Wahyu 2:23 - Abun Scripture

²³ Yé bok ne sino gato simo nggon ne, bere Ji gu kwop wé. Ji gu yé bok ne kwop wé, subere yé gato onyar kem mo Yefun Yesus mo nu ari mwa ne sino jam do, Ji anato jam kadik-kadik bi sukjimnut-i kom mo mit re. Yé bok ne yo ku os wa gurik sukibit gato án ben ne nde. Bere Ji ben sukye nai kadik-kadik tepsu sukibit gato án ben ne.

Wahyu 2:23 ပူးပေါင်းရင်းမြစ်များ

Matius 16:27

We sare, Ji, gato Yetu bi Pa, bere Ji si Ji bi malaikat si Ji bi Ai bi suktinggi ne ma, ete syo suk gato ndo nai nje tepsu sukndo gato án ben ne.

Lukas 16:15

Yefun Yesus ki nai án do, ”Nin anato ben suk subere yé mwa nut do, nin sa, ben sukndo, ondewo Yefun Allah jam nin mit-i tara re. Suk gato yetu nut do, ndo, Yefun Allah nut do, ibit.”

Yohanes 21:17

Yefun Yesus ndo mo Petrus wam do gri o do, ”Simon, gato Yohanes bi pa, nan jimnotku Ji bado?” Petrus kwabom dek, we Yefun Yesus ndo mo an ne sor kom mo wam gri it. Sane Petrus ki nai Yefun Yesus do, ”Yenggras, men bi Yekwesu, Nan sa jam suk mwa ne sino kom mo mit, Nan rer mo Nan dakai. Nan jam do, ji jimnotku Nan re.” Orete Yefun Yesus ki nai an do, ”Sane yo, nan mewa Ji bi pakon ne tepsu ye mewa suksi sato domba gan sisu ndo et.

Yohanes 4:16

Yefun Yesus ki nai nggon ne do, ”Sane nan mu, nan kendo nan bi ya, ete nan si ma.”

Suk Gato Yerasul Ben Ne 1:24

Yé kibot Yusuf si Matias, orge yé ki suk su Yefun do, ”Yefun, Nan sa, jam men yetu mit si men onyar ne sino, sane kadit ye we ré, Nan kadum ye gato Nan iwa men bes win Yudas,

Roma 14:12

Sane bere men yetu gedik-gedik dakai ki rek subot suk mwa gato men dakai ben ne mo Yefun Allah gwem sor. Sane men mewa men nggwa kadit men ki yu daret nde.

Roma 8:27

Sane suk gato Yefun Allah Gen ndek mo Yefun wa ye gato onyar kem mo Yesus Kristus ne, bere sukdu ne tepsu Yefun Allah mit re. Sane anato Yefun Allah gato jam men yetu kom mo mit ne, An jam An Gen bi sukjimnut-i re.

2 Korintus 5:10

we su kam gato Kristus ma ne, bere An ndobot men yetu mwa ne sino. Mone yetu gedik-gedik ku suk tepsu suk gato án ben mo bur ré. Men yé gato ben sukndo, bere men ku suk gato ndo mone, wo yé gato ben sukibit, bere yé ne ku sukye mone.

Galatia 6:5

Men bambrai nde, wo men kadik-kadik dakai sam men bi kwede-i ne et.

Ibrani 4:13

Men yo ku os wa gurik suk yo kadit Yefun Allah mo nde, sukwokgan yo dom nde. Yefun jam suk mwa ne o re. Suk mwa ne sino gato Yefun Allah ut ne, suk yo kewa nde, An me suk mwa ne dakai bor yi sor. Men yo ku os wa gurik suk gato men ben ne nde, sane bere men ki subot suk gato men ben ne rer nai Yefun Allah gato ndobot men su kam sari ne ma sor.

1 Petrus 1:17

Nin ki suk su Yefun Allah yo, nin kendo An gum do, nin bi Ai. Bere Yefun ndobot nin si yé mwa ne sino tepsu yu re. Ye gato ben sukibit bere An syo sukye nai ye ne. Yefun yo ben An bi suk-i su ye gato gum sye si ye gato gum wok tara kadit yu nde, wo An ben suk su yé mwa ne tepsu yu sino. Sane nin kem mo bur ré tepsu yedamok yo, nin jammo Yefun Allah, nin bes An gum kok et.

Wahyu 2:11

Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et. Yé gato nggi wai kadit bur ré bi suk-i yo, bere sukkwop wam kedowe yo tok án nde, án yo kwop to kapyo mato kapyo nde.”

Wahyu 2:7

Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et. Yé gato nggi wai kadit bur ré bi suk-i yo, bere Ji kak os wa án mu nai kwebo gato ben yetu kem gesyos wa án git. Kwe ne kom mo Yefun Allah bi nat-i gato ndo.”

Wahyu 20:12

Ji sokme yé mwa ne sino gato kwop sum mo kursi sye ne gwem. Yé gato gum sye e, yé gato gum wok e ne, yé mwa gato kwop ne sino ti mo kursi sye ne gwem. Buku bok yo kak mone. Orete ye nai Buku dik yo o ma, ye kak mone dom. Ye krom yé gato bere kem gesyos ne gum mo Buku ne. Or o Yefun Allah syo sukye nai yetu gato kwop ne tepsu sukdu gato ye krom mo buku bok ne. Yefun Allah syo suk nai yetu mwa ne tepsu suk gato yetu mwa ne ben re.

Wahyu 20:13

Yé gato kwop mo sem mit syesyar ete ma ti mo Yefun Allah gwem. Yé gato mo gwinggri syo mo bur desnak si sukkwop bi nat-i ne syesyar sino ma ti mo Yefun Allah gwem dom. Orete Yefun Allah syo sukye nai nje gedik-gedik tepsu suk gato gedik-gedik ben ne.

Wahyu 22:12

Yefun Yesus ki do, ”Nin jammo suk gato Ji ki ré et, bergan sor ete Ji ma. Ji gwat suk mwa gato bere Ji syo nai nje tepsu suk gato án ben wa Ji re.

Wahyu 6:8

Ji sokme sa, kuda er kwosak ge dik yo ma. Ye gato it mo kuda ne gum do, Sukkwop. Ye gato gum do Gwinggri Syo boribot karowa Sukkwop. Ye we ne ku suktinggi wa gu yetu napyo kwop wé kadit bur ré. {Sato yetu ge wotin at yo, an we ku suktinggi wa an we gu ge wotin dik wé, wo ge wotin gri kem.} Ye we ré gwat os bok yo wa gu nje kwop su suk sato: yé gu yu e, sukonde sye gu nje kwop e, suki wis bok yo gu nje e, suge krok gu nje e ne.