Lukas 8:13 - Abun Scripture

¹³ Mbet gro gato ges mo bur ka gato jok mwa ne anato tepsu yé gato jam Yefun bi sukdu ne ete án nai Yefun bi sukdu ne mo án mit. Diksim án iwa, sarewo sukdu ne yo kem pe mo án mit nde, tepsu mbet gro ne i-brot yo kom mo jok nde. Diksim án jammo sukdu ne, sarewo bergan sor suk yo do tik án mit wa án ges mo os ibit yo, án misyar sukdu ne or re.

Lukas 8:13 ပူးပေါင်းရင်းမြစ်များ

Markus 6:20

we Herodes nyuwa Yohanes. Sane Herodes syogat yé mewa Yohanes mo sel ne sisu ndo. Herodes jam do, Yohanes ben sukndo tepsu Yefun Allah mit. Herodes jam do, Yefun Allah bes Yohanes wa ben Yefun Allah bi suk-i ne, sane anato Herodes nyuwa Yohanes. Herodes da iwa syaretwa Yohanes ki Yefun Allah bi sukdu-i, sarewo Herodes jam sukdu ne sa, an bi sukjimnut waiyu mone.

Lukas 8:12

Mbet gro gato ges mo os mit ne anato tepsu yé gato jam Yefun Allah bi sukdu ne, sarewo biris bi yekwesu ma nai sukdu ne wé kadit án mit or re, subere án yo jammo Yefun bi sukdu ne nde. Sane án yo ku os wa án kem ndo to kapyo mato kapyo nde.

Lukas 8:14

Mbet gro gato ges mo jak miten anato tepsu yé gato but sukdu ne, sarewo án bi sukjimnut sye mo suk mwa mo bur ré, án jimnotbot suk mwa gato men yetu yémo sato sugit e san e sugum e ne. Án iwa ku suk mwa, án meret suk gato ben án mit iwa sor re. Sukdu ne yo kom ndo mo án mit o nde, án yo ben suk tepsu sukdu ne nde. Sane án tepsu mbet gro mo jak mit ne, i-bo yo mo nde.

Yohanes 15:2

Ji bi Ai tot kwe anggur guk gato yo bo mo nde ne wé. Ji bi Ai me i-guk gato bo mó yo, An mbron i-nat napyo wé, subere i-guk ne ndo wa bo mwa o.

Yohanes 15:6

Ye to yo ut krat mo Ji tepsu dik nde yo, ye ne tepsu kweguk gato yé tot, ete yé am wé. Bere kweguk ne gu, ete yé sum wa yé gre mo bot wé.

Yohanes 5:35

Yohanes ne tepsu sukru gato ru rer, ete i-rer ne ku pe gato ndendu mó. Ketke nin iwa sukru ne, i-rer ku nin, wo yo nam nde ge, nin bariwa re.

1 Korintus 13:2

Ji duno nje su Yefun Allah bi suktaru sisu ndo yo, ji jam sukdu mwa gato ye yi jam nde yo, ji jam suk mwa kom mo mit yo, ji onyar kem mo Yefun Allah anato ji nggiwa ji syogat banbo do, ”Nan mu kem mo nat yi yo o et” yo, ji do nggiwa ben suk mwa ré, sarewo ji yo bi sukjimnut sye kas subot ye yi nde yo, ji ré yo ndo wa suk yo mo nde.

1 Korintus 15:2

Nin jom sukdu subot os ndo gato Kristus kak ne anato Yefun Allah nai nin gum sok mo An bi rus-i it, wo nin yo jom sukdu gato ji ki nai nin ne pe nde yo, bere nin yo onyar kem mo Yefun ri nde, sane bere nin yo kem ndo to kapyo mato kapyo nde.

Galatia 3:1

Nin ye Galatia jimgon! Je u anato ben kidar nin anato nin jimgon teker sare ne? Ji dakai ki sukdu subot Yesus Kristus kwop mo kwesukwin ne, ji ki rer wa nin dakai jam mó re.

Galatia 3:4

Nin dakai jam Yefun Allah Gen bok nggwa mo nin, ete ós nin mo suk mwa, orete kom mo rut suk yo mo nde bado? Sangge, Yefun Allah da bok An Gen mo nin mó re fe!

Efesus 3:17

subere Yesus Kristus kem pe mo nin mit si nin onyar, we nin onyar kem mo Kristus re. Sane dom, ji ki suk su Yefun Allah wa nin mo suk mwa gato nin ben ne, subere nin bi sukjimnut sye kas subot nje petok sor, ben sato sukjimnut ne jom nin, ete nin bi nin nggwa wa nje tepsu Kristus bi An nggwa ne.

Kolose 1:23

Nin onyar kem mo sukdu subot os ndo ne tepsu jam biro kom mo kwe guk ne yo, bere Yefun Allah nai nin gum sok mo An bi rus-i. Nin brek kadit os ndo ne nde, wo nin jom sukdu ne krat yo, bere nin si Yefun Allah kem ndo mo An bi nat-i. Sukdu ne anato sukdu gato yé ki nai nin jam re. Sukdu ne, yé mu ki frekbot bur ré iwedewe re. Ji gato gum do Paulus ré anato tepsu pakwerut wa ji mu kibot sukdu ne.

Kolose 2:7

Nin onyar kem pe mo An sato kwebrot marum kom krat mo bur ré ne et. Mo suk mwa gato nin ben ne, nin jammo An pe. Nin onyar kem mo An nggi o et, tepsu sukduno gato yé duno nin su ne. Nin ki ndo mo Yesus Kristus wam dik sor nde, wo nin ki ndo mo An petok sor.

1 Tesalonika 3:5

Sane ji jimnotbot nin ndo nde anato ji syogat Timotius ba ku nin mone. Ji syogat an ba ku nin subere an jam kret nin do, nin onyar kem mo Yesus Kristus tó bado nde e? Ji nokwa sawe biris bi yekwesu meret os wa nin sawe ben nin ges mo os ibit re. Sane bere suk mwa gato men ben su nin yo ós nin o nde.

1 Timotius 1:19

Nan jom sukdu subot Yefun Yesus gato sangge, ete nan duwer yé gane sor. Sane dom nan kidar nan dakai nde, wo nan jammo sukjimnut gato ndo mo nan mit petok sor. Yé bok yo jammo án bi sukjimnut gato ndo mo án mit o nde anato án ges mo os siri, án yo onyar kem mo Yefun Yesus o nde,

Ibrani 10:39

Sarewo men anato tepsu yé gato brek kadit Yefun Allah ete ges mo bot gesyos nde, wo men anato tepsu yé gato onyar kem pe mo Yefun Allah, ete kem ndo to kapyo mato kapyo.

Yakobus 2:26

Yetu gato kaim mó, sarewo an gen mu kadit it yo, an yo mbau o nde, ye ne kwop it anane. Sane dom, men ki do, men onyar kem mo Yefun Allah, sarewo men yo ben suk gato Yefun ki ne nde yo, men tepsu yetu gato kwop, men onyar kem mo Yefun sisu sangge anane nde.

2 Petrus 2:20

Yé gato jammo men bi Yekwesu Yesus Kristus gato ós men kem ndo to kapyo mato kapyo ne, Yesus Kristus ne sombok án kadit suktinggi mwa gato ben án ibit mo bur ré re. Sarewo suktinggi mwa gane do rai án satu, ete jom án tepsu bi pakwerut ne o yo, bere ri ma án ibit wai kadit nyim neya o re.

2 Petrus 2:22

Ye ne do brek an dari ket Yefun it yo, tepsu sukamno kwa we gato ye ki do, ”Ndar gwi or, ndar satu ma git ndar gwi ne o re,” si ”Ye mus jot kwo re, orete jot ne satu ma ngga mo budat o re.”

1 Yohanes 2:19

Suga nyim ye gato sok mo yeko ne, án sisu men, orge án mu kadit men re. Ye gare da si men, sarewo án yo mit dik su men nde. Sato án mit dik su men yo, bere án yo mu kadit men nde, sarewo án mu kadit men, ete mone men jam do, án yo mit dik su men mo nde.

Yudas 1:12

Yé gato ben bi suk-i sato yé bok ne, án si nin sum wa git sugit sino sa, án ben nin sino gum ibit mo sukdaret gato án ben ket án í mone sor, tepsu án jam nde án nggwa re, án yo damen dom nde. Án nutbot án dakai sor re, án yo nutbot ye yi nde re, tepsu ye gato mewa suksi, wo án dakai nai sugit wa án dakai sor, án yo syo sugit nai suksi ne nde, wokgan yo dom nde. Án tepsu nyotem gato nofuf sam ma, ndendu, men nut do bere nogi, sarewo nogi yo mo nde. Men nut do, bere án ós men tepsu nogi os men, sarewo suk yo mo nde. Án tepsu kwe gato bi aina tep wa bo, sarewo kwe ne yo bo mo nde. Men nut do, bere án syo suk gato ndo nai men, wo suk yo mo nde. Án tepsu kwe gato yé tik i-brot buk kadit bur re, sane bere kwe ne te re, yo kom o nde it. Án tepsu suk gato men nut do ndo wa ós men, ondewo suk yo mo nde.