Kolose 2:19 - Abun Scripture

¹⁹ wo an yo jammo Kristus tepsu an bi Yekwesu o nde. An sombok kadit Kristus, tepsu yetu kaim sombok kadit i-su. Kristus anato tepsu yetu su gato jom kaim ne tepsu dik. Men yetu brot si men dini rit ne ós jom men kaim ne krat tok yu ete ut mo men su. Kristus jom An bi rus-i digane, subere men sino tepsu dik, ete tepsu men kaim kom sye o, men ut mo Kristus krat waii o tepsu Yefun Allah dakai imo ne.

Kolose 2:19 ပူးပေါင်းရင်းမြစ်များ

Lukas 5:38

Men ben sane nde, wo men sye nau anggur be mo sukbo be, subere nau si bi sukbo ne sino kem ndo.

Yohanes 17:21

Ji bi Ai, Ji ndek mo Nan subere án sino tepsu dik, tepsu Nan si Ji tepsu dik. Án ete si Men tepsu dik dom et, subere yetu mo bur ré jam do, sangge Nan anato syogat Ji ma mo bur ré re.

Suk Gato Yerasul Ben Ne 4:32

Ye gato onyar kem mo Yefun Yesus ne sino, án tepsu dik. Kadik-kadik ki do, ji yo bi suk-i are nde, wo men yé mwa ré bi suk-i anare. Án nut do kadik-kadik bi suk o nde, wo yé mwa ne bi suk sino. Sane ye ós yu su suk.

Roma 11:17

Men ye Yahudi tepsu kwe zaitun guk gato ye tot wé. Orete ye gwat kwe zaitun gato dakai kom mo nden guk-i bok yo ma but dom kweke win kwe zaitun guk gato ye tot wé ne. Nin yewis yi tepsu kwe zaitun guk gato ye gwat kadit nden ne ma. Yefun Allah but nin yewis yi dom kweke ne subere nin waii ku suk mwa gato ndo kadit kwe zaitun ke ne, tepsu nin ku os wa nin sok mo Yefun Allah bi rus-i anane.

1 Korintus 1:10

Ji bi nji, ji bi nyanggon, men bi Yekwesu Yesus Kristus bes ji wa ben An bi suk-i, saneyo ji syaugat nin do, nin tepsu dik et. Nin wat yu nde. Nin ben suk tepsu dik. Nin ben suk sino. Nin duwer yu daret o nde. Nin ben suk su nin bi sukjimnut dik, kwa yo gato siri kadit yu mo nde.

1 Korintus 11:3

Sarewo ji iwa nin jam sukdu kwa dik yo sare do, men yebris ne sino bi Yekwesu mo Kristus; nggon bi yekwesu mo bi ya; ete Kristus bi Yekwesu mo Yefun Allah.

1 Korintus 3:6

Nin bes men ka we gum kok nde. Ji anato ben suk tepsu ye gato jan suk mo nggwe, Apolos anato tepsu ye gato sye syur wa, sarewo Yefun Allah anato ben sukjan ne kom. Sane nin bes Yefun Allah gum kok sor.

Efesus 1:22

Yefun Allah syo suk mwa ne sino mo Yesus Kristus syim, ete Yefun Allah bes Yesus Kristus gum Yekwesu mo suk mwa ne sino wa ye gato onyar kem mo Yefun Yesus mo nu ari sino mo bur ré.

Efesus 1:23

Yé mwa gato onyar kem mo Yefun Yesus anato tepsu Yefun Yesus kaim-i mo bur ré. Yé mwa gato onyar kem mo Yefun Yesus mo bur ré ku bi suktinggi ne sino kadit Kristus re. Yesus Kristus syo bi suktinggi nai nje mo pe mwa mo bur ré or sino re.

Efesus 2:21

Yefun Yesus dakai anato nggo nu ne sino, subere nu ne ndo wai o re. An fro nu ne dor tep wa men bi Yekwesu Yesus Kristus dakai bi nu-i ne sor.

Efesus 4:3

Yefun Allah Gen ós nin kem ndo anato nin tepsu yedik. Sane nin wergat nin nggwa subere nin si yé mwa ne sino kem ndo su yu, subere nin maskwa ket yu mo kwa dik yo dom nde.

Efesus 5:29

Ye gato bariwa an mewa an kaim-i ne, ye gato ben bi suk-i sane yo mo nde, wo yé mwa ne sino mewa án kaim re. Yé mwa ne sino meret sugit wa án git, yé mwa ne sino mewa án kaim tepsu Kristus mewa ye gato onyar kem mo An.

Filipi 1:27

Yé sombok ji yo, ji kem more tó yo, nin ben nin bi suk-i tepsu sukdu subot os ndo gato Yesus Kristus kak ne sor. Nin ben suk tepsu sukdu gato ji duno nin su ne. Ji iwa nin ben nin bi suk-i sane subere ji ba ku nin yo, ji yo ba ku nde yo, ji jam sukdu subot nin do, nin tepsu dik wa nin jom Yefun bi sukdu-i pe sor. Nin mit dik si nin onyar dik wa nin duwer ye gato bariwa sukdu subot os ndo ne. Nin onyar kem mo sukdu ne pe sor.

Kolose 1:10

Men ki suk su Yefun wa nin sane subere nin kem mo bur ré, nin ben nin bi suk-i tepsu Yefun Allah mit, nin ben suk gato An iwa nin ben ne petok sor. Nin ben sane yo, bere suk gato bor kadit suk mwa gato nin ben ne ndo sino, bere nin jam Yefun Allah sisu ndo wai o kadit nyim neya o re.

Kolose 1:18

Men sino gato onyar kem mo Yefun Yesus mo nu ari mwa ne anato tepsu Kristus kaim ne. Kristus anato tepsu su mo men kaim ne. Sane Kristus anato tepsu i-ke wa men yé gato onyar kem mo An re. An anato tepsu Pa doketke gato Yefun Allah sun kadit sukkwop, subere An wadigan sor ete gum kok wai kadit suk mwa neya.

Kolose 2:2

Suk mwa ré ji ben subere nin si án sino bi sukjimnut nggi, eteyo nin si án bi sukjimnut sye kas subot yu tepsu yedik. Ji ben suk mwa ne subere sukdu gato Yefun Allah gurik kadit men suga nyim tuya ne, nin si án sino jam wa pe kom mo brot marum kai. Sane ji ben suk mwa ne subere án jam do, Kristus gato Yefun Allah yo kadum bor wa men jam suga nyim tuya ne nde, su ré án jam do Kristus bor it.

1 Tesalonika 3:12

Men bi Yekwesu Yefun Yesus ete ben nin sane sor nin bi sukjimnut sye kas subot yu mwa o et. Yefun ete ben nin bi sukjimnut sye kas subot yé mwa ne sino sye wai kadit nyim neya, tepsu men bi sukjimnut sye kas subot nin re.

1 Tesalonika 4:10

Sane dom, nin bi sukjimnut sye kas subot yé mwa gato onyar kem mo Yefun Yesus ne sino mo bur Makedonia re. Sarewo men bi nji, men bi nyanggon, men kiwa nin wergat nin nggwa wa nin ben suk sane mwa wai kadit nyim ne o et.

2 Tesalonika 1:3

Men bi nji, men bi nyanggon, men jam sukdu do, nin onyar kem mo Kristus nggi wai kadit nyim neya o re. Sane men ki ndo mo Yefun Allah mone. Sane dom, nin bi sukjimnut sye kas subot yu sye wai kadit nyim ne o re, sane men ki ndo mo Yefun Allah noru nombrak sor.

1 Petrus 3:8

Ji yo krom sukdu mwa ok o nde, wo ji bi sukdu kwa bok yo sor wa nin yé bok ne sino do, nin werwa subere nin mit dik tepsu yu et. Nin bi sukjimnut dik tepsu yu et. Nin mewa yu tepsu yedik et. Nin dakai jimnotku yu sisu nin mit dik si nin onyar dik et. Nin is nin nggwa ga tepsu pa wokgan et.

2 Petrus 3:18

Men bi Yekwesu Yesus Kristus gato nai men kadit sukye ete jowa men yetu ne, An ben sukndo su men yetu dakai yi. Sane nin dom ben nin bi suk-i ne ndo mwa wai o kadit nyim ne sor. Nin jam Yesus Kristus sisu ndo o et. Men bes An gum kok su ré sor to kapyo mato kapyo. Sangge.