Kolose 2:11 - Abun Scripture

¹¹ Nin si Kristus tepsu dik it, sane tepsu ye bisunat nin it anane. Sunat gare yo tepsu sunat gato yetu ben mo yetu kaim ne nde, wo sunat ne ma kadit Kristus. Sunat gato ma kadit Kristus ben sato kum nin bi sukjimnut gato tik nin mit iwa nin ben sukibit bu ne toko wé re.

Kolose 2:11 ပူးပေါင်းရင်းမြစ်များ

Markus 14:58

Yé ne ki do, ”Men jam Ye ré ki do, ’Bere Ji tarak Yefun Allah bi nu gato yetu nggo ne, orete kam gri rek Ji nggo satu re. Bere nu be ne tara o re, yetu yo nggo nde.’ ”

Lukas 2:21

Maria kem su Pa ne or, kam munggwo rek eteyo, yesu mo nu ari bisunat Pa ne. Yesu ne tot Pa da naprut wé, ete Maria si Yusuf kendo Pa ne gum do, Yesus, tepsu gum gato malaikat ki nai Pa bi im sugato Pa bi im yo pe Pa nde tó.

Suk Gato Yerasul Ben Ne 17:24

Yefun Allah gato ut bur ré si suk mwa mone, An sa, An jowa bur ré si gu nim ne sino. Yefun Allah ne yo kem mo nu gato men yetu nggo ne nde.

Suk Gato Yerasul Ben Ne 7:48

Salomo da nggo nu wa Yefun Allah, sarewo Yefun Allah gato gum kok sye wai o re, An yo kem mo nu gato men yetu nggo nde, we yenabi dik yo krom suk gato Yefun Allah ki sare do,

Roma 2:29

Wo sare, ye gato mit dik wa ye Yahudi bi suk-i anato ye Yahudi gato sangge. Sane dom, ye gato simo sunat mo an mit anato simo sunat gato sangge. Yefun Allah Gen bisunat an mo an mit, yetu yo bisunat an tepsu sukdu mo Musa bi buku ne nde. Sane yetu yo un ye gato simo sunat sangge nde, wo Yefun sa, bere un ye ne re.

Roma 6:6

Men jam do, men bi suk-i gato men ben suga nyim ne ben sato kwop si Yesus Kristus mo bi kwesukwin or wé kadit men re. Sane bere sukibit gato men ben nyim ne yo jom men o nde, men yo tepsu pakwerut wa ben sukibit ne o nde.

Roma 7:24

Sane ji dakai mit iwa ji tepsu pakwerut wa benbot Yefun Allah bi sukduno-i, wo ji bi sukjimnut ibit mo ji mit ne, ben ji sane sor ji tepsu pakwerut wa ben sukibit bu. Sane, ji yo ndo o nde it. Je u anato bere nai ji wé kadit sukjimnut ibit gato jom ji dakai ete gwat ji mu kadit os sukkwop ré ne? Ji ki ndo mo Yefun Allah, we Yefun fro os mó re. An sa, syo men bi Yekwesu Yesus Kristus ma wa fro os wa men re. An fro os wa nai ji kadit sukjimnut ibit gato jom ji ne, sane ji ki ndo mo Yefun Allah sor.

2 Korintus 5:1

Men kaim ré tepsu nu ti gato men kem mó, mo bur ré. Sane men jam do, nu ti ne ye do rus wé it yo, bere Yefun Allah fro nu be wa men mo gu. Yetu yo nggo nu mo gu nde, wo nu gato Yefun Allah dakai fro wa men mone bere kem krat to kapyo mato kapyo.

2 Korintus 5:17

Sane men si Yesus Kristus tepsu dik it yo, men anato ye gato be o re. Men yo simo os ibit saga nyim ne o nde, wo men simo os be mo suk mwa ne sino o re.

Galatia 2:20

Ben sato ji si Yesus Kristus kwop sino mo kwesukwin it. Sane ji dakai anato kem ré nde, wo Yesus Kristus anato kem mo ji mit. Ji onyar kem mo Yefun Allah bi Gan gato bi sukjimnut sye kas subot ji ete bi An nggwa kwop wa ji anato ji nggiwa ji kem mo bur ré re.

Galatia 5:24

Ye gato sok mo Yesus Kristus bi nje-i it yo, ye ne bare sukjimnut gato tik an mit wa ben sukibit ne or wé kadit an re. Sukjimnut ne ben sato an mban mo kwesukwin, ete sukjimnut ne kwop or wé kadit an. An yo iwa ben suk ket an i o nde. Suk gato tik an mit wa an ben sukibit ne an bare wé re.

Efesus 4:22

Sane suk gato nin ben nyim neya, nin bare wé et. Su kam nyim nin sibot nin dakai bi sukjimnut daret. Sukjimnut ne gwat nin ges mo os ibit mo koirut, sane nin bare sukjimnut ne wé et.

Filipi 3:3

Men ré anato yé gato simo sunat gato sangge, wo án yo simo sunat gato sangge nde re. {Men yo onyar kem mo suk gato án ben sato sunat nde. Ye Israel gato simo sunat, án nut do, án sok mo Yefun Allah bi rus-i it anane. Sarewo sunat ne ye ben mo men kaim de nden ne sor re.} Wo men sa, Yefun Allah Gen bok nggwa mo men anato men bes Yefun Allah gum kok. Men si Yesus Kristus tepsu dik ete men un An, sane men sok mo Yefun Allah bi rus-i mone it, tepsu ye bisunat men sisu sangge anane. Men yo onyar kem mo sunat gato yetu ben mo men kaim de nden ne nde.

Kolose 3:5

Bere nin si Kristus kem ndo sino, sane anato sukibit gato nin iwa nin ben mo bur ré, nin bare wé et. Nin bare sukibit gato jom nin ne wé sato ré: yebris si nggon ben siri su yu daret e, nin da bro wa ben sukdaret ket nin í e, nin da bro wa nggon bu e, nin bi sukjimnut nggiwa men nin sukibit bu e, nin gro sye wa nai suk mwa wa nin dakai sor e ne. (Nin gro sye wa nai suk mwa ne yo, tepsu nin onyar kem mo suk daret wai kadit Yefun Allah ne o re.)

Ibrani 9:11

Suga nyim ne ye fro suk mwa mo nu kemah ne, sarewo su ré, Kristus ma tepsu Yekwesu gato gum kok wai mo nu kemah gato tara o re. Nu kemah gato Kristus ben suk mone, yo tepsu nu gato yetu nggo nde. Nu ne yo sok mo suk mwa gato Yefun Allah ut mo bur ré nde. Nu ne ndo wai kadit nu kemah nyim gato mo bur ré re. Nu ne ndo wai o re, pe yo gwet mo nde. Kristus tepsu Yekwesu gato gum kok wai mo Yefun Allah bi nu mo gu ne o re. Kristus gwat os ndo wa men it.

Ibrani 9:24

Kristus dé anato win suge dé mo nu mo gu ne re. Sane anato Kristus yo sok mo nu kemah gato yetu nggo mo bur ré nde. Nu mo bur ré tepsu sukkran subot nu gato sangge mo gu ne sor re. Sane Kristus yo sok mo nu mo bur ré nde, wo Kristus dakai sok mo nu mo gu ne, anato su ré, An ki suk tepsu yegweswai su Yefun Allah wa men yetu mone.