Lukas 9:20 - Abun Scripture

²⁰ Sane Yefun Yesus ndo mo An bi pakon do, ”Wo nin dakai, nin nutbot Ji sa u ne?” Petrus ki do, ”Nan anato Yekwesu, gato Yefun Allah bes gum Kristus, gato Yefun Allah syogat ma mo bur ré wa nai men yetu kadit sukye ete jowa men.”

Lukas 9:20 ပူးပေါင်းရင်းမြစ်များ

Matius 22:42

”Nin nutbot Yekwesu gato Yefun Allah syogat ma mo bur ré wa ós yetu ne sa u ne? Ye ne tepsu je u bi dat ne?” Ye Farisi ki do, ”An anato Daud bi Dat.”

Matius 26:63

Sarewo Yefun Yesus not sor. Yekwesu ne ki nai Yefun Yesus o do, ”Ji syogat Nan ki suk gato sangge tepsu Nan ki mo Yefun Allah gato gesyos ne gwem. Nan ki rer nai men jam et, Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men, bado? Te nan anato Yefun Allah bi Gan ne bado?”

Matius 5:47

Sane dom, nin mu ki ndo mo nin bi yesyim sor re, nin ben suk sato suma anato ndo mone ne? Ye gato jam nde Yefun ben suk sane dom.

Markus 14:61

Sarewo Yefun Yesus not sor, An yo du wokgan dom nde. Orete yekwesu ne ki nai Yefun Yesus o do, ”Te Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men bado? Te Nan anato Yefun Allah gato men bes gum kok sye wai ne bi Gan bado?”

Markus 8:29

Sane Yefun Yesus ndo mo An bi pakon do, ”Wo nin dakai, nin nutbot Ji sa u ne?” Petrus ki do, ”Nan anato Yekwesu gato Yefun Allah bes gum Kristus, gato Yefun Allah syogat ma mo bur ré wa nai men yetu kadit sukye ete jowa men.”

Lukas 22:67

Yepasye ne ki nai Yefun Yesus do, ”Nan anato tepsu Yekwesu gato Yefun Allah syogat ma mo bur ré wa nai men yetu kadit sukye ete jowa men, bado? Nan ki mó et.” Yefun Yesus ki nai yepasye bok ne do, ”Ji do ki nai nin yo, bere nin yo jammo suk gato Ji ki ne nde.

Lukas 9:19

Pakon ki nai Yefun Yesus do, ”Yé bok yo ki do, Nan anato Yohanes gato ras nje mo syur. {Yé ne nut do, Yohanes ne frus an nggwa tepsu Nan.} Yé bok yo o ki do, Nan anato yenabi nyim gato gum do Elia. Yetu ge bok yo o ki do, Nan anato yenabi ge dik yo o gato kwop kam nyim, ete sun satu.”

Yohanes 1:41

Andreas mu kamas wa meret an bi nji Simon. An ku Simon, ete an ki nai Simon do, ”Men ku Mesias it.” (Mesias, a Ibrani anane, wo ye brek su a Yunani bi sukjimnut do, ’Kristus,’ gato bi sukjimnut do, Ye gato Yefun Allah syogat ma mo bur ré wa nai men yetu kadit sukye, ete jowa men.)

Yohanes 1:49

Natanael ki do, ”Yeguru, Nan anato Yefun Allah bi Gan, sangge, Nan anato ye Israel bi Yekwesu.”

Yohanes 11:27

Marta ki do, ”Yenggras, ji jam do, sangge, Nan anato Yefun Allah bi Gan, Nan anato Kristus, gato kam nyim Yefun Allah tom su men bi amui do, bere Yefun Allah syogat Yekwesu dik yo ma mo bur ré wa nai men yetu kadit sukye ete jowa men.”

Yohanes 20:31

Sarewo ji krom suk bok gare subere nin jam do, sangge, Yefun Yesus anato Ye gato Yefun Allah syogat ma mo bur ré wa kak os ndo wa men yetu ete jom men, subere nin jam do, sangge, Yefun Yesus anato Yefun Allah bi Gan. Sane dom, ji krom sukdu bok gare subere nin jam do, nin nai sukjimnut dik do, nin onyar kem mo An it yo, bere nin kem ndo to kapyo mato kapyo it anane.

Yohanes 4:29

”Nin ma me Ye gare et. Nin ma me Ye gato kibot suk mwa ne sino gato ji ben ré et. An anato Kristus bado?”

Yohanes 4:42

Ye Samaria ne ki nai nggon ne do, ”Su ré men onyar kem mo Yefun Yesus mo nan bi sukdu-i sor nde, wo men onyar kem mo An, we men dakai jam An ki An bi sukdu-i re. Men jam do, An anato Ye gato ma wa An nai men yetu sino mo bur ré wé kadit sukye, subere men kem ndo to kapyo mato kapyo.”

Yohanes 7:41

Ye deyo o ki do, ”Ye gare anato Kristus gato Yefun Allah syogat ma wa nai men yetu kadit sukye ete jowa men.” Sarewo ye deyo o ki do, ”Nde ré, Kristus anare nde. Yekwesu gato Yefun Allah syogat ma wa jowa men yo ma kadit bur Galilea nde.

Suk Gato Yerasul Ben Ne 17:3

Paulus nai Yefun Allah bi sukdu kwa wokgan, orge an ki rer subot sukdu ne, an ki do, ”Yefun Allah bi sukdu ré kadum nai men do, Ye gato Yefun Allah syogat ma mo bur ré wa nai men yetu kadit sukye ete jowa men ne, An ku sukye ndo nde nyim, orete Yefun Allah sun An kadit sukkwop. Sane ji bi sukdu-i wa nin anare: Ye gato Yefun Allah syogat ma ne gum do Yesus. Ye gato gum do Yesus anato Yekwesu gato Yefun Allah tom mo An bi sukdu ne do, bere An syogat Yekwesu dik yo ma mo bur ré wa nai men yetu kadit sukye ete jowa men. Yekwesu ne anato Kristus.”

Suk Gato Yerasul Ben Ne 8:36

Yepasye ne si Filipus simo kwem muket os mit saresa, an we ma kom mo pe gato syur ok mó. Sane yepasye ne ki do, ”Syur anare, nan ras ji mo syur ré et, suk yo yawa nan ras ji mo syur ré bado?” [

Suk Gato Yerasul Ben Ne 9:22

Kamdik-kamdik, Saulus faiya nggi o, nggi o, nggi o mone sor, ye Yahudi mone jam rer do, sangge, Yefun Allah syogat Yesus Kristus ma mo bur ré wa nai men yetu kadit sukye ete jowa men. Ye Yahudi mo kota ne yo ku os wa duwer Saulus mo sukdu ne nde.

1 Yohanes 5:1

Ye gato nai sukjimnut do, sangge, Yefun Yesus anato Yekwesu gato Yefun Allah syogat ma mo bur ré kak os ndo wa men yetu tepsu Yefun Allah tom ne yo, ye ne sok mo Yefun Allah bi rus-i it. Sane ye gato bi sukjimnut sye kas subot an bi Ai mo gu bere bi sukjimnut sye kas subot bi Ai ne bi pá-i mwa ne sino dom.