Lukas 1:32 - Abun Scripture

³² Bere Pa ne gum yepasye, bere yé kendo An do, Yefun Allah gato gum kok sye wai ne bi Gan. Bere Yefun Allah, Ye gato gesyos, bes Pa ne gum Yekwesu wa An jowa nje mwa, tepsu yeraja jowa nje mwa, sato An bi amui, yeraja Daud ne.

Lukas 1:32 ပူးပေါင်းရင်းမြစ်များ

Matius 1:1

Men krombot Yesus Kristus bi amui. Yesus Kristus bi amui dik yo mo yeraja Daud. Daud waii bi amui mo Abraham. Yesus Kristus bi amui kadit Abraham sor kom mo yeraja Daud anare:

Matius 12:42

Su kam gato bere Yefun Allah ndobot yetu mwa ne sino, nggon pasye kadit bur nden si nin sun sino. Bere nggon ne ki nin gum ibit sare do, ’Ji ma kadit os syu mu ku yeraja Salomo subere ji jam Salomo bi sukdu-i gato kru. Sarewo Ye gato jam suk mwa wai kadit Salomo si nin kem sino, ete nin misyar An re.’ ”

Matius 28:18

Orete Yefun Yesus ma karowa pakon ne, ete An ki do, ”Yefun Allah bes ji gum tepsu Yekwesu mo gu nim si bur ré sino.

Matius 3:11

Ji anato ras nje mo syur tepsu bi sukjimnut do, ye ne kwet kadit os ibit it. Wo bere Ye yo gato gum kok sye wai kadit ji waii ma bori. Ji gum yo tep wa ji jom An bi sepatu nde. Ji gum wok teker mu bur ware. Ye gato gum kok sye wai kadit ji ne, bere An syogat Yefun Allah Gen bok nggwa mo nin, ben sato An ras nin mo Yefun Allah Gen, tepsu An ras nin mo bot.

Markus 14:61

Sarewo Yefun Yesus not sor, An yo du wokgan dom nde. Orete yekwesu ne ki nai Yefun Yesus o do, ”Te Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men bado? Te Nan anato Yefun Allah gato men bes gum kok sye wai ne bi Gan bado?”

Markus 5:7

ete an saiye nggi do, ”Yesus, Yefun Allah gato gum kok sye wai ne bi Gan, Nan ma ku ji wa suma ne? Nan tom su ji, Nan syo syim ete Nan ki Yefun Allah gum su do, Nan yo ben sukye nai ji nde.” (

Lukas 1:15

Pa gato nan bi nggon kem su ne, bere Yefun Allah bes pa ne tepsu yepasye. Yefun Allah duyawa pa ne da nau anggur si nau krat. Kadit ketke bi im kem su pa ne yo, Yefun Allah Gen bok nggwa mo pa ne re.

Lukas 1:35

Malaikat ne ki do, ”Bere Yefun Allah Gen ma mo nan. Bere Yefun Allah Gen bi suktinggi ben nan, subere nan ku Pa. Bere nan ku Pa gato yé kendo do Yefun Allah bi Gan. Pa ne Yefun Allah fro dor wa ben Yefun bi suk-i sor re.

Lukas 1:76

{Orge Zakaria ki nai an bi pa do,} ”Nan, ji bi pa, bere yé kendo nan gum do yenabi, bere nan gwat Yefun Allah gato gum kok sye wai ne bi suktaru ma ki nai nje mo bur ré re. Yefun Allah syogat nan mu nyim mo men bi Yekwesu ne gwem, subere nan fro os wa An.

Lukas 3:16

Yohanes ki nai yé mwa mone sino do, ”Ji anato ras nin mo syur, sarewo bere Ye gato gum kok sye wai kadit ji waii ma bori. Sane ji iwa ben suk wa An yo, bere ji yo tepsu nde, ji gum wok teker mu bur ware. Bere ji gum yo tep wa ji sombok jamtu mo An bi sepatu dom nde. Ye gato gum kok sye wai kadit ji ne bere An syogat Yefun Allah Gen bok nggwa mo nin, ben sato An ras nin mo Yefun Allah Gen, tepsu An ras nin mo bot.

Lukas 6:35

Nin ben sukndo su ye gato ben sukndo su nin sor nde, wo nin jimnotku yeko gato ma wa gu nin, nin ben sukndo su ye gato bariwa nin ne dom et. Nin syo suk nai ye gato ndek suk mo nin sor. Bere ye ne syo suk ne satu o bado, yo syo nde yo, nin nutbot o nde. Sane, nin do ben sukndo su ye gato ben sukibit nai nin sane it yo, bere Yefun Allah syo suk mwa gato ndo nai nin, bere suk gato nin ben ne kadum do, nin anato Yefun Allah gato gum kok sye wai ne bi pá-i. Nin ben nin bi suk-i tepsu Yefun Allah ben ne, we Yefun Allah ben sukndo su ye gato ben sukibit si ye gato misyar An dom.

Yohanes 12:34

Orete yé mwa mone ki do, ”Yé krom mo men bi sukduno do, ’Kristus yo kwop nde, wo An kem gesyos sor.’ Ben sa u anato Nan ki do, ’Yé bes Yetu bi Pa kaim kok kadit bur ré ne? Je u anato Yetu bi Pa ne?’ ”

Yohanes 6:69

Men onyar kem mo Nan it. Men jam do, Nan anato Ye gato Yefun Allah bes ete syogat ma more wa Nan ben An bi suk-i.”

Suk Gato Yerasul Ben Ne 16:17

Nggon ne boribot Paulus si men, mom saiye bot os do, ”Yé ré anato Yefun Allah gato nggi wai ne bi pakwerut anare. Yefun Allah syogat yé bok ré ma wa ki sukdu subot os ndo gato An fro wa men yetu subere men kem ndo to kapyo mato kapyo.”

Suk Gato Yerasul Ben Ne 2:30

Sane Daud gwat sukamno subot an dakai nde, wo Daud anato yenabi dik yo gato gwat sukamno subot yetu ge dik yo o re. An jam suk gato Yefun Allah tom su an ne do, kapyo tak Yefun Allah bes Daud bi pa-i ge dik yo tepsu Yekwesu wa jowa ye Yahudi.

Suk Gato Yerasul Ben Ne 2:36

Petrus ki o do, ”Sa ndo sa, nin ye Israel ne sino jam do, Yefun Yesus gato nin gu kwop mo kwesukwin ne, Yefun Allah bes tepsu men bi Yekwesu. Yefun Allah anato bes Yefun Yesus gum Kristus, Ye gato Yefun Allah syogat ma mo bur ré wa nai men yetu kadit sukye ete jowa men ne.”

Suk Gato Yerasul Ben Ne 7:48

Salomo da nggo nu wa Yefun Allah, sarewo Yefun Allah gato gum kok sye wai o re, An yo kem mo nu gato men yetu nggo nde, we yenabi dik yo krom suk gato Yefun Allah ki sare do,

Roma 1:4

Sarewo Pa ne tepsu yetu sor nde, wo Pa ne anato Yefun Allah bi Gan, men jam rer mo gato Yefun Allah Gen ben Pa ne nggi wai kadit sukkwop, Yefun Allah Gen sun Pa ne kadit sukkwop o re.

Wahyu 3:7

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Filadelfia sare do: Ji gato ben Ji bi suk-i ndo petok, Ji gato ben Ji bi suk-i ri-roi sor, Ji gato jom yeraja Daud bi kunci ne, suk gato Ji kak, ye yo nggiwa grem suk yo krat yawa satu nde. Sane dom, suk gato Ji grem krat yawa, ye yo nggiwa kak o nde. Ji bi sukdu-i anare: