Wahyu 1:1 - Abun Scripture

¹ Sukdu mo buku ré anato sukdu gato Yesus Kristus kadum rer nai Yohanes subot suk gato bere men yetu me bor su kam sari ne ma. Yefun Allah kadum suk bok ne nyim nai Yesus Kristus, subere Yesus Kristus waii kadum rer nai Yefun Allah bi pakwerut mwa ne sino jam. Yo nam nde ge, bere Yefun Allah ben suk bok ré bor re. Yesus Kristus syogat An bi malaikat ge dik yo mu ki sukdu subot suk gato bere bor ne rer nai An bi pakwerut gato gum do Yohanes.

Wahyu 1:1 ပူးပေါင်းရင်းမြစ်များ

Yohanes 12:49

Ji yo ki Ji bi sukdu-i tepsu Ji dakai bi sukjimnut-i nde, wo Ji ki Ji bi sukdu-i tepsu Ji bi Ai gato syogat Ji ma mo bur ré bi sukjimnut-i. An anato syogat Ji ki An bi suktaru nai nje jam.

Yohanes 15:15

Su ré Ji yo kendo nin gum pakwerut o nde, we pakwerut yo jam suk gato an bi yenggras ben ne nde. Wo Ji kendo nin tepsu Ji bi yesyim, we suk mwa ne sino gato Ji jam kadit Ji bi Ai ne Ji frot nai nin jam or re.

Yohanes 17:8

Sukdu gato Nan ki nai Ji, Ji waii ki nai án jam re, án iwa sukdu ne. Án jam do, sangge Ji anato ma kadit Nan, Ji bi Ai. Án jam do, sangge, Nan anato syogat Ji ma mo bur ré re.

Yohanes 3:32

An ki rer subot suk gato An me mo gu nim ne re. An ki rer subot suk gato an jam re, wo yé yo onyar kem mo suk gato An ki ne nde.

Yohanes 8:26

Bere Ji ki nin gum ibit mo suk mwa neya mone tó. Sarewo Ji yo ki kom mone nde, wo Ji ki sukdu gato Yefun Allah syogat Ji ki ne. Yefun Allah gato syogat Ji ma more, An ben An bi suk-i ri roi. Sane sukdu gato An tarubot Ji ne sor anato Ji frot nai yé mwa mo bur ré re.”

Roma 16:25

Men bes Yefun Allah gum kok et. Ji ki sukdu subot os ndo gato Yefun Allah fro wa men yetu, ji ki subot Yesus Kristus gato kak os ne, orete nin jammo sukdu ne. Sane Yefun Allah ós nin anato nin onyar kem mo Yefun nggi wai kadit nyim ne o re. Kadit nyim tuya kom more, Yefun yo kadum sukdu ne rer wa ye jam nde, Yefun gurik sukdu subot os ne re,

Galatia 1:12

Yetu yo ki sukdu ne nai ji jam dom nde. Yetu ge dik yo duno ji su dom nde, wo Yesus Kristus dakai kadum sukdu ne rer nai ji dakai jam.

Efesus 3:3

Suktaru gato Yefun Allah fro wa ji ki ne, An yo kadum rer wa yetu jam nde tó, An ki rer nai ji jam nyim wé re. (Ji krom subot suktaru ne napyo nai nin jam mó re.

Titus 1:1

Ji gato gum do Paulus anato krom surat ré wa nan, Titus, gato ji bi pa. Ji anato Yefun Allah bi pakwerut. Ji anato Yesus Kristus bi yerasul. Yefun Allah bes ji, ete syogat ji mu duno yé gato Yefun Allah fro suga nyim wa An nai sok mo An bi rus-i ne. Ji mu duno án subere án jam sukdu gato sangge, subere án onyar kem mo Yefun Allah, subere án ben Yefun bi suk-i.

Wahyu 1:19

Sane suk mwa ne sino gato nan sokme ne yo, nan krombot mo buku et. Nan krombot suk mwa gato nan sokme su ré sisu suk mwa gato bere bor mone tó.

Wahyu 1:9

Ji, gato gum do Yohanes anato tepsu nin bi nji mo Yefun Allah bi rus-i. Ji simo Yesus Kristus tepsu nin. Men sino bi Yekwesu mo Yesus Kristus. Men sino ku sukye tepsu yu. Kapre men ku sukye o, men yo misyar Yefun nde, men simo An pe sor. Ji ki sukdu subot os ndo gato Yefun Allah fro ne. Ji ki subot suk gato Yesus Kristus ben wa kak os ne, sane anato yé but ji, ete yé gwat ji mu yé grem kem mo ef Patmos.

Wahyu 17:1

Malaikat ge dik kadit malaikat ge mufit gato jom mbem mufit ne ma ki nai ji do, ”Nan ma me nggon pasye gato ben siri mwa wai o re. Bere ji kadum sukye gato nggon ne ku nai nan me. Nggon ne tepsu kota sye gato ye nggo mo syur bok yo de.

Wahyu 19:10

Ji jam sukdu ne sa, ji bare ji nggwa mo malaikat gwem wa ji bes malaikat ne gum kok, sarewo malaikat ki nai ji do, ”Nan bes ji gum kok nde. Ji si nan tepsu yu, men ka we Yefun Allah bi pakwerut sino. Men ka we si nan bi nji mo Yefun bi rus-i, gato jom Yefun Yesus bi sukdu-i ne pe, men sino tepsu Yefun Allah bi pakwerut. Sane nan bes ji gum kok nde, wo nan bes Yefun Allah gum kok sor re.” We sare, ye gato jom Yefun Yesus bi sukdu-i ne bere Yefun syo suktinggi nai ye ne, subere ye ne nggiwa kibot Yefun Allah bi suktaru-i rer nai ye yi jam.

Wahyu 19:9

Orete malaikat ne ki nai ji do, ”Nan krom sukdu gato ji ki ré et: Ye gato ye kendo ma simo Domba Gan bi sukra gato ye konwa ne, ye ne sa, mit at wa.” Orete malaikat ne ki o do, ”Sukdu gato ji ki ne, Yefun Allah bi sukdu gato sangge anane.”

Wahyu 21:2

Ji sokme Yefun Allah bi kota, Yerusalem be is kadit Yefun Allah mo gu ma bur. Kota ne fro sisu ndo re, tepsu nggon mbrau nggwa ne kur mek wa kra su bi ya.

Wahyu 21:9

Malaikat ge dik yo ma kadit malaikat ge mufit gato jom mbem su sukye mufit wari ne ma ku ji ete ki do, ”Nan ma, bere ji kadum nggon gato ye fro wa kra Domba Gan ne nai nan me et.”

Wahyu 22:1

Orete malaikat ne kadum syur gato ben yé mbau ne nai ji me dom. Syur ne rer tepsu kaca. Syur ne syé kadit Yefun Allah si Domba Gan bi kursi sye ne.

Wahyu 22:16

”Ji, gato gum do Yesus, Ji anato syogat Ji bi malaikat ma wa kibot sukdu mwa mo buku ré wa ye gato onyar kem mo Ji mo nu ari mo bur ré jam re. Ji anato yeraja Daud bi dat. Ji anato kak os ndo wa yetu tepsu bí ik gato it ben sato kak os wa nombrak ne ma.”

Wahyu 22:6

Orete malaikat ne ki nai ji do, ”Sukdu gato ji ki ré sangge, sukdu ne tep wa yé onyar kem mó. Men bi Yekwesu Yefun Allah gato bok An Gen mo yenabi anato syogat An bi malaikat ma kadum suk gato bere bor nai An bi pakwerut mwa ne jam et.”

Wahyu 22:8

Ji gato gum do Yohanes jam ete sokme suk mwa gato ji krom more re. Ji jam ete ji sokme suk mwa ne or sa, ji bare ji nggwa mo malaikat gato kadum suk mwa nai ji ne gwem. Ji bare ji nggwa wa ji bes malaikat ne gum kok,

Wahyu 22:9

sarewo malaikat ne ki nai ji do, ”Nan bes ji gum kok nde. Ji si nan tepsu Yefun Allah bi pakwerut sino. Men ka we si nan bi nji, gato yenabi bok ne si yé mwa ne sino gato jammo sukdu mo buku ré, men sino tepsu Yefun Allah bi pakwerut. Sane nan bes ji gum kok nde, wo nan bes Yefun Allah gum kok sor re.”

Wahyu 4:1

Sukdu wa yé gato onyar kem mo Yefun Yesus mo nu ari bok ne, ji jam or sa, ben sato ji semda ete ji sokme nusyo mo gu kak re. Ye gato ji jam ki suk su ketke, gato saiye tepsu ye fuf dut, tepsu trompet ne, an ki do, ”Nan ma more et. Ji kadum suk gato bere bor wari wa nan jam.”

Wahyu 5:7

Domba Gan ne ma mo Yefun Allah gato kem mo An bi kursi ete nai buku gane kadit Yefun Allah syim ge.