Lukas 8:18 - Abun Scripture

¹⁸ Sane, Yefun Allah bi sukdu gato nin syaretwa ne, nin nutbot sisu ndo et. Ye to bi sukjimnut kak, bere jam Yefun Allah bi sukdu mwa wai o re, sane bere an jam sukdu ne kom mo mit re. Sarewo ye to da jam sukwokgan, ete an misyar, sukwokgan gato an jam ne, bere suk ne ges or wé kadit an re.”

Lukas 8:18 ပူးပေါင်းရင်းမြစ်များ

Matius 13:12

Ye to bi sukjimnut kak, bere jam Yefun Allah bi sukdu mwa wai o re, sane bere an jam sukdu ne kom mo mit re. Sarewo ye to da jam sukdu ne wokgan, ete an misyar, sukwokgan gato an jam ne bere ges or kadit an re.

Matius 25:29

We sare, ye gato bi suk mó yo, bere an ku suk mwa yo o, ete an ku suk mwa wai o re. Ye gato mewa suk gato ye yi syo nai an sisu ndo yo, bere Yefun Allah bes ye ne jowa suk mwa wai o. Wo ye gato bi suk yo mo nde yo, wokgan gato mó yo, bere yé nai wé kadit an re.

Markus 13:14

Yefun Yesus ki o do, ”Bere kam sari ne ma nin me yetu ge dik yo ma mo Yefun Allah bi nu, ete an sok mo Yefun Allah bi gumwak fo mo Yefun bi nu mit. Ye ne, an mise teker, ete an gwat suk yo ma mone gato ben gumwak fo ne ibit, subere Yefun Allah bariwa gumwak ne or re. (Nin yé mwa ne sino gato baca sukdu gare, nin nutbot bi sukjimnut sisu ndo et.) Sane nin do me ye ne ben Yefun Allah bi nu mit ibit it yo, nin yé gato kem mo bur Yudea titi mu mo banbo et.

Lukas 19:26

Yepasye ne ki do, ’Ji ki sare do, ye gato bi suk mó yo, bere an ku suk mwa wai o. Ye gato mewa suk gato ye yi syo nai an sisu ndo yo, bere Yefun Allah bes ye ne jowa suk mwa wai o. Wo ye gato bi suk yo mo nde yo, wokgan gato mó yo, bere yé nai or wé kadit an re.

Lukas 9:44

”Nin jammo suk gato Ji ki ré et. Bere yeko ma wa but Yetu bi Pa to Ji ré.”

Yohanes 15:2

Ji bi Ai tot kwe anggur guk gato yo bo mo nde ne wé. Ji bi Ai me i-guk gato bo mó yo, An mbron i-nat napyo wé, subere i-guk ne ndo wa bo mwa o.

Suk Gato Yerasul Ben Ne 10:33

Sane, sugane it, ji syogat yé bok yo mu kar nan ma. Ji ki ndo mo nan, we nan ma ku men it are. Ré yo, men sino sum mo Yefun Allah gwem more wa men jam suk gato Yefun syogat nan ki nai men ne.”

Suk Gato Yerasul Ben Ne 17:11

Ye gato kem mo Berea, án kak án mit wa sukdu subot Yefun Yesus ne wai kadit ye Tesalonika. Ye Berea mit iwa wai o re. Kamdik-kamdik án si Paulus watbot Yefun Allah bi sukdu, subere án jam do, suk gato Paulus ki subot Yefun Yesus ne sangge, bado, siri, e?

Roma 12:3

Yefun Allah syo suktinggi nai ji dakai yi, sane ji ki nai nin sino sare do, nin bes nin nggwa kok teker eta nde, wo nin nutbot nin nggwa pare et. Nin onyar kem mo Yesus Kristus anato Yefun Allah syo suktinggi nai nin. Sane nin gedik-gedik nutbot nin nggwa pare tepsu pe gato nin onyar kem mo Yesus Kristus ne et.

1 Korintus 14:37

Sane ye gato nut do, Yefun Allah Gen ben an nggiwa ki Yefun Allah bi suktaru yo e, Yefun Allah Gen ben an nggiwa ben suk yi yo o e ne yo, an nutbot sukdu gato ji krom ne sisu ndo et, subere an jam rer do, suk gato ji krom ne anato suk gato Yefun Allah syogat men ben ne.

1 Korintus 3:18

Nin dakai kidar nin dakai nde. Ye gato nut do, an sa, jam suk mwa tepsu yetu bi sukjimnut-i mo bur ré, ndo sa, an ben nggwa tepsu ye gato jam nde bur ré bi suk-i, subere an ku os wa an jam suk mwa su sangge tepsu Yefun Allah bi sukjimnut-i ne,

1 Korintus 8:2

Ye to nut do án jam suk mwa ete án bes án nggwa kok mone yo, ye ne yo jam suk kom mo mit nde tó.

Filipi 3:4

Men do ku os wa men sok mo Yefun bi rus-i mo suk gato men yetu ben ne yo, ji sa, ji ben suk mwa ne, sane ji dom ku os mone re. Yé deyo ki do, án sa, án ben suk mwa tep wa Yefun nai án sok mo bi rus-i. Sukdu ne do sangge yo, bere ji ki do, ji ré ben ji bi suk-i mwa wai kadit ne o re.

Ibrani 2:1

Yesus Kristus gwat Yefun Allah bi suktaru gato be ne ma wa men re, sane men werwa men jom sukduno subot Kristus gato ye duno men su ne krat o et, subere men mu brek kadit sukdu gato men onyar kem mone nde.