Lukas 17:30 - Abun Scripture

³⁰ Sane o, su kam gato Yetu bi Pa to Ji ré satu ma mo bur ré, bere yé mwa ben án bi suk-i sagana án ben sane sor, yé mwa ne sino gensu Ji, yé mwa yo fro wa Ji ma nde.

Lukas 17:30 ပူးပေါင်းရင်းမြစ်များ

Matius 16:27

We sare, Ji, gato Yetu bi Pa, bere Ji si Ji bi malaikat si Ji bi Ai bi suktinggi ne ma, ete syo suk gato ndo nai nje tepsu sukndo gato án ben ne.

Matius 24:3

Yefun Yesus mu kem mo banbo gato gum do Zaitun sa, An bi pakon ma ku An wadigan mone, ete pakon ndo mo An do, ”Kam u ete bere suk gato Nan ki ne bor ne? Suk sato suma anato bere bor nyim wa ós men jam do, bergan it, Nan satu ma mo bur ré, ete bur ré kru ne?”

Matius 24:37

Kam gato Ji ma su ne tepsu kam gato Nowak kem mo bur ré.

Matius 24:39

Wo yé yo bi sukjimnut kom mo suk gato bere bor mone nde, sane sor syur syé ma gwat án or wé re. Sane dom, Ji satu ma mo bur ré yo, bere yé yo bi sukjimnut kom mo suk gato bere bor mone dom nde.

Matius 26:64

Yefun Yesus ki do, ”Sangge, suk gato nan ki ne sangge. Sane sor nde, wo Ji ki nai nin sare do, bere nin me Yetu bi Pa to Ji ré kem tak Yefun Allah gato nggi wai ne de syim ge, ete bere Ji satu is ma mo bur ré su nyotem kadit gu.”

Markus 13:26

Su kam gane yé mwa ne sino mo bur ré me Yetu bi Pa to Ji ré bor mo gu. Bere Ji is ma sisu nyotem. Ji kaim rer-rik su Ji bi suktinggi gato bor mone.

Lukas 17:24

We sare, kam gato Yetu bi Pa to Ji ré satu ma mo bur ré it yo, bere yé mwa ne sino me Ji ma tepsu yé me nowarek rer bot gu kadit nobu nim kom mo nobu ket.

Lukas 17:29

Wo su kam gato Lot mu kadit kota Sodom ne, yé mwa ne gensu, we su kam gane Yefun Allah syo bot si jok ges kadit gu git yé mwa mone kwop or sino.

Lukas 21:22

We, su kam gane Yefun Allah syo sukye nai yé bok ne sino mo kota ne. Yé ku sukye sane, subere tepsu suk gato yé krom mo Yefun Allah bi sukdu kam nyim bere bor re.

Lukas 21:27

Yé do me suk mwa ne bor sane it yo, Yetu bi Pa to Ji ré ma it anane. Bere yé mwa ne sino me Ji is ma sisu nyotem, Ji kaim rer-rik su Ji bi suktinggi bor mone.

1 Korintus 1:7

Sane Yefun Allah syo suktinggi ne mwa nai nin, nin yo yewa suktinggi yo mo nde. Nin eswa men bi Yekwesu Yesus Kristus, satu ma mo bur ré. Nin eswa Kristus ma saresa, nin yo yewa suktinggi yo mo nde.

1 Korintus 1:8

Yefun Allah mewa nin sane sor kom mo pe gato or mó, subere tepsu kam gato men bi Yekwesu Yesus Kristus, satu ma mo bur ré yo, sukibit yo ut mo nin mo nde, wokgan yo dom nde.

Kolose 3:4

Kristus anato kak os wa nin anato nin kem ndo. Sane An satu ma mo bur ré yo, bere Yefun Allah bes nin si An gum kok sino.

2 Tesalonika 1:7

Sane su kam gato men bi Yekwesu Yefun Yesus si malaikat gato nggi is ma kadit gu kadum nggwa nai men yetu, sugane Yefun nai nin si men sino wé kadit sukye gato yé gane ben nai men ne.

1 Petrus 1:13

Nin jam sukdu subot os ndo gato Yesus Kristus kak ne, sane anato nin fro nin nggwa wa ben An bi suk-i petok sor. Nin kem su nin fra, nin kwabom kam mo Yefun Allah do, tepsu kam gato Yesus Kristus satu ma ne, bere Yefun Allah ben sukndo su nin re.

1 Petrus 1:7

Nin ku sukye ket kwayo-kwayo sane, subere nin jam mone do, nin onyar kem mo Yefun Allah sisu sangge, bado, nde e? Ji gwat sukamno sare do, nin onyar kem mo Yefun anato tepsu emas. Sukye anato tepsu bot gato ye kon emas mone. Emas tepsu men yetu, bere mbras re. Wo ye kon emas gato sangge mo bot yo, bere bot yo ben emas ne ibit nde, wo bot ne ós wa git sukkwik wé kadit emas ne or re. Sane dom nin onyar kem mo Yefun sisu sangge yo, bere sukye yo ben nin misyar Yefun nde, wo sukye ne ben nin onyar kem mo Yefun nggi wai kadit nyim ne o re. Suk gato ndo wai kadit emas anato nin onyar kem mo Yefun sisu sangge. Sane nin onyar kem mo An nggi wai o yo, bere su kam gato Yesus Kristus satu ma mo bur ré, Yefun Allah un nin e, Yefun bes nin gum kok, ete Yefun ki nin gum ndo mone o re.

1 Petrus 4:13

Nin nutbot sukye ne teker eta nde, wo nin mit at wa sor, we ben sato nin si Kristus ku sukye ne sino. Sane bere su kam gato Kristus kadum An bi suktinggi bor mo bur ré, nin mit at wa wai o re.

1 Yohanes 2:28

Sane ji kiwa nin, ji bi pá nin do, nin si Kristus tepsu dik petok sor, subere su kam gato An satu ma ne yo, bere nin ku An tepsu nin bi yesyim, bere nin damen wa An nde.

1 Yohanes 3:2

Ji bi nji ji bi nyanggon gato ji jimnotku, su ré men anato Yefun Allah bi pá-i it, sarewo suk gato bere bor mo men su kam sari ne ma, men jam ri nde tó. Su kam gato Yesus Kristus satu ma it yo, bere men kaim-i ne tepsu An kaim-i ne re.

Wahyu 1:7

Sare, bere Yesus Kristus is kadit gu sisu nyotem ne ma. Yetu mwa ne sino bere me An dakai ma ne. Yé bok gato syer An bere ku An kaim ne dom. Sugane bere yé mwa ne sino mo bur ré iwedewe nderku nggwa mo An ndo nde. Digane it. Sangge.