Matius 6:4 - Abun Scripture

⁴ Nin syo suk nai ye gato yewa suk yo, nin ben sane subere yo bor wa ye yi jam nde. Sane bere nin bi Ai mo gu sor ete jam suk gato nin ben ne, ete bere An syo suk gato ndo nai nin mone.”

Matius 6:4 ပူးပေါင်းရင်းမြစ်များ

Matius 10:42

Sane dom, bere ye to syo syur dek nai Ji bi pakon wa pa da, kapre pa ne tepsu ye gato onyar kem mo Ji sim, Ji ki sare do, sangge sor, bere Yefun Allah syo suk gato ndo nai an mo suk gato an ben ne.”

Matius 6:18

subere yé yi jam nde nin mewa nin nggwa kadit nin git sugit yei wa nin ki suk su Yefun. Nin ben sane subere nin bi Ai mo gu sor ete jam. Nin bi Ai ne, nin yo me su nin gro nde, wo nin bi Ai sor ete jam suk gato nin ben ne, ete bere An syo sukndo nai nin mone.”

Matius 6:3

Sarewo nin ós ye gato yewa suk it yo, nin ós, nin gurik suk gato nin syo nai ye ne subere bor wa ye yi me nde, ge dik yo jam dom nde.

Matius 6:6

Nin ben saga án ben ne nde, wo nin benadi yo, nin sok mo nin bi gumwak, nin syimwa nusyo, ete nin ki suk su nin bi Ai mo gu, gato nin yo me su nin gro nde. Sane bere nin bi Ai mo gu sor ete jam suk gato nin ki ne, ete bere An syo sukndo nai nin mone.

Lukas 14:14

Nan do kendo ye ga sane ma it yo, bere Yefun Allah ben sukndo su nan. Ye gato nan kendo ma ne, yé ne bi os wa án ben sukndo satu yo mo nde. Wo Yefun Allah sa, bere ben sukndo satu nai nan. Su kam gato Yefun sun yé gato ben sukndo tepsu An mit ne mbau satu kadit sukkwop, su kam gane Yefun Allah ben sukndo su nan.”

Lukas 8:17

Yefun Allah jam suk mwa ne sino, sane suk gato yé gurik su ré, ri ma bere bor wa yé mwa jam rer, suk gato ye dumik wa yu waré, bere yé mwa jam or re.

1 Korintus 4:5

Sane su ré yo, men ki ye yi gum ibit mo suk yo daret nde. Kam gato men ki ye yi gum ibit anare nde tó, wo men eswa men bi Yekwesu Yefun Yesus ma mo bur ré, ete Yefun dakai kibot men yetu mwa ne. Bere Yefun Yesus rek suk mwa gato men gurik mo pe gato ndendu kadit yu ne bor wa yé mwa jam. Bere Yefun Yesus rek yé mwa ne sino bi sukjimnut-i ne bor wa yé mwa jam dom. Sane, sugane Yefun Allah un men yé gato ben sukndo mo suk gato men ben ne.

Ibrani 4:13

Men yo ku os wa gurik suk yo kadit Yefun Allah mo nde, sukwokgan yo dom nde. Yefun jam suk mwa ne o re. Suk mwa ne sino gato Yefun Allah ut ne, suk yo kewa nde, An me suk mwa ne dakai bor yi sor. Men yo ku os wa gurik suk gato men ben ne nde, sane bere men ki subot suk gato men ben ne rer nai Yefun Allah gato ndobot men su kam sari ne ma sor.

Yudas 1:24

Yesus Kristus ete nggiwa mewa nin kadit nin ges mo os ibit. An ete nggiwa gwat nin ma kem mo Yefun Allah gato gum kok ne gwem. Mo An bi nat-i gato ndo wai ne sukibit yo ut mo nin o nde, bere nin mit at wa sor.

Wahyu 2:23

Yé bok ne sino gato simo nggon ne, bere Ji gu kwop wé. Ji gu yé bok ne kwop wé, subere yé gato onyar kem mo Yefun Yesus mo nu ari mwa ne sino jam do, Ji anato jam kadik-kadik bi sukjimnut-i kom mo mit re. Yé bok ne yo ku os wa gurik sukibit gato án ben ne nde. Bere Ji ben sukye nai kadik-kadik tepsu sukibit gato án ben ne.