Lukas 4:32 - Abun Scripture

³² Yé bok yo gato jam sukdu ne, án yeket Yefun Yesus, we Yefun Yesus ki bi sukdu-i ne tepsu Yefun Allah dakai ki bi sukdu-i ne, Yefun Yesus ki bi sukdu-i ne pet mo nje. Yé mone iwa jammo Yefun Yesus bi sukdu-i ne sor.

Lukas 4:32 ပူးပေါင်းရင်းမြစ်များ

Markus 1:22

Yé bok gato jam sukdu ne, án yeket Yefun Yesus, we Yefun Yesus ki bi sukdu-i ne tepsu Yefun Allah dakai ki bi sukdu-i, Yefun Yesus ki bi sukdu-i ne pet mo nje. Sarewo ye Yahudi bi yeguru agama ne, án ki ye yi gum mo án bi sukdu-i subere yé jammo án, wo Yefun Yesus yo duno nje sane nde, Yefun dakai duno nje, ete yé iwa jammo Yefun bi sukdu-i ne sor.

Lukas 2:47

Yé mwa mone gato syaretwa Pa ki bi sukdu-i ne yeket. Yé mwa ne yeket Pa do, Pa jam suk mwa. Suk gato yeguru ndo mo Pa ne, Pa jam or re.

Lukas 4:33

Mo ye Yahudi bi nu ari ne, yetu ge dik yo gato semda ben sok ari si yé mwa mone. Yefun Yesus duno nje mo nu ari mit ne saresa, ye gato semda ben ne saiye nai Yefun Yesus sare do,

Lukas 4:36

Yé mwa mone me suk gato Yefun Yesus ben ne, án yeket, án nutbot ndo nde, ete án ki nai yu do, ”Bei! Suma ré ne? Sukduno be yo bado? Ye gare ki bi sukdu-i pet mo nje it. Ye gare bi suktinggi nggi wai kadit semda dom. Ye gare syokom semda yo, semda jammo An, ete titi kekro.”

Yohanes 6:63

Yefun Allah Gen anato ben yetu mbau. Men yetu dakai sor yo nggiwa men ben men mbau nde. Sukdu gato Ji ki nai nin ne anato sukdu gato ma kadit Yefun Allah Gen. Sane sukdu ne anato ben nin mbau.

Yohanes 7:46

Ye gato mewa Yefun Allah bi nu ne ki do, ”Ye ne ki bi suk-i ndo yé. An bi sukdu ne tik men mit ware, men yo but An nde.”

2 Korintus 4:2

Men duno nje yo, men yo gurik os gato sangge kadit nje nde. Men do ben sane bere men damen mo koirut o re. Sane men duno nje yo, men yo meret os mone dom nde, men bariwa re. Men yo ki subot Yefun Allah bi sukdu-i brek tara kadit An bi sukdu gato sangge ne nde, wo Yefun Allah dakai jam do, men ki subot An bi sukdu-i ne ri-roi sor, subere yé mwa ne sino onyar kem mo men bi sukdu-i re.

1 Tesalonika 1:5

we suga nyim men ki sukdu subot os ndo gato Yesus Kristus kak wa men yetu ne nai nin jam sa, sukdu ne pet mo nin mit re. Sukdu ne men ki su men syokwet sor nde, wo Yefun Allah Gen bi suktinggi bor mone dom. Men ki sukdu su men syokwet sor nde, wo men ki sukdu ne tepsu ye gato jam rer do, sukdu ne sangge. Nin jam do, men si nin kem mone sino sa, men bi sukjimnut sye wa men ós nin mo nin bi suk-i ne sor.

Titus 2:15

Nan duno nje su sukduno mwa ne sino. Nan bidek nje su sukduno ne. Nan ndantom nje subere án ben suk siri kadit sukduno mwa ne o nde. Nan duno nje sisu ndo subere yé jammo nan, ete yé yo ku os wa duwer nan mo sukdu ne nde. Nan duno nje subere yé yo ki nan gum ibit mone nde, wo yé un nan gum sor.