Wahyu 22:2 - Abun Scripture

² Syur ne syé ket os sye mit mo kota ne. Mo syur de kwe gato ben yetu kem gesyos ne kom mó. Kwe ne ke dik yo mo syur deré, ke dik yo o mo syur deta. Kwe ne bo ainadik-ainadik petok, tepsu tahun dik, kwe ne bo wam musyu dik sop we. Yé mwa nai kwe ne nat wa kon án wip ne ge su.

Wahyu 22:2 ပူးပေါင်းရင်းမြစ်များ

Lukas 4:18

”Yefun Allah Gen bok nggwa mo Ji, we Yefun Allah bes Ji wa Ji ki subot An bi suktaru gato ndo nai ye gato yewa suk jam An bi sukdu ne. An syogat Ji ma wa Ji ki nai yé gato ye rai ne do, ’Ji sombok nin wé kadit sukibit gato jom nin ne it!’ An syogat Ji ma wa Ji ós ye gato gro ndu, subere Ji ben án gro ndo satu. An syogat Ji ma wa Ji nai ye gato ku sukye wé kadit sukye ne subere án kem ndo satu.

1 Petrus 2:24

Sukibit mwa ne sino gato men yetu ben ne tepsu sukde gato Yesus Kristus sam wa men. Ben sato Kristus sam men bi sukde ne mo An kaim mu kom mo kwesukwin. An kwop wa men, An tot suktot mo sukibit mwa gato men ben ne or wé mone, subere men gum pakwerut wa ben sukibit o nde, wo men ben men bi suk-i ndo tepsu Yefun Allah mit sor. Yé sap Kristus wip e, yé mban An mo kwesukwin e, yé ben sukye nai Kristus ket kwayo-kwayo e ne, anato nin ku os wa nin ge kadit nin bi suki mwa ne, orete nin kem ndo mone it.

Wahyu 2:7

Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et. Yé gato nggi wai kadit bur ré bi suk-i yo, bere Ji kak os wa án mu nai kwebo gato ben yetu kem gesyos wa án git. Kwe ne kom mo Yefun Allah bi nat-i gato ndo.”

Wahyu 21:21

Ros syo mo kota ne musyu dik sop we. Yé kok mutiara bodik-bodik gato sye kewa ros syo ne dik-dik. Yefun sya emas gato ndo yé, rer tepsu kaca bot os sye mo kota mit ne.

Wahyu 21:24

Kota ne bi sukru bere rer ku yewis mwa ne sino tep wa án mu ben án bi suk-i su. Yeraja mo buryo-buryo bere gwat án bi sukrok mwa ma mo kota ne.

Wahyu 22:1

Orete malaikat ne kadum syur gato ben yé mbau ne nai ji me dom. Syur ne rer tepsu kaca. Syur ne syé kadit Yefun Allah si Domba Gan bi kursi sye ne.

Wahyu 22:14

Ye gato ben Yefun bi suk-i, ben sato án gu án bi san kwo ndo it anane. Ye gato gu án bi san kwo yo, bere án ku os wa án git kwebo mo kweke gato ben yetu kem gesyos. Bere án ku os wa án sok ket ros syo mu mo kota mit ne. Yé ne sa, án mit at wa, we bere Yefun ben sukndo su án re.

Wahyu 22:19

Ye gato tot sukdu mo buku ré napyo wé yo, bere Yefun Allah tot sukndo gato ji krombot mo buku ré napyo wé kadit ye ne re. Bere Yefun Allah tot sukndo gato ye ne ku mo Yefun Allah bi kota si kwebo gato ben yetu kem gesyos ne, Yefun Allah tot sukndo ne napyo wé kadit ye ne re.