Lukas 8:28 - Abun Scripture

²⁸ Yesemda ré me Yefun Yesus sa, an saiye, an bare nggwa mo Yefun Yesus gwem, ete an saiye nggi do, ”Yesus, Yefun Allah gato gum kok sye wai ne bi Gan, Nan ma ku ji wa suma ne? Ji ndek mo nan do, Nan ben sukye nai ji nde.”

Lukas 8:28 ပူးပေါင်းရင်းမြစ်များ

Matius 8:29

Semda ben ye we ne saiye ket Yefun Yesus do, ”Yefun Allah bi Gan, Nan ma ku men wa suma ne? Men yo kom mo kam gato Yefun Allah ma ndobot men yetu nde tó, ete Nan ma wa ben sukye nai men su mit ré bado?”

Lukas 8:27

Án nor mone, Yefun Yesus is kadit kwem mu nden sa, yebris dik yo gato semda ben ne, an ma mo Yefun Yesus. Ye ne bi nat-i mo kota mo bur ne. Nam it, semda ben an, sane an yo it san yo mo nde. An bariwa an kem mo nu, wo an kem mo jokwak mo makwe sor.

Lukas 8:29

Yesemda ne ki sukdu ne, we Yefun Yesus ki nai ye ne nyim wé do, ”Semda, nan sombok kadit ye ré se!” Sagana semda ben yebris ne, yé da rai yesemda ne gwes si syim su rantai wam bok yo mó re, yé da mewa an dom re, sarewo rantai bok ne an toko wé, orete semda ben an mu mo pe gato nje yo kem mo nde.

Yakobus 2:19

Nin onyar kem mo sukdu do, Yefun Allah ne ka dik sor re, bado? Sangge! Sarewo yerom e, aboksye e, semda e ne sino onyar kem mo sukdu ne dom, ete án sino tetet mone, án nyuwa Yefun Allah ndo nde.

2 Petrus 2:4

Bere Yefun Allah syo sukye nai án mo sukibit gato án ben ne, we suga nyim tuya Yefun syo sukye nai malaikat si nje mwa neya mo sukibit gato yé ben ne re. Malaikat gato ben sukibit, Yefun Allah yo misyar nde, wo Yefun syo sukye nai malaikat ne it. Yefun bare malaikat ne mo pe gato yé wai o re. Yefun Allah rai án ete bok án mo pe gato ndendu yut mo bur desnak kret kam gato Yesus Kristus satu ma ndobot men yetu si malaikat sino. Tepsu kam gane bere An syo sukye nai malaikat ne dom.

1 Yohanes 3:8

Sarewo ye gato ben sukibit bu anato sok mo biris bi yekwesu bi rus-i, we biris bi yekwesu ben sukibit sane kadit ketke ne it. Sane anato Yefun Allah bi Gan ma mo bur ré subere An ben biris bi yekwesu bi os-i ibit or kai.

Wahyu 20:10

Orete biris bi yekwesu gato ben kidar yé mwa ne, Yefun am mu ngga mo bot sye gato tepsu em ete ru sye basmi kwik su belerang. Yefun Allah am biris bi yekwesu mo nat gato Yefun am suge doketke si suge kedowe, gato tepsu yenabi gato kidar nje ne, nyim wé re. Mo bot ne, biris bi yekwesu e, suge doketke si yenabi ne ku sukye ete dipa su noru nombrak sane sor to kapyo mato kapyo.