Matius 5:12 - Abun Scripture

¹² Suga nyim tuya yenabi ku sukye saga nin ku re. Wo nin wi, nin ambre, we Yefun fro suk gato ndo wa nin mo gu nim ne re.”

Matius 5:12 ပူးပေါင်းရင်းမြစ်များ

Matius 16:27

We sare, Ji, gato Yetu bi Pa, bere Ji si Ji bi malaikat si Ji bi Ai bi suktinggi ne ma, ete syo suk gato ndo nai nje tepsu sukndo gato án ben ne.

Matius 6:16

”Nin mewa nin nggwa kadit nin git sugit yei yo, nin ben nin gwem ibit saga ye gato kidar do, an onyar kem mo Yefun, sarewo an mit tara ne nde. Ye ne misyar an kaim subere yé mwa jam do, an mewa an nggwa kadit sugit yei wa an ki suk su Yefun. Suk gato Ji ki ré suksangge anare, yetu bes ye ne gum kok mone sor re, wo bere Yefun yo syo suk yo nai an o nde.

Lukas 13:34

Yefun Yesus ki do, ”Kamapa! Nin yé gato kem mo kota Yerusalem, nin gu yenabi kwop, nin am ye gato gwat Yefun Allah bi suktaru ma ne su jok. Kapre nin gu yenabi kwop sane o, Ji iwa Ji mewa nin tepsu ndam kokor mewa bi gan mo i desnak, sarewo nin bariwa re.

Lukas 6:23

Suga nyim tuya nin bi amui ben sukye nai yenabi saga bere nin ku ne dom. Sane yé do ben sukye sane nai nin it yo, sugane, nin wi nin ambre, we Yefun fro suk mwa gato ndo wa nin mo gu nim re.

Lukas 6:35

Nin ben sukndo su ye gato ben sukndo su nin sor nde, wo nin jimnotku yeko gato ma wa gu nin, nin ben sukndo su ye gato bariwa nin ne dom et. Nin syo suk nai ye gato ndek suk mo nin sor. Bere ye ne syo suk ne satu o bado, yo syo nde yo, nin nutbot o nde. Sane, nin do ben sukndo su ye gato ben sukibit nai nin sane it yo, bere Yefun Allah syo suk mwa gato ndo nai nin, bere suk gato nin ben ne kadum do, nin anato Yefun Allah gato gum kok sye wai ne bi pá-i. Nin ben nin bi suk-i tepsu Yefun Allah ben ne, we Yefun Allah ben sukndo su ye gato ben sukibit si ye gato misyar An dom.

Suk Gato Yerasul Ben Ne 16:25

Noru miten, Paulus si Silas ki suk su Yefun, an we kos sukos un Yefun Allah dom. Ye yi gato yé bok mo penjara ne dom jam ye we ne kos.

Suk Gato Yerasul Ben Ne 5:41

Yerasul ne mu kadit yepasye mwa ne, án mit at, we án jam do, Yefun Allah nut do, án sa, gum kok tep wa án ku sukye kadit yepasye ne mo sukdu gato án ki subot Yefun Yesus.

Roma 5:3

Men mit at mone sor nde, wo men mit at mo sukye gato men ku ne dom, we men jam do, sukye gato men ku ne, bere ben men nggiwa ben suk gato ndo pe sor, men yo sombok kadit suk gato men ben ne nde.

1 Korintus 3:8

Ye gato jan suk si ye gato sye syur wa ne, an we bi sukjimnut tepsu yu, an we ne iwa sukjan ne kom. Bere Yefun Allah syo suk gato ndo nai án tepsu án bi kamba mone.

2 Korintus 4:17

Sukye wokgan gato men ku su ré, su kam sari ne ma bere kak os wa gwat men mu kem mo pe gato gesyos gato ndo wai o re. Sane men kem mo bur ré yo, men nut do, sukye gato men ku ne, suk yo nde, we bere men kem gesyos mone tó.

Filipi 1:29

Nin jam do, Yefun Allah ós nin kem ndo, we Yefun Allah syo An bi suktinggi nai nin subere ós nin onyar kem mo Yesus Kristus sor nde, wo An syo An bi suktinggi nai nin subere nin nggi wai kadit sukye gato nin ku ne.

Filipi 2:17

Nin onyar kem mo Yefun Allah it. Nin bi nin nggwa mo An, nin samok wa nin ben An bi suk-i. Suk mwa gato nin ben ne anato tepsu suksom gato nin gwat wa som Yefun Allah su ne. Sane ji mit at mo suk mwa gato nin ben ne. Yé bok ji mo sel ré mo gato ji ki subot Kristus. Sarewo yé do gu ji kwop it yo, ji mit at tó, we ji do kwop it yo, ben sato ji waii grem suk yo tó suk mwa gato nin gwat wa som Yefun Allah su ne.

Kolose 1:24

Su ré ji mit at mo sukye gato ji ku wa nin, we sukye gato Kristus ku ne anato ji waii ku nap ta ré. Kristus ku sukye nap sye wa bi rus-i or re. Or o ji waii ku sukye ne napta wa yé mwa gato onyar kem mo Kristus, yé mwa ne tepsu Kristus kaim.

Kolose 3:24

we nin jam wa pe do, bere nin bi Yekwesu, Kristus, syo suk nai nin mo nin bi kamba mo suk gato nin ben ne. Suk gato Yefun frowa An syo nai An bi rus-i ne, bere nin ku mone tó. Nin nut do, nin bi yenggras gato nin ben suk wa ne anato Kristus.

1 Tesalonika 2:15

Ye Yahudi deyo anato gu men bi Yekwesu Yefun Yesus ne si yenabi bok yo kwop re. Ye Yahudi ne ben sukye nai men, án syun men kadit pe ne. Án ben sukibit su yetu mwa ne sino. Yefun Allah yo iwa án nde.

Ibrani 10:34

Nin nutbot yé gato yé bok mo sel ndo nde, nin baoku yé mo sel ne ndo nde. Kapre yé nai nin bi suk mwa kadit nin o, nin yo maskwa nde, wo nin iwa, nin mit at wa sor, we nin jam do, nin bi suk mwa gato ndo wai mó re. Suk mwa ne anato tepsu suk mwa gato Yefun Allah tom su nin. Suk ne kem ndo to kapyo mato kapyo, ye yo ku os wa nai suk gato Yefun Allah fro wa nin ne wé kadit nin nde.

Ibrani 11:26

Musa nut do, ye kabor an gum mo sukndo gato an ben anato ndo wai kadit an ku suk mwa mo bur Mesir ne sino, we an bi sukjimnut kas ko kom mo os ndo gato kam sari ne ma bere Kristus kak ne. An bi sukjimnut kas ko kom mo sukndo gato bere an ku mo Yefun bi nat-i.

Ibrani 11:33

Yé bok ne onyar kem mo Yefun Allah, sane anato yé bok ne nggiwa nai yeraja bok yo bi bur det kadit yeraja ne re. Yé bok ne onyar kem mo Yefun Allah, sane anato án syo sukye nai ye gato ben sukibit ne sor, án ku suk gato Yefun Allah tom su án ne. Yé bok ne onyar kem mo Yefun Allah, sane anato Yefun Allah ben án nggiwa án ben suk sato ré: án nggiwa jom suge sye gato gum do singa ne syokwet krat.

Ibrani 11:6

Ye gato yo onyar kem mo Yefun Allah nde tó yo, bere ye ne yo ku os wa ben suk tepsu Yefun Allah mit nde. We, ye gato ma mo Yefun Allah it yo, an onyar kem mo sukdu sare do, Yefun Allah ne sa, mó re, ete Yefun ben sukndo su ye gato meret An.

Yakobus 1:2

Ji bi nji, ji bi nyanggon, kapre men ku sukye ket kwayo-kwayo, men nut mo men mit do, suk ne ndo wa men sor,

Yakobus 5:10

Ji bi nji, ji bi nyanggon, men nutbot suk gato yenabi ben ne. Án kadum os wa men mo sukye gato án ku ne. Án do ku sukye it yo, án eswa sane sor sukye ne or kadit án, án yo misyar Yefun Allah nde, wo án ki sukdu gato Yefun tarubot án petok sor.

1 Petrus 4:13

Nin nutbot sukye ne teker eta nde, wo nin mit at wa sor, we ben sato nin si Kristus ku sukye ne sino. Sane bere su kam gato Kristus kadum An bi suktinggi bor mo bur ré, nin mit at wa wai o re.