Lukas 16:9 - Abun Scripture

⁹ Orge Yefun Yesus ki o do, ”Sane Ji ki sare do, nin syo nin bi suk nai nje, subere yé ne kak án mit wa nin, ete nin ku nin bi yesyim ge bok yo mone. Sane nin bi suk mwa mo bur ré do or kadit nin it yo, bere Yefun Allah syo nat gato ndo wa nin kem mó. Bere nin kem ndo mone to kapyo mato kapyo.

Lukas 16:9 ပူးပေါင်းရင်းမြစ်များ

Matius 19:21

Yefun Yesus ki nai pa ne do, ”Nan iwa nan ben suk mwa ne ndo sino yo, nan mu nan so nan bi suk mwa gato nan ku ne, orete suk mwa ne bi sugum nan syo nai ye gato yo ku suk yo mo nde, sane bere nan ku suk mwa mo gu. Nan syo sugum ne nai ye gato yewa suk, orete nan ma simo Ji et.”

Matius 6:19

”Nin sum suk mwa wa nin dakai mo bur ré nde, we mo bur ré, kundun si on bere git nin bi suk ne ibit or re. Sane dom bere ye sok mo nin bi nu mit, ete gitsi nin bi suk napyo or re.

Matius 6:24

”Yetu ge dik yo, yo nggiwa ben suk wa yenggras ge we nde. Bere ye ne bariket yenggras ge dik yo, ete an jimnotku yenggras ge dik yo sor. Bere ye ne jammo yenggras ge dik yo sor, ete an misyar yenggras ge dik yo sor re. Sane dom, nin yo nggiwa jammo Yefun sisu sugum sino nde.

Lukas 11:41

Sane suk gato mo gelas si mbem mit ne, nin syo napyo nai ye gato yewa suk et. Nin do ben sukndo su ye gato yewa suk it yo, bere Yefun Allah mit iwa nin mone, tepsu nin bi gelas si mbem ne sino kwo re.

Lukas 12:33

Sane nin mu nin so nin bi suk mwa gato nin ku ne, orete sugum gato nin ku mone nin syo nai ye gato yo ku suk yo mo nde, sane bere nin ku suk mwa mo gu. Nin do ben sane, bere tepsu nin grem nin bi suk mwa ne mo gu, tepsu nin bok mbre mo sun bafar gato kem to kapyo. Nin ku suk mwa mo gu ne, suk mwa ne kem pe, yo or nde. Sane dom ye yo ku os wa sok mo gu ete gitsi nin bi suk nde. Kundun yo ku os wa ben suk ne ibit dom nde.

Lukas 14:14

Nan do kendo ye ga sane ma it yo, bere Yefun Allah ben sukndo su nan. Ye gato nan kendo ma ne, yé ne bi os wa án ben sukndo satu yo mo nde. Wo Yefun Allah sa, bere ben sukndo satu nai nan. Su kam gato Yefun sun yé gato ben sukndo tepsu An mit ne mbau satu kadit sukkwop, su kam gane Yefun Allah ben sukndo su nan.”

Lukas 16:11

Sane nin yo mewa sugum si suk mwa mo bur ré sisu ri-roi nde yo, bere Yefun Allah syo sukndo kadit gu wa nin mewa ne wa suma ne?

Lukas 16:13

Sare, pakwerut ge dik yo, an yo nggiwa ben suk wa yenggras ge we nde. Bere ye ne bariket yenggras ge dik yo, ete an jimnotku yenggras ge dik yo sor re. Bere ye ne jammo yenggras ge dik yo ete an misyar yenggras ge dik yo sor re. Sane nin yo nggiwa nin gum pakwerut wa Yefun Allah si sugum sino nde.”

Lukas 16:4

Ji bi sukjimnut dik yo anare, sa ndo sa, ji bi yenggras yo syogat ji mu nde tó, ji werwa ji ben suk yo subere yé mwa kak yé mit wa ji, bere yé mwa ne tepsu ji bi yesyim subere yenggras syun ji it yo, ji mu si án kem mo án bi nu.’

Suk Gato Yerasul Ben Ne 10:31

An ti mone, an ki do, ’Kornelius, Yefun Allah jam suk gato nan ndekwa ne it. Yefun Allah me nan ós ye Yahudi gato yewa suk. Yefun Allah mit iwa nan.

Suk Gato Yerasul Ben Ne 10:4

Kornelius sokwa malaikat ne, an nyu, an ki do, ”Yenggras, suma ne?” Malaikat ne ki do, ”Nan ki suk su Yefun Allah sa, Yefun jam suk gato nan ndekwa ne. Yefun Allah me nan ós ye Yahudi gato yewa suk. Suk gato nan ben ne, Yefun Allah jam re, Yefun Allah mit iwa nan re.

2 Korintus 4:17

Sukye wokgan gato men ku su ré, su kam sari ne ma bere kak os wa gwat men mu kem mo pe gato gesyos gato ndo wai o re. Sane men kem mo bur ré yo, men nut do, sukye gato men ku ne, suk yo nde, we bere men kem gesyos mone tó.

Yudas 1:21

Nin eswa men bi Yekwesu Yesus Kristus ma ben bi suk-i ne ndo bor su nin sor. Bere An yo ben suk su nin tepsu sukibit gato nin ben ne nde, wo bere An gwat nin mu mo pe gato ndo wa nin si An kem ndo mone to kapyo mato kapyo. Nin eswa suk ne bor yo, nin ben nin bi suk-i, nin napawa pe do, Yefun Allah bi sukjimnut sye kas subot nin sor.