Kolose 3:24 - Abun Scripture

²⁴ we nin jam wa pe do, bere nin bi Yekwesu, Kristus, syo suk nai nin mo nin bi kamba mo suk gato nin ben ne. Suk gato Yefun frowa An syo nai An bi rus-i ne, bere nin ku mone tó. Nin nut do, nin bi yenggras gato nin ben suk wa ne anato Kristus.

Kolose 3:24 ပူးပေါင်းရင်းမြစ်များ

Matius 10:41

Ye to kak an mit wa yenabi ma ku an, we yenabi gwat Yefun Allah bi suktaru, bere an sisu yenabi ne sino ku suk gato ndo. Sane dom, ye to kak an mit wa ye gato ben sukndo tepsu Yefun mit ne ma ku an, we ye ne ben sukndo, bere an sisu ye ne sino ku suk gato ndo ne.

Matius 5:12

Suga nyim tuya yenabi ku sukye saga nin ku re. Wo nin wi, nin ambre, we Yefun fro suk gato ndo wa nin mo gu nim ne re.”

Matius 5:46

Sane nin ben sukndo su ye gato ben sukndo su nin sor re, bere Yefun syo sukndo nai nin wa suma ne? Ye gato nai sugum kadit nje wa pemerintah da ben sukndo su ye gato ben sukndo su an, sarewo an ben sukibit su yé mwa.

Matius 6:16

”Nin mewa nin nggwa kadit nin git sugit yei yo, nin ben nin gwem ibit saga ye gato kidar do, an onyar kem mo Yefun, sarewo an mit tara ne nde. Ye ne misyar an kaim subere yé mwa jam do, an mewa an nggwa kadit sugit yei wa an ki suk su Yefun. Suk gato Ji ki ré suksangge anare, yetu bes ye ne gum kok mone sor re, wo bere Yefun yo syo suk yo nai an o nde.

Matius 6:5

”Nin ki suk su Yefun Allah yo, nin ben saga ye gato kidar do, an onyar kem mo Yefun, sarewo an mit tara ne nde. Yé ne iwa án ti, ete án ki suk su Yefun mo ye Yahudi bi nu ari e, mo os de e neya, subere yetu me suk gato án ben ne. Suk gato Ji ki ré suksangge anare, yetu bes án gum kok sor re, wo bere Yefun yo syo suk yo nai án o nde.

Lukas 14:14

Nan do kendo ye ga sane ma it yo, bere Yefun Allah ben sukndo su nan. Ye gato nan kendo ma ne, yé ne bi os wa án ben sukndo satu yo mo nde. Wo Yefun Allah sa, bere ben sukndo satu nai nan. Su kam gato Yefun sun yé gato ben sukndo tepsu An mit ne mbau satu kadit sukkwop, su kam gane Yefun Allah ben sukndo su nan.”

Lukas 6:35

Nin ben sukndo su ye gato ben sukndo su nin sor nde, wo nin jimnotku yeko gato ma wa gu nin, nin ben sukndo su ye gato bariwa nin ne dom et. Nin syo suk nai ye gato ndek suk mo nin sor. Bere ye ne syo suk ne satu o bado, yo syo nde yo, nin nutbot o nde. Sane, nin do ben sukndo su ye gato ben sukibit nai nin sane it yo, bere Yefun Allah syo suk mwa gato ndo nai nin, bere suk gato nin ben ne kadum do, nin anato Yefun Allah gato gum kok sye wai ne bi pá-i. Nin ben nin bi suk-i tepsu Yefun Allah ben ne, we Yefun Allah ben sukndo su ye gato ben sukibit si ye gato misyar An dom.

Yohanes 12:26

Ye gato bi nggwa mo Ji wa an ben Ji bi suk-i ne yo, ye ne si Ji mu sino. Pe gato Ji mó, Ji bi pakon ne sisu Ji mone dom. Ye gato bi nggwa mo Ji wa an ben Ji bi suk-i yo, bere Ji bi Ai bes ye ne gum kok.”

Suk Gato Yerasul Ben Ne 20:32

Sane, ji syo nin mo Yefun Allah syim-i, bere An mewa nin tepsu sukdu gato An ki ne. Nin jammo An bi sukdu ne sa, bere sukdu ne ós nin onyar kem mo Yefun Yesus nggi wai o, ete bere An syo sukndo nai nin si yé mwa ne sino gato sok mo An bi rus-i ne.

Roma 1:1

Ji gato gum do Paulus anato krom surat ré wa nin yé gato onyar kem mo Yefun Yesus gato kem mo kota Roma. Yefun Allah bi sukjimnut sye kas subot nin. Yefun nai nin gum sok mo An bi rus-i it. Yefun Allah bes ji gum yerasul subere ji mu ki sukdu subot os ndo gato Yefun Allah fro wa men yetu subere men ku os wa men gum sok mo An bi rus-i.

Roma 14:18

Men ben suk gato Yesus Kristus iwa e, men si Kristus kem not e, men mit at wa Kristus bi suk-i e ne. Ye gato bi an nggwa wa an ben suk bok ré wa Kristus it yo, bere Yefun Allah mit iwa ye ne. Yefun iwa ye ne sor nde, wo bere yetu dom un ye ne gum mo suk gato ye ne ben ne.

1 Korintus 11:23

Nin yo jambot ji bi sukdu-i nde wa suma ne? We sare, sukdu gato ji duno nin su ne, men bi Yekwesu Yefun Yesus dakai tarubot ji, orete ji waii ki nai nin jam. Ji ki sukdu ne sare do, su noru gato yetu ge dik yo meret os wa gwat yeko ma wa but Yefun Yesus ne, ye yo but An nde tó, Yefun Yesus nai roti, ete

1 Korintus 3:8

Ye gato jan suk si ye gato sye syur wa ne, an we bi sukjimnut tepsu yu, an we ne iwa sukjan ne kom. Bere Yefun Allah syo suk gato ndo nai án tepsu án bi kamba mone.

1 Korintus 7:22

Ye gato gum pakwerut wa yenggras mo bur ré su kam gato Yefun Allah nai an sok mo Yefun bi rus-i sa, ye ne tepsu Yefun bi yetuge-i gato gum kwerut wa ye yo o nde. Sane dom ye gato gum kwerut wa yenggras mo bur ré nde su kam gato Yefun Allah nai ye ne sok mo An bi rus-i yo, bere ye ne tepsu Kristus bi pakwerut or re.

Galatia 1:10

Sane ji ki ji bi sukdu-i wa meret os subere yetu iwa ji bado? Sane nde re, wo ji ki ji bi sukdu-i subere Yefun Allah iwa ji sor. Ji krom sukdu wa tik yetu mit subere yetu mit iwa ji bado? Nde re. Ji do ki sukdu subere yetu iwa ji yo, ji tepsu Kristus bi pakwerut nde.

Efesus 6:6

Pakwerut, nin bi yenggras sokwa nin ete nin ben suk mone, wo nin bi yenggras yo sokwa nin nde ete nin yo ben suk o nde, bere siri re. Nin ben suk subere nin bi yenggras sokme ete un nin mone sor nde, wo nin anato tepsu Yesus Kristus bi pakwerut-i, sane nin ben suk wa nin bi yenggras su nin mit dik si nin onyar dik petok sor. Yefun Allah mit iwa nin ben nin bi suk-i sane.

Efesus 6:8

Nin ben sane, we nin jam do, kapre nin gum kwerut e, nin gum kwerut nde e ne, bere nin yé mwa ne sino ku sukndo kadit men bi Yekwesu Yesus Kristus mo sukndo gato nin ben ne.

Kolose 2:18

Ye gato ma ki do, malaikat gato an som ne kadum suk bok yo rer wa an me re, ete an kidar do, an yo bes an nggwa kok mo suk ne nde, sane yo, nin jambot ye ne bi sukdu-i nde, we sukdu ne gwat nin ko kadit sukndo gato bere Yefun Allah syo nai nin ne. Ye gato ki bi sukdu-i sane jam nde Yefun. An dakai bes an nggwa kok mo suk mwa gato an me ne, sarewo sukkidar sye yo ko ré. An ki subot malaikat bi sukdu-i sane sor kom mo mit kai,

Ibrani 10:35

Sane su ré nin brek kadit Yefun Yesus nde, we nin onyar kem pe mo Yefun Yesus it yo, bere nin ku suk mwa wai mo Yefun bi de-i ne o re.

Ibrani 11:6

Ye gato yo onyar kem mo Yefun Allah nde tó yo, bere ye ne yo ku os wa ben suk tepsu Yefun Allah mit nde. We, ye gato ma mo Yefun Allah it yo, an onyar kem mo sukdu sare do, Yefun Allah ne sa, mó re, ete Yefun ben sukndo su ye gato meret An.

Ibrani 9:15

Kristus dé sye wa men, sane anato Kristus ma gwat os be gato Yefun Allah tom su men ne, subere yé gato Yefun Allah nai sok mo An bi rus-i, bere ku suk gato ndo wai mo gu, gato Yefun Allah tom su án ne. Suk gato ndo wai ne anato gesyos. Kristus kwop wa men yetu anato bere men ku suk mwa mone. Men yetu gato ben suk siri kadit os nyim bi sukduno-i ku sukye mone. Sane Kristus kwop wa An tik men yetu syim wé kadit sukye gato men ku mone.

1 Petrus 1:4

bere men ku sukndo mwa gato An fro wa An syo nai An bi rus-i ne. Suk mwa gane Yefun Allah grem kem mo gu wa men. Mo gu ne suk mwa ne yo mbras nde, yo ibit nde, yo dum nde.

2 Petrus 1:1

Ji gato gum do Simon Petrus anato krom surat ré wa nin. Ji anato tepsu Yesus Kristus bi pakwerut. Yesus Kristus bes ji gum yerasul. Ji krom sukdu ré wa nin yé gato si men sino onyar kem mo Yesus Kristus. Yesus Kristus gato kak os wa men kem ndo kadit bot gesyos ne, Yesus Kristus gato tepsu Yefun Allah gato jom men ne, An ben An bi suk-i ri-roi su men sino anato nin onyar kem mo An tepsu men re.

Yudas 1:1

Ji gato gum do Yudas, gato Yesus Kristus bi pakwerut, gato bi nji mo Yakobus, ji anato krom surat ré wa nin yé gato men bi Ai, Yefun Allah nai sok mo An bi rus-i. Yefun Allah bi sukjimnut sye kas subot nin. Yesus Kristus mewa nin.