Matius 3:2 - Abun Scripture

² An ki do, ”Yefun Allah ma jowa nin tepsu nin bi Yekwesu it anare! Sane nin kwet kadit sukibit gato nin ben ne, nin jammo Yefun Allah et.”

Matius 3:2 ပူးပေါင်းရင်းမြစ်များ

Matius 10:7

Nin mu yo, nin kibot Ji bi sukdu do, ’Yefun Allah ma jowa men tepsu men bi Yekwesu it anare!’

Matius 11:20

Orete Yefun Yesus kiket nje mo kota gato An ben suk mwa gato ben nje yeket mone, sarewo yé ne yo kwet kadit sukibit gato yé ben ne nde, ete án yo jammo Yefun nde.

Matius 12:41

Su kam gato bere Yefun Allah ndobot yetu mwa ne sino, bere ye Niniwe si nin sun sino ete ki nin gum ibit, we án jam Yunus bi sukdu-i sa, án brek kadit os ibit ete án jammo Yefun re. Ji gum-i kok sye wai kadit Yunus gum-i ne, sarewo nin yo jammo Ji bi sukdu nde.

Matius 13:11

Yefun Yesus ki do, ”Sukdu gato Yefun Allah gurik suga nyim subot os ndo gato bere Yefun Allah fro wa yetu sok mo An bi rus-i ne, Yefun Allah tarubot Ji, subere Ji ki rer wa nin dakai jam kom mo mit, sarewo ye yi neya yo jam sukdu ne rer kom mo mit nde tó.

Matius 13:24

Yefun Yesus gwat sukamno dik yo o do, ”Yefun Allah nai yetu sok mo An bi rus-i ne yo, bere Yefun ben suk tepsu yenggras dik yo gato am mbet gro gato ndo mo bi nggwe.

Matius 13:31

Yefun Yesus gwat sukamno dik yo o do, ”Yefun Allah jowa men yetu tepsu men bi Yekwesu yo, bere tepsu sukamno ré: Yetu ge dik yo nai kwe nam gro dik yo ete jan mo bi nggwe.

Matius 13:33

Yefun Yesus gwat sukamno dik yo o, An ki nai yé mwa mone do, ”Yefun Allah jowa men yetu tepsu men bi Yekwesu yo, bere tepsu sukamno ré, nggon ge dik yo nai bibit roti wokgan ete karwet su tepung sak dik sane sor, tepung mwa ne it sino.”

Matius 13:47

”Sane dom, Yefun Allah nai yetu sok mo An bi rus-i ne yo, bere tepsu sukamno ré: Yé bok yo gato sok boge bare án bi mwi mo em, ete án but boge wis mwa su mwi.

Matius 13:52

Sane Yefun Yesus ki nai án do, ”Sane yeguru agama mwa ne sino gato gum sok mo Yefun Allah bi rus-i ne anato jam Musa bi sukduno-i si sukduno be gato Ji gwat ma ne, ete yeguru duno nje su, tepsu yenggras mo nu dik yo gwat sukrok si sukbe kadit an bi gudang ma nden.”

Matius 18:23

Sane Yefun Allah ben suk su ye gato Yefun Allah nai sok mo An bi rus-i tepsu yepasye mo sukamno ré: kam dik yo yepasye ge dik yo watbot an bi pakwerut bi bon, ete yenggras ne kendo bi pakwerut ne ma wa bi bon ne satu.

Matius 20:1

”Yefun Allah nai yetu sok mo An bi rus-i ne yo, bere tepsu sukamno ré. Su nyotkwo gan, yetu ge dik yo gato bi nggwe anggur mu kendo yé bok yo ma wa ben suk mo an bi nggwe ne.

Matius 22:2

”Yefun Allah nai yetu sok mo An bi rus-i ne yo, bere tepsu yeraja gato konwa sukra wa an bi gan.

Matius 23:13

”Nin yeguru agama, bere nin ku sukye. Nin ye Farisi, bere nin ku sukye. Nin ki suk su nin syokwet sor re. Ben sato nin syimwa nusyo subere ye yo ku os wa sok mo Yefun Allah bi rus-i nde. Nin yo sok nde, or o nin ben sukye yawa os wa ye gato iwa sok mone dom. [

Matius 25:1

”Su kam gato bere Yetu bi Pa ma tepsu men bi Yekwesu, bere yé ben suk mo bur ré tepsu sukamno ré: nggonnak ge musyu dik gwat án bi sukru ete mu sakanwa yebris gato bere kra.

Matius 25:14

”Yefun Allah ben suk su yetu gato An nai sok mo An bi rus-i tepsu yenggras mo sukamno ré: yenggras dik yo mu mo pe yi yo nde tó, an kendo an bi pakwerut ne ma, ete an bes pa ne sino wa mewa an bi suk.

Matius 4:17

Kadit kam gato Yefun Yesus mu kem mo kota Kapernaum An duno nje mone do, ”Yefun Allah ma jowa nin tepsu nin bi Yekwesu it anare! Sane nin kwet kadit sukibit gato nin ben ne, ete nin jammo Yefun et.”

Matius 4:23

Yefun Yesus mubot bur Galilea. Yefun duno nje mo ye Yahudi bi nu ari mo kampung bok yo mone. Yefun Yesus ki sukdu subot os ndo gato Yefun Allah fro wa nai men yetu gum sok mo An bi rus-i, ete An tepsu men bi Yekwesu mone. Sane dom, Yefun Yesus ben nje gato i ne ge kadit suki wisyo-wisyo.

Matius 5:10

Ye gato ku sukye mo sukndo gato an ben tepsu Yefun Allah mit ne, ye ne mit at wa, we Yefun Allah anato an bi Yekwesu gato mewa an.

Matius 5:3

”Ye gato jam do, an yo nggi mo Yefun Allah bi de-i nde, sarewo an jom Yefun si bi sukdu-i tó yo, ye ne mit at wa, we Yefun Allah anato an bi Yekwesu gato mewa an.

Matius 6:10

Nan ma tepsu Yekwesu wa jowa men yetu ete ndo, Men yetu sino mo bur ré, men ben suk tepsu Nan mit saga yé ben mo gu nim ne ete ndo.

Matius 6:33

Sane, nin bi sukjimnut sye mo suk mwa ne nde, wo nin werwa subere nin bi sukjimnut sye wa nin jammo Yefun Allah tepsu nin bi Yekwesu, ete nin ben sukndo tepsu Yefun mit sor. Sane bere Yefun syo suk mwa gato nin mitmo ne nai nin dom re.

Markus 1:15

Yefun Yesus ki nai nje mone do, ”Yefun Allah ma jowa nin tepsu nin bi Yekwesu it anare! Sane nin kwet kadit sukibit gato nin ben ne, ete nin onyar kem mo sukdu subot os ndo gato Yefun Allah fro wa nin ne et.”

Markus 1:4

Sane Yohanes ma, Yohanes anato fro os gane. Yohanes kem mo pe gato kwe yo kom mo nde. An ras nje mo syur, an kibot Yefun Allah bi suktaru. An ki nai nje gato ma mo an do, ”Nin kwet kadit sukibit gato nin ben ne, nin jammo Yefun, ete nin ma wa ji ras nin mo syur subere Yefun Allah yo maskwa nin mo sukibit gato nin ben ne o nde, tepsu An tot sukibit ne wé kadit nin re.”

Markus 6:12

Sane Yefun Yesus bi pakon mu, ete duno nje subere yé kwet kadit sukibit gato yé ben ne, ete yé brek ma jammo Yefun.

Lukas 1:16

Pa ne sye yo, bere pa kar ye Israel mwa satu kadit os ibit ma, ete jammo Yefun Allah, Ye gato gesyos, án bi Yekwesu ne.

Lukas 11:20

Ji syun semda su Beelzebul bi suktinggi nde, wo Yefun Allah anato ben Ji nggiwa Ji syun semda, sane anato nin jam do, Yefun Allah bi suktinggi tepsu Yekwesu gato nggi wai bor it anare. Yefun Allah ma jowa yetu mo bur ré it.

Lukas 13:3

Sane nde re. Ji ki sare do, nin yo kwet kadit sukibit gato nin ben ne nde, bere nin waii kwop sato yé ne dom.

Lukas 13:5

Sane nde re. Ji ki sare do, nin yo kwet kadit sukibit gato nin ben ne nde, bere nin waii kwop sato yé ne dom.”

Lukas 15:10

Sane dom yetu ge dik yo do kwet kadit sukibit gato an ben ne, ete an brek ma jammo Yefun it yo, Yefun Allah bi malaikat mwa ne mit at wa wai o re. Sangge!”

Lukas 15:7

Sane dom yetu ge dik yo kwet kadit sukibit gato an ben ne, ete an brek ma jammo Yefun it yo, bere Yefun Allah mo gu mit at wa yetu ge dik ne wai kadit yetu ge musyu musi sop musi gato ben sukndo tepsu Yefun mit, ye gato kwet suga nyim ne wé re.”

Lukas 16:30

Sarewo yepasye ki do, ”Yenggras Abraham, sukduno ne yo tep nde re. Wo yekwop dik yo do sun ete mu ki nai ji bi nji yo, bere án kwet kadit sukibit gato án ben ne sino, ete án jammo Yefun.”

Lukas 21:31

Sane dom, nin me suk mwa gato Ji kibot gare bor it yo, nin jam do, bergan sor ete Yefun Allah ma wa An jowa yetu mo bur ré tepsu yetu bi Yekwesu it anane.

Lukas 24:47

Bere yé mu kibot suk gato Kristus ben ne nai yewis mwa mo bur ré sino jam. Bere yé ki do, ’Nin onyar kem mo Yekwesu gato Yefun Allah syogat ma mo bur ré et! Nin onyar kem mo An eteyo, nin kwet kadit sukibit gato nin ben ne, ete nin jammo An yo, bere Yefun Allah yo maskwa nin mo sukibit mwa gato nin ben ne o nde, tepsu An tot sukibit ne wé kadit nin re.’ Bere yé ki sukdu ne frekbot bur ré iwedewe, yé ki nai nje mo kota Yerusalem jam nyim, orete yé ki nai yewis mwa ne mo bur ré or sino jam re.

Lukas 6:20

Yefun Yesus sokwa An bi pakon, orete An ki do, ”Nin yé gato yewa suk, nin mit at wa, we Yefun Allah anato nin bi Yekwesu gato mewa nin.

Lukas 9:2

Yefun Yesus syo suktinggi nai An bi pakon ne, orete Yefun Yesus syogat An bi pakon mu ki sukdu subot os ndo gato Yefun Allah fro wa men yetu subere Yefun Allah nai men gum sok mo An bi rus-i, ete An tepsu men bi Yekwesu mone. Yefun Yesus syogat An bi pakon mu ki sukdu ne sor nde, wo pakon ne mu ben ye gato i ne ge kadit án bi suki ne dom.

Suk Gato Yerasul Ben Ne 11:18

Petrus nuk subot sukdu ne, yé mwa mone jam or sa, yé duwer Petrus mone o nde. Yé un Yefun Allah, yé ki do, ”Ré yo, Yefun Allah kak os wa men ye Yahudi sok mo An bi rus-i sor nde, wo An kak os wa yewis yi sok mo An bi rus-i ne dom. Yefun Allah kak os wa yewis yi ne kwet kadit os ibit, ete kem ndo to kapyo mato kapyo.”

Suk Gato Yerasul Ben Ne 17:30

Suga nyim tuya Yefun Allah misyar men yetu ben suk ket men jam nde sane, wo ré yo, An syogat men yetu mo bur ré iwedewe kwet kadit sukibit gato men ben ne, ete men jammo An.

Suk Gato Yerasul Ben Ne 2:38

Petrus ki do, ”Nin kadik-kadik nai sukjimnut do, nin kwet kadit sukibit gato nin ben ne, ete nin jammo Yefun et. Orete nin ma, nin bi nggwa wa men ras nin kadik-kadik mo syur sisu Yesus Kristus gum, tepsu nin gum sok mo Yesus Kristus bi nje-i mone it. Sane bere Yefun Allah yo maskwa nin mo sukibit mwa gato nin ben ne o nde, wo An tot sukibit ne wé kadit nin re. Orete Yefun Allah syo An Gen bok nggwa mo nin.

Suk Gato Yerasul Ben Ne 20:21

Ji duno nin ye Yahudi si nin yewis yi ne sino, subere nin kwet kadit os ibit, ete nin jammo Yefun Yesus. Ji duno nin, subere nin brek kadit os nyim, ete nin simo os be gato men bi Yekwesu Yesus Kristus kak ne, subere nin onyar kem mo Yefun Yesus it.

Suk Gato Yerasul Ben Ne 26:20

Sane ji mu ki sukdu subot Yefun Yesus. Su ketke ji ki sukdu ne mo ye Yahudi mo kota Damsyik, or ji mu ki sukdu ne mo kota Yerusalem o, orete ji mubot bur Yudea ne sino. Ji ki sukdu subot Yefun Yesus nai yewis yi dom. Ji ki sukdu sare do, ’Nin kwet kadit sukibit gato nin ben ne. Nin brek kadit os ibit, ete nin simo Yefun Allah bi os-i gato ndo. Nin ki su nin syokwet sor nde, wo nin ben sukndo tepsu ye gato kwet, subere yé jam do, nin kwet it.’

Suk Gato Yerasul Ben Ne 3:19

Sane nin kwet, nin brek kadit os ibit, ete nin jammo Yefun Allah et. Nin kwet subere Yefun Allah yo maskwa nin mo sukibit gato nin ben ne o nde, wo ben sato Yefun rus sukibit gato nin ben ne wé re.

2 Korintus 7:10

Sane men nderku nggwa digane anato kak men bi sukjimnut mo Yefun bi os-i o re, ete kadit ne o, men kem ndo to kapyo mato kapyo. Sane men yo nut subot sukibit gato ben men nderku nggwa mone o nde. Sarewo men nderku men nggwa tepsu yetu gato jam nde Yefun ben ne sane sor, yo or mo nde yo, kom mo rut sa, bere men bi sukjimnut ibit mone, ete kadit ne, men ges mo bot gesyos o re.

Kolose 1:13

Yefun Allah nai men wé kadit biris bi yekwesu gato jom men ne. Yefun nai men wé kadit ndendu bi os-i ete An nai men gum sok mo An bi Gan bi rus-i ne it. Sane An bi Gan gato An jimnotku ne jom men mone re.

2 Timotius 2:25

Men duno nje gato duwer men it yo, men duno sisu njep sor. Men duno sisu njep, we men iwa kapyo tak Yefun Allah kak ye ne bi sukjimnut subere an kwet kadit os ibit, ete an jammo sukdu gato sangge.

Ibrani 6:1

Sane it yo, men yo krom sukdu subot Yesus Kristus mo i-ke ne o nde yei. Sukdu gato ndaf mo i-ke ne tep wa ye gato jam Yefun sim, tepsu pabom da sus rom sim, wo ré ne, men ki subot sukdu gato kru o et. Men krombot sukdu kru gato tep wa yenggras mo Yefun Allah bi sukdu-i ne et. Men krombot sukdu gato ndaf mo i-ke ne o nde yei, sukdu bok gato mo i-ke, men kibot mó re, sato ré do, men kwet kadit sukibit gato men ben ne, ete men ben suk tepsu ye gato onyar kem mo Yefun Allah ne sor.

2 Petrus 3:9

Yetu ge bok yo nut do, suk gato Yefun Allah tom ne, An yo benbot kekro nde. Sarewo Yefun yo ben bi suk-i yó nde, wo An yo ma kekro nde, we An eswa men yetu kwet kadit sukibit gato men ben ne, ete men jammo An. An bariwa men yetu ge dik yo ges mo bot gesyos dom nde.

Wahyu 2:21

Ji kewa nggon ne kwet kadit os ibit gato mom gwat ne ware, mom bari re, wo mom da bro wa yebris pe sor.

Wahyu 2:5

Sane nin napawa ketke nin bi sukjimnut sye kas subot Ji, wo su ré nin yo bi sukjimnut sye kas subot Ji sane o nde. Ré yo, nin brek satu ma et, nin kwet, ete nin bi sukjimnut sye kas subot Ji tepsu ketke ne satu o et. Nin yo kwet nde yo, bere Ji ma nai nin bi sukru ne wé kadit bi nat-i re.