Lukas 4:34 - Abun Scripture

³⁴ ”Ei! Yesus, ye Nazaret, Nan ma more wa suma ne? Te Nan ma more wa Nan gu men e? Ji jam do Yefun Allah fro Nan ma mo bur ré wa Nan gwat Yefun Allah bi suktaru.”

Lukas 4:34 ပူးပေါင်းရင်းမြစ်များ

Matius 8:29

Semda ben ye we ne saiye ket Yefun Yesus do, ”Yefun Allah bi Gan, Nan ma ku men wa suma ne? Men yo kom mo kam gato Yefun Allah ma ndobot men yetu nde tó, ete Nan ma wa ben sukye nai men su mit ré bado?”

Markus 1:24

”Yesus, ye Nazaret, Nan ma more wa suma ne? Te, Nan ma more wa Nan gu men e? Ji jam do Yefun Allah fro Nan ma mo bur ré wa Nan gwat Yefun Allah bi suktaru.”

Markus 1:34

Orge yé mwa gato i su suki mwa ne, Yefun Yesus ben yé mwa ne ge wé kadit án bi suki ne or re. Yefun Yesus syun semda titi wé kadit yé mwa gato semda ben ne. Semda ne jam do, Yefun Yesus ma kadit Yefun Allah. Sane Yefun Yesus duyawa semda ne subere semda yo ki napyo nai nje mone jam nde.

Markus 5:7

ete an saiye nggi do, ”Yesus, Yefun Allah gato gum kok sye wai ne bi Gan, Nan ma ku ji wa suma ne? Nan tom su ji, Nan syo syim ete Nan ki Yefun Allah gum su do, Nan yo ben sukye nai ji nde.” (

Lukas 1:35

Malaikat ne ki do, ”Bere Yefun Allah Gen ma mo nan. Bere Yefun Allah Gen bi suktinggi ben nan, subere nan ku Pa. Bere nan ku Pa gato yé kendo do Yefun Allah bi Gan. Pa ne Yefun Allah fro dor wa ben Yefun bi suk-i sor re.

Lukas 4:33

Mo ye Yahudi bi nu ari ne, yetu ge dik yo gato semda ben sok ari si yé mwa mone. Yefun Yesus duno nje mo nu ari mit ne saresa, ye gato semda ben ne saiye nai Yefun Yesus sare do,

Lukas 4:41

Yé mwa gato semda ben ne dom, semda gane titi wé kadit yé mwa ne. Semda ne titi wé saresa, semda saiye do, ”Nan anato Yefun Allah bi Gan.” Sarewo Yefun Yesus ndantom semda ne. Yefun Yesus duyawa semda ne do, ”Nin du o nde,” we semda ne jam do, Yefun Yesus anato Yekwesu gato Yefun Allah syogat ma mo bur ré wa nai men yetu kadit sukye ete jowa men.

Lukas 8:28

Yesemda ré me Yefun Yesus sa, an saiye, an bare nggwa mo Yefun Yesus gwem, ete an saiye nggi do, ”Yesus, Yefun Allah gato gum kok sye wai ne bi Gan, Nan ma ku ji wa suma ne? Ji ndek mo nan do, Nan ben sukye nai ji nde.”

Lukas 8:37

Orge yé mwa ne sino gato kem mo bur Gerasa ne ndek mo Yefun Yesus do, Yefun Yesus mu kadit án bi bur-i et, we yé mwa ne nyu ndo nde. Sane Yefun Yesus it mo kwem, subere An si An bi pakon mu kadit nat ne.

Suk Gato Yerasul Ben Ne 16:39

Sane yepasye ne ma bidek an we, ete gwat an we kadit penjara ne. Yepasye ne ndekwa ye we mu kadit kota ne sor.

Suk Gato Yerasul Ben Ne 2:27

we ji gato tepsu Nan bi pakwerut gato ben Nan bi suk-i, bere Nan yo misyar ji mukri mo makwe nde. Sane dom, ji gato Nan dakai bes wa ben Nan bi suk-i, bere Nan yo misyar ji mukri mbras nde.

Suk Gato Yerasul Ben Ne 3:14

Nin misyar Yefun Yesus gato ben suk tepsu Yefun Allah mit. Nin misyar yé gu Yefun Yesus gato ben Yefun Allah bi suk-i sor, wo nin ndekwa Pilatus sombok ye gato gu yetu bok yo kwop ne wé.

Suk Gato Yerasul Ben Ne 4:27

Suk gato Daud krom ne sangge, we yeraja Herodes si Gubernur Pontius Pilatus si yewis gato ye Yahudi nde si ye Yahudi mo kota ré sum sino. Yé bok ne fro os wa gu Yefun Yesus kwop wé. Yé bok ne fro os wa gu Nan bi pakwerut gato Nan bes wa ben Nan bi suk-i sor. Yé bok ne fro os wa gu Yefun Yesus gato Nan syogat ma mo bur ré wa nai men yetu kadit sukye ete jowa men.

Ibrani 2:14

Pa mwa ne tepsu yetu gato da kridek. Sane anato Yefun Yesus dakai ben nggwa tepsu yetu gato da kridek mó dom. An ben nggwa tepsu yetu subere An kwop sa, An ku os wa An nai biris bi yekwesu bi suktinggi gato gwat sukkwop ma wa men yetu ne wé. Yefun Yesus ben biris bi yekwesu ibit it anare, Yefun syat suktinggi ibit ne wé re.

Yakobus 2:19

Nin onyar kem mo sukdu do, Yefun Allah ne ka dik sor re, bado? Sangge! Sarewo yerom e, aboksye e, semda e ne sino onyar kem mo sukdu ne dom, ete án sino tetet mone, án nyuwa Yefun Allah ndo nde.

1 Yohanes 3:8

Sarewo ye gato ben sukibit bu anato sok mo biris bi yekwesu bi rus-i, we biris bi yekwesu ben sukibit sane kadit ketke ne it. Sane anato Yefun Allah bi Gan ma mo bur ré subere An ben biris bi yekwesu bi os-i ibit or kai.

Wahyu 20:2

Malaikat but naga, gato ben bi suk-i tepsu kwis kadit nyim tuya gato biris bi yekwesu, gato ye kendo gum do Iblis ne. {Naga ne ka sa nggor bin, sarewo kaim ne sye wai o re.} Malaikat but naga ne ete rai su bus sor kom mo tahun ribu dik.

Wahyu 3:7

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Filadelfia sare do: Ji gato ben Ji bi suk-i ndo petok, Ji gato ben Ji bi suk-i ri-roi sor, Ji gato jom yeraja Daud bi kunci ne, suk gato Ji kak, ye yo nggiwa grem suk yo krat yawa satu nde. Sane dom, suk gato Ji grem krat yawa, ye yo nggiwa kak o nde. Ji bi sukdu-i anare: