Lukas 4:43 - Abun Scripture

⁴³ Sarewo Yefun Yesus ki nai yé ne do, ”Ji mu mo nat yi wa Ji ki sukdu subot os ndo gato Yefun Allah fro wa nai yetu gum sok mo An bi rus-i, ete An tepsu yé bi Yekwesu mone. Yefun Allah syogat Ji ma mo bur ré wa Ji mu kibot sukdu ne, sane Ji mu wa Ji kibot mo kota yi neya dom it anare.”

Lukas 4:43 ပူးပေါင်းရင်းမြစ်များ

Matius 4:23

Yefun Yesus mubot bur Galilea. Yefun duno nje mo ye Yahudi bi nu ari mo kampung bok yo mone. Yefun Yesus ki sukdu subot os ndo gato Yefun Allah fro wa nai men yetu gum sok mo An bi rus-i, ete An tepsu men bi Yekwesu mone. Sane dom, Yefun Yesus ben nje gato i ne ge kadit suki wisyo-wisyo.

Markus 1:35

Ik nyotkwo, kam yo it nde tó, Yefun Yesus mu mo nden kadit kota ne. An mu mo pe gato nje yo mo nde. An ki suk su Yefun Allah mone.

Yohanes 20:21

Sane Yefun Yesus ki wam dik yo o do, ”Yefun Allah ete uttok nin. Ji bi Ai syogat Ji ma wa nje mo bur ré, sane dom, Ji waii syogat nin mu wa nje mo bur ré.”

Yohanes 9:4

Ji kem mo bur ré su nombrak tó, sane men ben suk tepsu Ye gato syogat Ji ma more ki ne. Men ben An bi suk-i su nombrak. Noru it yo, men yo ben suk yo o nde.

Suk Gato Yerasul Ben Ne 10:38

Nin dakai jam do, Yefun Allah bes Yesus, ye Nazaret ne, orete Yefun Allah Gen bok nggwa mo Yefun Yesus, syo suktinggi nai Yefun Yesus. Nin jam do, Yefun Yesus mubot peyo-peyo, An ben sukndo, An ben ye gato i ne ge. Yé mwa gato biris bi yekwesu jom ne, An nai wé kadit biris bi yekwesu, ete ben yé mwa ne ge re. Yefun Allah sisu Yefun Yesus anato An nggiwa ben suk ne.

2 Timotius 4:2

Nan ki subot os ndo gato Yefun Allah fro wa yé mwa jam sisu ndo et. Nan duno nje gat, ye bari o, ye iwa o, nan duno nje gat sor. Nan me ye gato ben sukibit yo, nan ki mo án, nan ndantom án subere án kwet kadit sukibit gato án ben ne, ete án ben suk gato ndo. Nan wergat nje subere án benbot sukduno gato nan duno án su ne. Nan duno nje sisu njep sor. Kapre ye yo jammo nan bi sukduno kekro nde, nan maskwa wokgan dom nde, wo nan werwa kom-kem petok sor.