewa Ji gum nde.

Wahyu 4:5

Ji me nowarek, ji jam sukyo-sukyo pu. Ji jam nogu pu gato sye syesyar kadit kursi mo miten ne. Kak ru mufit ti mo kursi ne gwem. Kak ru mufit ne anato tepsu Yefun Allah Gen mufit gato ben Yefun Allah bi suk-i.

Wahyu 5:6

Orete ji sokme Domba Gan ge dik yo ti mo yekwesu bi kursi mwa ne miten. Yefun bi pakwerut ge at mo gu gato ka sato suge at si yenggras ge musyu we sop at ne ti wairi wa Domba Gan ne si kursi ne. Domba Gan ka sato suge gato ye gu kwop wa som Yefun su ne. Domba Gan suti mufit mó, An gro gan mufit mó. An gro gan tepsu Yefun Allah Gen mufit gato Yefun Allah syogat mubot bur ré iwedewe.