Lukas 15:24 - Abun Scripture

²⁴ Ji nut do, ji bi pa gato mu ré kwop re, sarewo pa ré mbau o re. Ji nut do, ji bi pa ré muri re, an yo ma o nde, sarewo an satu ma ku ji o re.’ Sane pakwerut benbot suk gato yenggras ki ne. Yé mo nu ne konwa pa gato satu ma ne.

Lukas 15:24 ပူးပေါင်းရင်းမြစ်များ

Matius 8:22

Sarewo Yefun Yesus ki do, ”Nan misyar ye gato jam nde Yefun gato bi sukjimnut kwop ne dakai mu bi yekwop mo makwe sor. Nan simo Ji kadit.”

Markus 8:22

Yefun Yesus si An bi pakon mu kom mo kota Betsaida. Án mu kom mone sa, yetu ge bok yo gwat yebris dik yo gato gro ndu ma mo Yefun Yesus, ete yé ne ndek mo Yefun Yesus wa Yefun Yesus ben yebris ne gro ndo satu.

Lukas 10:19

Ji syo suktinggi nai nin mó re. Kapre nin yakos kwis e, wi e ne, suk ne yo gu nin kwop nde. Ji syo suktinggi nai nin subere nin nggi wai kadit biris bi yekwesu o re. Biris bi yekwesu ne yo ku os wa ben nin ibit nde.

Lukas 15:23

Orge nin mu nai sapi gan gato sye. Nin gu kwop, subere men git sino, men konwa ji bi pa gato ma ré. Men kamowa et!

Lukas 15:25

Sugane yenggras bi pa dosye ben suk mo nggwe tó. Pa dosye satu mo nu saresa, an jam yé sara, an jam yé ne suk.

Lukas 15:32

Sarewo men konwa nan bi nji dowok, men kamowa, we men nut do, nan bi nji gato mu ne kwop re, sarewo nan bi nji ne satu ma an mbau o re. Nan bi nji, men nut do an muri re, an yo ma o nde, sarewo nan bi nji satu ma ku men sisu ndo o re. Sane men konwa an.’ ”

Lukas 15:4

”Nin ge dik yo bi domba ge wotin dik, ete domba ge dik yo do muri yo, sane bere ye ne ben suma ne? Bere an mu kadit ge musyu musi sop musi mo pe gato domba git sugit mone, ete an mu meret ge dik gato muri ne sane sor an ku et.

Lukas 19:10

Sane Yetu bi Pa to Ji ré ma mo bur ré wa Ji syeret ye gato jam nde Yefun Allah bi os-i, subere ji ós ye ne jam Yefun Allah bi os-i. Ji kak os wa ye ne subere an kem ndo to kapyo mato kapyo.”

Lukas 9:60

Yefun Yesus ki nai ye ne do, ”Nan misyar ye gato jam nde Yefun gato bi sukjimnut kwop ne dakai mu bi yekwop mo makwe sor. Wo nan simo Ji, nan mu ki nai yé mwa do, ’Yefun Allah ma jowa men tepsu men bi Yekwesu it anare.’ ”

Yohanes 11:25

Yefun Yesus ki nai Marta do, ”Ji anato sun nje kadit sukkwop. Ji anato ben yetu mbau. Ye gato onyar kem mo Ji yo, kapre an kaim kwop, bere an kem ndo mone tó.

Yohanes 5:21

Ji bi Ai Yefun Allah anato sun yekwop mbau satu, ete ben ye ne kem ndo to kapyo mato kapyo. Sane dom, An bi Gan to Ji ré ben yetu gato An mit iwa ne kem gesyos.

Roma 11:15

Yefun Allah bariwa ye Yahudi gato su krat ne anato An kak os wa yewis yi mwa ne sino mo bur ré sok mo An bi rus-i mone. Sane bere Yefun Allah do iwa nai ye Yahudi sok mo An bi rus-i it yo, bere sa u ne? Bere ye Yahudi tepsu ye gato kwop, ete mbau satu o re.

Roma 12:15

Ye to mit at mo suk gato ndo yo, men sino dom mit at su an et. Ye to wo yo, men si an wo sino dom.

Roma 6:11

Sane men nutbot men dakai do, sukibit gato men ben nyim ne, or wé kadit men it. Ben sato men bi sukjimnut-i wa men ben sukibit kwop wé kadit men re. Sarewo su ré men kem wa men si Yesus Kristus sino ben Yefun Allah bi suk-i sor.

Roma 6:13

Men bi men gro e, men syim e, men gwes e ne wa benbot sukjimnut ibit ne o nde. Men bi men nggwa wa ben sukdaret o nde, wo men bi men nggwa sino mo Yefun Allah sor. Men anato tepsu ye gato Yefun Allah nai wé kadit os sukkwop wa kem ndo satu. Sane men bi men nggwa sino mo Yefun Allah sor. Men bi men nggwa sino wa men ben suk gato tepsu Yefun Allah mit sor.

Roma 8:2

we Yesus Kristus kak os ndo wa men anato Yefun Allah Gen nai men wé kadit sukjimnut ibit gato jom men. Yefun Allah Gen sombok men wé kadit ye Yahudi bi sukduno gato gwat sukkwop wa men re.

1 Korintus 12:26

Sane pe dik yo mo men kaim ré ku sukye yo, tepsu men kaim sino ku sukye it. Sane dom ye bes pe dik yo mo men kaim gum kok it yo, bere suk mwa gato mo men kaim ne sino mit at wa.

Efesus 2:1

Nin ré, suga nyim nin ben sukdaret, nin ben siri kadit Yefun Allah mit, nin jam nde Yefun Allah, ben sato nin kwop kadit Yefun Allah it.

Efesus 2:5

Yefun Allah bi sukjimnut sye kas subot men sye teker, sane kapre ben sato men kwop mo sukibit gato men ben ne, Yefun Allah sun men mbau satu, ete men si Kristus kem ndo it. Men yo ben suk yo nyim wa Yefun Allah nde, wo An dakai bi sukjimnut sye kas subot men yi sor anato An nai men wa men si An kem ndo to kapyo mato kapyo.

Efesus 5:14

we sukru rer ku suk mwa ne sino yo, bere ben sukibit ne rer wa men jam kom mo mit re. Sane ye ki do, ”Nin yé gato sem ne, nin sun tom! Tepsu nin sun satu kadit sukkwop, bere Kristus tepsu sukru rer ku nin.”

Kolose 2:13

Suga nyim nin yo onyar kem mo Kristus nde tó, nin ben sukibit ket nin í petok sor. Sukjimnut gato tik nin mit wa nin ben sukibit bu ne, Kristus yo kum toko wé nde tó, ben sato nin kwop mo sukibit ne. Wo su ré, ben sato Yefun Allah sun nin kadit sukkwop, tepsu An sun Kristus ne. Sane Yefun Allah yo maskwa nin mo sukibit mwa gato nin ben ne o nde, An yo nutbot o nde.

1 Timotius 5:6

Sarewo nggonna gato ben bi suk-i ket mom í sor, mom da mbau, sarewo Yefun Allah bi sukjimnut mo nggon ne do, nggon ne kwop re.

Yudas 1:12

Yé gato ben bi suk-i sato yé bok ne, án si nin sum wa git sugit sino sa, án ben nin sino gum ibit mo sukdaret gato án ben ket án í mone sor, tepsu án jam nde án nggwa re, án yo damen dom nde. Án nutbot án dakai sor re, án yo nutbot ye yi nde re, tepsu ye gato mewa suksi, wo án dakai nai sugit wa án dakai sor, án yo syo sugit nai suksi ne nde, wokgan yo dom nde. Án tepsu nyotem gato nofuf sam ma, ndendu, men nut do bere nogi, sarewo nogi yo mo nde. Men nut do, bere án ós men tepsu nogi os men, sarewo suk yo mo nde. Án tepsu kwe gato bi aina tep wa bo, sarewo kwe ne yo bo mo nde. Men nut do, bere án syo suk gato ndo nai men, wo suk yo mo nde. Án tepsu kwe gato yé tik i-brot buk kadit bur re, sane bere kwe ne te re, yo kom o nde it. Án tepsu suk gato men nut do ndo wa ós men, ondewo suk yo mo nde.

Wahyu 3:1

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Sardis sare do: Ji gato jom Yefun Allah Gen ge mufit gato mu ben Yefun Allah bi suk-i, Ji gato jom bí ge mufit ne bi sukdu-i sare: Ji jam subot suk mwa gato nin ben mone o re. Yé mwa ne nut do, nin sa, mbau, nin onyar kem mo Ji, sarewo Ji jam do, nin misyar Ji anato nin tepsu yé gato kwop re.