Lukas 6:30 - Abun Scripture

³⁰ Ye yo ndek suk mo nin yo, nin syo nai ye ne sor. Ye yo nai nin bi suk-i kadit nin it yo, nin mu syokom an syo suk ne satu nde.

Lukas 6:30 ပူးပေါင်းရင်းမြစ်များ

Matius 18:35

Sane Yefun Yesus gwat sukamno ré, orete An kibot sare do, ”Sane, sukibit gato ye yi ben nai men yo, men maskwa wa nde, men nutbot o nde, wo men rus sukibit ne wé sisu sangge, ondeyo, bere men bi Ai mo gu ben sukye nai men tepsu yenggras ne ben nai pa we sye ne.”

Matius 5:39

Sarewo su ré, Ji ki sare do, ye gato ben sukibit nai nin it yo, nin waii ben sukibit nai an o nde. Ye yo gwa nin kwanke tak de syim ge yo, nin misyar an dakai gwa nin kwanke tak de syim jam o sor.

Matius 6:12

Nan maskwa men mo sukibit gato men ben mu nai Nan o nde, Nan nutbot o nde, tepsu men yo maskwa ye yi mo sukibit gato ye ne ben ma nai men ne nde, ete men nutbot o nde.

Lukas 11:41

Sane suk gato mo gelas si mbem mit ne, nin syo napyo nai ye gato yewa suk et. Nin do ben sukndo su ye gato yewa suk it yo, bere Yefun Allah mit iwa nin mone, tepsu nin bi gelas si mbem ne sino kwo re.

Lukas 12:33

Sane nin mu nin so nin bi suk mwa gato nin ku ne, orete sugum gato nin ku mone nin syo nai ye gato yo ku suk yo mo nde, sane bere nin ku suk mwa mo gu. Nin do ben sane, bere tepsu nin grem nin bi suk mwa ne mo gu, tepsu nin bok mbre mo sun bafar gato kem to kapyo. Nin ku suk mwa mo gu ne, suk mwa ne kem pe, yo or nde. Sane dom ye yo ku os wa sok mo gu ete gitsi nin bi suk nde. Kundun yo ku os wa ben suk ne ibit dom nde.

Lukas 18:22

Yefun Yesus jam ye ne bi sukdu sa, Yefun Yesus ki nai an do, ”Suk dik yo anato nan yo benbot nde tó, sare do, nan mu nan so nan bi suk mwa gato nan ku ne, orete suk mwa ne bi sugum nan syo nai ye gato yo ku suk yo mo nde, sane bere nan ku suk mwa mo gu. Nan syo sugum ne nai ye gato yewa suk, orete nan ma simo Ji et.”

Lukas 6:29

Ye yo gwa nin kwanke yo, nin brek nin kwanke deyo o wa an gwa dom et. Ye yo nai nin bi sansun yo, nin misyar ye ne dakai nai nin bi san deyo dom et.

Lukas 6:31

Suk gato nin mit iwa ye yi ben su nin ne yo, nin ben suk sane su ye yi neya et.

Lukas 6:38

Nin syo suk nai ye yi, sane bere Yefun Allah waii syo suk nai nin dom. Yé do ndek suk mo nin yo, nin syo wokgan nde, wo nin syo suk wai kadit yé ne ndek mo nin ne. Nin do ben sane it yo, bere Yefun Allah syo suk mwa nai nin, An syo suk mwa wai kadit suk gato nin mitmo ne. Nin bariwa ós ye yi yo, bere Yefun Allah waii bariwa ós nin. Nin syo suk mwa wa ós ye yi yo, bere Yefun Allah waii syo suk mwa nai nin.”

Suk Gato Yerasul Ben Ne 20:35

Mo suk mwa gato ji ben ne, nin me ji sa, ji samok. Sane nin samok dom, subere men ós ye gato yo nggiwa ben suk nde. Sane men napawa suk gato men bi Yekwesu Yefun Yesus dakai ki ne sare do, ’Men syo suk nai ye yi anato ben men mit at wa wai kadit men ku suk kadit ye yi.’ ”

2 Korintus 8:9

Men jam do men bi Yekwesu Yesus Kristus ben An bi suk-i ne ndo dakai yi su men, men yo ben suk yo nyim wa An nde. An tepsu yepasye gato bi suk mwa. An da bi suk mwa, sarewo An ma mo bur ré sa, An bi sukjimnut sye kas subot men yetu anato An ben An nggwa tepsu ye gato yewa suk, subere An kak os ndo wa men, subere ri ma, men ku os wa men ku suk mwa mo Yefun Allah bi de-i o re.

Efesus 4:28

Nin yé gato syimsi suk, nin ben sane o nde, wo nin ben nin bi suk-i ri-roi sor. Nin ben suk nin kamba mó et, subere nin ku suk gato nin mitmo ne, ete nin ku suk napyo o wa nin ós ye gato yewa suk su dom et.