Kolose 2:13 - Abun Scripture

¹³ Suga nyim nin yo onyar kem mo Kristus nde tó, nin ben sukibit ket nin í petok sor. Sukjimnut gato tik nin mit wa nin ben sukibit bu ne, Kristus yo kum toko wé nde tó, ben sato nin kwop mo sukibit ne. Wo su ré, ben sato Yefun Allah sun nin kadit sukkwop, tepsu An sun Kristus ne. Sane Yefun Allah yo maskwa nin mo sukibit mwa gato nin ben ne o nde, An yo nutbot o nde.

Kolose 2:13 ပူးပေါင်းရင်းမြစ်များ

Lukas 15:24

Ji nut do, ji bi pa gato mu ré kwop re, sarewo pa ré mbau o re. Ji nut do, ji bi pa ré muri re, an yo ma o nde, sarewo an satu ma ku ji o re.’ Sane pakwerut benbot suk gato yenggras ki ne. Yé mo nu ne konwa pa gato satu ma ne.

Lukas 15:32

Sarewo men konwa nan bi nji dowok, men kamowa, we men nut do, nan bi nji gato mu ne kwop re, sarewo nan bi nji ne satu ma an mbau o re. Nan bi nji, men nut do an muri re, an yo ma o nde, sarewo nan bi nji satu ma ku men sisu ndo o re. Sane men konwa an.’ ”

Lukas 9:60

Yefun Yesus ki nai ye ne do, ”Nan misyar ye gato jam nde Yefun gato bi sukjimnut kwop ne dakai mu bi yekwop mo makwe sor. Wo nan simo Ji, nan mu ki nai yé mwa do, ’Yefun Allah ma jowa men tepsu men bi Yekwesu it anare.’ ”

Yohanes 5:21

Ji bi Ai Yefun Allah anato sun yekwop mbau satu, ete ben ye ne kem ndo to kapyo mato kapyo. Sane dom, An bi Gan to Ji ré ben yetu gato An mit iwa ne kem gesyos.

Yohanes 6:63

Yefun Allah Gen anato ben yetu mbau. Men yetu dakai sor yo nggiwa men ben men mbau nde. Sukdu gato Ji ki nai nin ne anato sukdu gato ma kadit Yefun Allah Gen. Sane sukdu ne anato ben nin mbau.

Roma 4:17

tepsu ye krom mo Yefun Allah bi sukdu, Yefun Allah ki nai Abraham do, ”Ji anato bes nan tepsu ye gato duk os su ketke wa yewis mwa gato kem mo bur ré or sino.” Yefun Allah tom suk su Abraham anato ben sato Abraham tepsu men bi ai re. Abraham onyar kem mo suk gato Yefun Allah ki ne. Abraham jam do Yefun Allah anato nggiwa sun yekwop mbau satu, Yefun Allah nggiwa ut suk gato yo mo nde, Yefun Allah ki sukdu ne sor, bere suk ne bor re.

Roma 6:13

Men bi men gro e, men syim e, men gwes e ne wa benbot sukjimnut ibit ne o nde. Men bi men nggwa wa ben sukdaret o nde, wo men bi men nggwa sino mo Yefun Allah sor. Men anato tepsu ye gato Yefun Allah nai wé kadit os sukkwop wa kem ndo satu. Sane men bi men nggwa sino mo Yefun Allah sor. Men bi men nggwa sino wa men ben suk gato tepsu Yefun Allah mit sor.

Roma 8:11

Yefun Allah gato sun Yesus Kristus kadit sukkwop, An Gen do kem mo nin mit ete nin kwop it yo, bere Yefun Allah waii sun nin da kridek mbau satu. Yefun Allah sun nin da kridek su Yefun Allah Gen bi suktinggi gato kem mo nin mit.

1 Korintus 15:36

Ye gato ki sane jam suk nde. Sukjan gro gato men jan ne i-sar ne dat, orete i-gro gan nggwar pu ete kom re.

1 Korintus 15:45

Sane ye krom mo Yefun Allah bi sukdu do, ”Ye ketke gato gum do Adam, Yefun Allah ben an tepsu ye gato mbau mo bur ré,” wo ye gato men kendo do Adam doga wari ne, An tepsu ye gato ben men mbau sor to kapyo mato kapyo.

2 Korintus 3:6

Yefun Allah anato ben men nggiwa men gwat sukdu subot os be gato Kristus kak wa men ne. Os be bi sukduno-i yo tepsu sukduno gato kam nyim Musa krom ne nde, wo sukduno be ne ma kadit Yefun Allah Gen. Sukduno nyim ne gwat sukkwop wa men, wo sukduno be gato men jam kadit Yefun Allah Gen ne sa, bere kak os wa men mbau to kapyo mato kapyo.

2 Korintus 5:19

Sukdu gato men ki subot anare, Yefun Allah syogat Kristus ma wa kak os wa men yetu si Yefun Allah kem ndo su yu. Yefun Allah fro os ne, An yo nutbot sukibit gato men yetu ben ne o nde. Yefun Allah syogat men mu ki sukdu subot os ne nai yetu mwa ne mo bur ré sino jam sor.

Efesus 2:1

Nin ré, suga nyim nin ben sukdaret, nin ben siri kadit Yefun Allah mit, nin jam nde Yefun Allah, ben sato nin kwop kadit Yefun Allah it.

Efesus 2:11

Sane ji bi nji, ji bi nyanggon, nin yé gato sok mo yewis yi ne, nin napawa suga nyim ye Yahudi ki nin gum ibit sare do, ”Nin, yewis yi gato ye bisunat nde, nin yo sok mo Yefun Allah bi rus-i nde.” Ye Yahudi ki nin gum ibit sane, orete ye Yahudi dakai bes án gum kok, án ki do, ”Men sa, yé bisunat men it, sane Yefun nai men gum sok mo An bi rus-i it.” (Sunat ré anato suk gato yetu dakai ben mo yetu kaim de nden ne sor re.)

Efesus 5:14

we sukru rer ku suk mwa ne sino yo, bere ben sukibit ne rer wa men jam kom mo mit re. Sane ye ki do, ”Nin yé gato sem ne, nin sun tom! Tepsu nin sun satu kadit sukkwop, bere Kristus tepsu sukru rer ku nin.”

Kolose 2:12

Sukjimnut gato tik nin mit wa nin ben sukibit bu ne toko or wé kadit nin anato ye ras nin mo syur dom. Yé bok nin mo syur yo, tepsu nin kwop ete ye bi nin mo bur sato Kristus kwop ete ye bi Kristus mo bur anane. Sane o, nin syesyar kadit syur ne yo, tepsu nin sun kadit sukkwop sato Kristus sun kadit sukkwop ne. Nin sun kadit sukkwop, we nin onyar kem mo Yefun Allah bi suktinggi gato An sun Yesus Kristus su ne.

1 Timotius 5:6

Sarewo nggonna gato ben bi suk-i ket mom í sor, mom da mbau, sarewo Yefun Allah bi sukjimnut mo nggon ne do, nggon ne kwop re.

1 Timotius 6:13

Sane su ré, ji kiwa nan tom suk yo mo Yefun Allah si Yesus Kristus gwem et. Nan tom suk ne mo Yefun Allah gato bi mas mo suk mwa gato mbau mo bur ré ne gwem. Nan tom suk ne mo Yesus Kristus gato ki bi sukdu-i rer mo Pontius Pilatus ne gwem.

Ibrani 6:1

Sane it yo, men yo krom sukdu subot Yesus Kristus mo i-ke ne o nde yei. Sukdu gato ndaf mo i-ke ne tep wa ye gato jam Yefun sim, tepsu pabom da sus rom sim, wo ré ne, men ki subot sukdu gato kru o et. Men krombot sukdu kru gato tep wa yenggras mo Yefun Allah bi sukdu-i ne et. Men krombot sukdu gato ndaf mo i-ke ne o nde yei, sukdu bok gato mo i-ke, men kibot mó re, sato ré do, men kwet kadit sukibit gato men ben ne, ete men ben suk tepsu ye gato onyar kem mo Yefun Allah ne sor.

Ibrani 9:14

Sane kambing si sapi dé-i, si sapi gato ye gre ne bi bofuf-i ne do nggiwa ós nje subere yé ne si Yefun Allah kem ndo su yu satu o it yo, bere Kristus dé-i ne te, sa u ne? Kristus dé-i nggiwa ós men wai kadit sapi dé-i ne o re fe! Yefun Allah Gen gato gesyos ne ben Kristus nggiwa Kristus dakai bi An nggwa mo Yefun Allah, An dé sye tepsu suktot win men. Kristus ben sukibit wokgan yo dom nde, sane suktot ne tep mó re. Kristus dé sye anato sombok men bi sukjimnut mo men mit ne wé kadit os gato nyim ne bi sukdu-i, subere men nutbot suk mone o nde, wo men bi sukjimnut sye mo suk gato Yefun Allah gato gesyos ne iwa men ben ne sor.

Yakobus 2:17

Sane men ki do, men onyar kem mo Yefun, sarewo men yo ben suk gato Yefun ki ne nde yo, bere yo ós ye yo mo nde. Men syokwet wik sor re, wo suk yo mo nde.

Yakobus 2:20

Nin gare jam suk nde go! Te, ji ben sa u subere nin jammo sukdu ré ne? Ye gato ki do, an onyar kem mo Yefun Allah yi sor re, wo an yo ben suk gato Yefun ki ne nde yo, suk gato an ki ne yo ós an nde. An onyar kem mo Yefun sisu sangge anane nde.

Yakobus 2:26

Yetu gato kaim mó, sarewo an gen mu kadit it yo, an yo mbau o nde, ye ne kwop it anane. Sane dom, men ki do, men onyar kem mo Yefun Allah, sarewo men yo ben suk gato Yefun ki ne nde yo, men tepsu yetu gato kwop, men onyar kem mo Yefun sisu sangge anane nde.

1 Yohanes 2:12

Ji krom sukdu ré wa nin, ji bi pá, we men jam do, Yefun Allah yo maskwa nin mo sukibit gato nin ben ne o nde. An yo nutbot sukibit ne o nde, we Yesus Kristus tot wé re.