Kolose 2:9 - Abun Scripture

⁹ Nin jambot sukdu sane nde, we sukdu gato sangge bor mo Yesus Kristus gato ma mo bur ré su kaim tepsu men yetu. Yesus Kristus, anato tepsu Yefun Allah dakai mo suk mwa ne sino, kwa yo gwet mo nde. Suk mwa gato An ben si An bi suktinggi ne, suk mwa ne tepsu Yefun Allah dakai.

Kolose 2:9 ပူးပေါင်းရင်းမြစ်များ

Matius 1:23

”Nggonnak ge dik yo gato sem su yebris mo nde, bere syimfar, orete nggon ne kem su pa yebris. Pa ne bere ye kendo gum do, Imanuel.” (Imanuel bi sukjimnut do, ”Yefun Allah sisu men kem sino.”)

Lukas 14:22

Pakwerut mu, orge an satu ma o. Pakwerut ne ki do, ’Yenggras, suk gato nan syaugat ji ben ne, ji ben or re, wo nan bi nu yo ses nde tó.’

Lukas 3:22

ete Yefun Allah Gen is ma mo An. Yefun Allah Gen ne is ma su kaim sato ndabu. Orge yé mwa ne jam Yefun Allah ki sukdu kadit gu sare do, ”Nan anato Ji bi Gan. Ji bi sukjimnut sye kas subot Nan. Ji iwa Nan ndo nde.”

Yohanes 1:14

Sukdu ne ma mo bur ré ka tepsu yetu re. An ma si men kem mo bur ré sino. An ben sukndo mwa yé su men dakai yi. An kadum Yefun Allah wa men jam sisu sangge. Men dakai me su men gro do, An gum kok sye wai o re. Yefun Allah anato An bi Ai, Yefun Allah bi Gan ge dik ne sor re, anato Yefun Allah bes An gum kok sye wai. {An anato Yefun Yesus.}

Yohanes 1:16

Yefun Allah bi sukjimnut sye kas subot men petok sor. Yefun Allah syo suk mwa nai men dakai yi, An ben sukndo su men mo suk mwa ne sino.

Yohanes 10:30

Ji si Ji bi Ai tepsu dik.”

Yohanes 10:38

Sarewo Ji ben suk tepsu Ji bi Ai syogat Ji ben ne, sane nin onyar kem mo Ji mo suk gato Ji ben gato ben nje yeket ne. Kapre nin bariwa nin jammo Ji bi sukdu-i, nin onyar kem mo Ji mo suk gato Ji ben ne sor. Sane bere nin jam kom mo mit do, Ji bi Ai si Ji tepsu dik. Ji dom, Ji si Ji bi Ai tepsu dik.”

Yohanes 14:20

Su kam gato nin kem gesyos ne it yo, bere nin jam do, Ji si Ji bi Ai tepsu dik. Sane dom bere nin jam do, nin si Ji tepsu dik sino.

Yohanes 17:21

Ji bi Ai, Ji ndek mo Nan subere án sino tepsu dik, tepsu Nan si Ji tepsu dik. Án ete si Men tepsu dik dom et, subere yetu mo bur ré jam do, sangge Nan anato syogat Ji ma mo bur ré re.

Yohanes 2:21

Ye Yahudi bi yepasye ne nut do, Yefun Yesus ki subot Yefun Allah bi nu, ondewo Yefun kibot An dakai kaim sor re.

Suk Gato Yerasul Ben Ne 17:29

Men anato An bi pa, saneyo men nut mo An do, An ka tepsu suk gato yetu ben su emas ne, bere siri re. Sane dom men nut mo An do, An ka tepsu suk gato yetu ben su perak e jok e ne, bere siri re. Suk sane, yetu anato fro tepsu yetu bi suktinggi-i ne.

2 Korintus 5:19

Sukdu gato men ki subot anare, Yefun Allah syogat Kristus ma wa kak os wa men yetu si Yefun Allah kem ndo su yu. Yefun Allah fro os ne, An yo nutbot sukibit gato men yetu ben ne o nde. Yefun Allah syogat men mu ki sukdu subot os ne nai yetu mwa ne mo bur ré sino jam sor.

Kolose 1:19

Yefun Allah dakai mit iwa suk mwa gato An ki ne, si, suk mwa gato An ben ne sino, An bi Gan waii ki ete ben sane petok dom.

1 Timotius 3:16

Suk gato men krom ré suksangge, men bi sukduno gato nyim neya Yefun Allah gurik ne ndo wai o re, sato ré: Yefun Yesus ma mo bur re, An kaim tepsu yetu kaim. Yefun Allah Gen kadum do, Kristus sa, ben bi suk-i ne sangge sino. Malaikat mwa ne sino me An re. Yé ki sukdu subot An frekbot yetu wisyo-wisyo. Yé mwa mo bur ré iwedewe onyar kem mo An re. An it mo gu nim, mo pe gato ndo wai o re.

Titus 2:13

men eswa Kam gato Yesus Kristus satu ma mo bur ré. Men kwabom kam mo Kristus do, bere An ma sor, sane men eswa. Su kam gato An ma su ne yo, bere yetu mo bur ré sokme Yefun kaim rer-rik su bi suktinggi ndo yé re. Yesus Kristus gato bere ma ne, An anato tepsu Yefun Allah gato gum sye kok wai o re. Yesus Kristus anato men bi Yekwesu gato kak os wa men kem ndo to kapyo mato kapyo.

1 Yohanes 5:20

Men jam o do, Yefun Allah bi Gan ma mo bur ré re, An ós men, An kak men bi sukjimnut, subere men jam Yefun Allah gato sangge ne. Men si Yefun Allah gato sangge ne tepsu dik. Men si An bi Gan Yesus Kristus ne tepsu dik it. An sor anato Yefun gato sangge re. An sor anato ós men kem ndo to kapyo mato kapyo re.

1 Yohanes 5:7

Sukdu kwa gri gato kadum rer wa men jam do, Yesus Kristus anato Yefun Allah bi Gan ne anare: