Wahyu 17:14 - Abun Scripture

¹⁴ Án si suge doketke ne sino bere es yeko futma wa gu Domba Gan, sarewo Domba Gan ne bere nggi wai kadit yeraja si suge ne o re, we Domba Gan ne anato Yekwesu gato nggi wai kadit yekwesu mwa ne sino. Domba Gan anato yeraja gato nggi wai kadit yeraja mwa ne sino. Domba Gan si bi rus-i gato An nai wa simo An pe sor, bere nggi wai kadit yeraja bok ne si suge doketke ne o re.”

Wahyu 17:14 ပူးပေါင်းရင်းမြစ်များ

Matius 22:14

Kom mone sa, Yefun Yesus ki do, ”Yefun Allah kendo yé mwa neya sok mo An bi rus-i, sarewo ge bok yo sor re, ete Yefun nai sok mo An bi rus-i ne.”

Matius 25:40

Bere Ji, gato Yekwesu mone ki do, ’Suk gato Ji ki ré suksangge anare, suk gato nin ben wa Ji bi rus-i, kapre yé ne pa wokgan, tepsu nin ben suk ne wa Ji dakai.’

Matius 28:18

Orete Yefun Yesus ma karowa pakon ne, ete An ki do, ”Yefun Allah bes ji gum tepsu Yekwesu mo gu nim si bur ré sino.

Yohanes 15:16

Nin anato bes Ji gum Yekwesu wa nin nde, wo Ji anato bes nin gum pakon wa Ji. Ji bes nin, orete Ji syogat nin mu ben suk mwa gato ndo, tepsu kwebo bor mo kweguk. Ji syogat nin ben sukndo gato tepsu kwebo gato bere yo ibit nde, wo bo gato kem pe sor. Nin ben sukndo gato kem pe, sane bere suk to nin ndek mo Ji bi Ai, ete nin ki Ji gum mó yo, bere Ji bi Ai syo nai nin re.

Roma 1:6

Sane nin ye Roma dom sok mo yewis dik yo gato ji mu duno ne. Yefun Allah nai nin ma sok mo Yesus Kristus bi yetuge-i.

Roma 8:30

Sane Yefun Allah kendo ye gato An dakai fro suga nyim tuya ne. Ye gato Yefun Allah kendo sok mo An bi rus-i ré, Yefun Allah ki mo yé ne do, yé ne sa, tep wa Yefun nai yé ne gum sok mo An bi rus-i ne. Ye gato Yefun Allah nai gum sok mo bi rus-i yo, Yefun bes yé ne gum kok sye wai tepsu Yefun o re.

Roma 8:37

Sukye gato men ku ne yo nggi wai kadit men nde, we mo suk mwa ne sino, Yesus Kristus mewa men anato bere men nggi wai kadit sukye mwa neya re.

1 Korintus 15:24

Kristus satu ma mo bur ré, An sun An bi yetuge-i, orete bur kru it anane. Sugane yepasye mwa gato jom men yetu e, biris bi yekwesu gato ben men ket kwayo-kwayo e, yerom e, aboksye e ne bi suktinggi gato jom men e ne, bere Yefun Yesus nai suk mwa gane bi suktinggi wé kadit, subere suk mwa ne jammo Kristus sor. Orge Kristus syo suk mwa ne ma mo men bi Ai, Yefun Allah ne syim.

1 Timotius 6:15

Kam gato Yefun Yesus satu ma mo bur ré, Yefun Allah dakai fro re. Yefun Allah anato Yekwesu gato gum kok wai kadit yesu mwa ne o re. An sor ete jowa yé mwa mo bur ré or sino. An anato Yeraja gato nggi wai kadit yeraja mwa ne sino. An anato Yekwesu gato nggi wai kadit Yekwesu mwa ne sino.

2 Timotius 2:4

Yesukmise gato benbot án bi yekwesu bi sukdu it yo, án yo ben suk yi nde, wo án iwa án ben suk tepsu án bi yekwesu mit sor.

1 Petrus 2:9

Wo nin sa, Yefun Allah nai nin tepsu An dakai bi rus-i it. Nin anato tepsu yewis gato Yefun Allah bes tepsu yesu mo Yefun Allah bi nu wa nin ben suk wa Yefun gato gum kok wai o re. Nin anato yewis gato Yefun Allah fro tepsu An bi rus-i wa nin ben An bi suk-i sor. Yefun Allah kiwa nin mu kadit pe gato ndendu ma mo An bi pe gato rer ndo yé. Sane nin ki subot suk gato An ben ndo wai ne nai ye yi jam.

Wahyu 1:5

Yesus Kristus gato jam Yefun Allah sisu ndo, An ki bi sukdu-i subot Yefun Allah ri-roi petok sor. Yesus Kristus anato ye doketke gato Yefun Allah sun kadit sukkwop. Yesus Kristus anato jowa yeraja mwa ne sino mo bur ré. Yesus Kristus ete mewa nin. Yesus Kristus ete uttok nin petok sor. Yesus Kristus anato bi sukjimnut sye kas subot men ndo nde petok sor. Yesus Kristus anato kwop, An dé sye wa tot men bi suktot mo sukibit gato men ben ne wé.

Wahyu 11:7

Ye we kibot Yefun Allah bi suktaru ne or yo, bere suge krok gato sye ge dik yo it kadit kwoye sye mo bur desnak ete futma wa gu ye we ne. Suge ne bere nggi wai kadit ye we, ete gu ye we ne kwop re.

Wahyu 16:14

Malaikat ibit ge gri ne kadum bi suktinggi bor mo suk gato án ge gri ben anato yetu yeket. Malaikat ge gri ne mubot yesu mwa mo bur ré iwedewe subere án ge gri ne sum yesu mwa ne sino wa gu yu tepsu kam sye gato Yefun Allah fro ne. Su kam sye ne, Yefun Allah gato nggi wai ne bere ndobot yetu mwa ne sino re.

Wahyu 2:10

Bere nin ku sukye, wo nin nyuwa nde. Ji ki sare do, bere biris bi yekwesu ben yetu ge bok yo but nin ge bok yo, ete sok nin mo sel. Sane bere biris bi yekwesu gato ben sukibit ne werwa gwat os wa nin subere nin misyar Yefun mone. Mo sel mit ne bere nin ku sukye sor kom mo kam musyu dik rek. Kapre karowa nin kwop rok mone, nin onyar kem mo Ji, nin ben Ji bi suk-i sane sor kom mo pe gato or mó yo, bere Ji bi os wa nin kem ndo to kapyo mato kapyo, tepsu ye gato nggi wai ku hadiah mo koirut.

Wahyu 2:13

Ji jam do, nin kem mo nat gato biris bi yekwesu kem mone. Nin da kem mone, sarewo nin onyar kem pe mo Ji, nin yo misyar Ji nde. Antipas gato ben Ji bi suk-i e, ki Ji bi sukdu-i ne petok sor, ye gu an kwop. Kapre ye gu an kwop wé mo nin gwem mo nin dakai bi kota, gato biris bi yekwesu kem mone, nin yo misyar Ji dom nde.

Wahyu 3:21

Yé gato nggi wai kadit bur ré bi suk-i yo, bere Ji bes án gum kok. Bere án gum kok tep wa án si Ji tepsu yekwesu. Bere Ji ki nai yé ne do, ”Nin ma, nin sisu Ji kem kok mo Ji bi nat ré, men anato gum Yekwesu sino.” Ji anato nggi wai kadit bur ré bi suk-i, anato Ji si Ji bi Ai kem kok mo An bi nat-i re.