Kolose 1:5 - Abun Scripture

⁵ Nin jam sukdu subot os ndo gato Yesus Kristus kak ne, sukdu ne sangge, Yefun Allah fro suk gato ndo wa bere nin ku mo gu. Nin bi sukjimnut kem pe mo sukdu ne, sane anato nin onyar kem pe mo Kristus ete nin bi sukjimnut sye kas subot Yefun Allah bi rus-i ne.

Kolose 1:5 ပူးပေါင်းရင်းမြစ်များ

Lukas 12:33

Sane nin mu nin so nin bi suk mwa gato nin ku ne, orete sugum gato nin ku mone nin syo nai ye gato yo ku suk yo mo nde, sane bere nin ku suk mwa mo gu. Nin do ben sane, bere tepsu nin grem nin bi suk mwa ne mo gu, tepsu nin bok mbre mo sun bafar gato kem to kapyo. Nin ku suk mwa mo gu ne, suk mwa ne kem pe, yo or nde. Sane dom ye yo ku os wa sok mo gu ete gitsi nin bi suk nde. Kundun yo ku os wa ben suk ne ibit dom nde.

Suk Gato Yerasul Ben Ne 10:36

Yefun Allah taru sukdu subot men ye Israel ne do, An syogat Yesus Kristus ma mo bur ré wa kak os ndo wa men yetu subere Yefun Allah nai men gum sok mo An bi rus-i. Sane Yesus Kristus gato gum Yekwesu wa men sino ne kak os wa men si Yefun Allah kem ndo su yu re. Nin dakai jam sukdu ne mó re.

Suk Gato Yerasul Ben Ne 13:26

Paulus ki o do, ”Ji bi nji, men yé gato bi amui mo Abraham si nin yewis yi gato som Yefun Allah, men sino anato jam suktaru gato ma kadit Yefun Allah sare do, Yefun Yesus ma mo bur ré wa kak os ndo wa men subere men kem ndo to kapyo mato kapyo.

Suk Gato Yerasul Ben Ne 23:6

Paulus jam do yepasye mone deyo ye Farisi, deyo ye Saduki, sane an ki nai yepasye bok ne sino do, ”Ji bi nji, ji anato sok mo ye Farisi. Ji bi ai ye Farisi dom. Ye gwat ji ma more wa ndobot ji mo sukduno dik yo gato ji kwabom kam mo, sare do, ye gato kwop, bere Yefun Allah sun kadit sukkwop re.”

Suk Gato Yerasul Ben Ne 24:15

Sane dom, yé gato ndak ji ré, án kwabom kam mo Yefun Allah sare do, bere Yefun Allah sun men yetu bok ne sino – ye gato ben bi suk-i ndo si ye gato ben bi suk-i ibit. Ji dom ji kwabom kam mo Yefun Allah do, bere An sun men yetu sino kadit sukkwop.

Roma 10:8

Sarewo men yé gato simo os ndo gato Kristus kak ne, men ki sare do, ”Sukdu subot Kristus ne ma kom mo nin it, nin ki subot sukdu ne petok sor, nin grem sukdu ne pe mo nin mit mó re.” Sukdu gato men ki frekbot nin anato nin onyar kem mo sukdu subot Yesus Kristus sor.

1 Korintus 13:13

Sane su ré yo, men benbot suk gri sato ré do, men onyar kem mo Yefun Allah; men kwabom kam mo Yefun do, bere men si Yefun Allah kem ndo su yu sor; si men bi sukjimnut sye kas subot ye yi sor. Men benbot kwa gri ré petok sor. Kadit kwa gri ne, kwa gato sye wai anato men bi sukjimnut sye kas subot ye yi.

1 Korintus 15:19

Sane o men yé gato kwabom kam mo Kristus do, bere An ós men kem ndo to kapyo, sarewo sato Kristus sun kadit sukkwop nde yo, Kristus os men suga men kem mo bur ré sor re, wo An yo ós men kem ndo to kapyo mato kapyo nde. Sane bere kadit yetu mwa ne sino mo bur ré iwedewe, yé mwa ne kibot men do, ”Kamapa, yé bok ne sibot os gato yo mu kom mo pe yo nde, os koirut yo mo nde.”

2 Korintus 5:19

Sukdu gato men ki subot anare, Yefun Allah syogat Kristus ma wa kak os wa men yetu si Yefun Allah kem ndo su yu. Yefun Allah fro os ne, An yo nutbot sukibit gato men yetu ben ne o nde. Yefun Allah syogat men mu ki sukdu subot os ne nai yetu mwa ne mo bur ré sino jam sor.

2 Korintus 6:7

Men ki subot Yefun Allah bi sukdu gato sangge, men kadum An bi suktinggi ne nai ye ne dom, subere ye jam do, men anato Yefun Allah bi pakwerut. Men benbot suk gato Yefun Allah iwa men ben ne yo, ben sato men jom sukmise wa men syun sukibit titi ko kadit men anane. Men jom sukmise ne subere ye yo ma wa ki men gum ibit yo, men gwa wa men nggwa kadit sukdu daret gato ye kiket men mone.

Galatia 2:14

Ji do me suk gato Petrus si ye Yahudi gane ben ne siri kadit Yesus Kristus bi os-i sa, ji ki Petrus mo yé mwa gwem do, ”Nan ye Yahudi, sarewo nan misyar ye Yahudi bi sukduno-i, ete nan ben suk tepsu yewis yi o re. Suk gato nan ben ne da ndo, sarewo suma ben anato nan wergat yewis yi brek ma ete jammo ye Yahudi bi sukduno-i gato nan misyar wé ne?”

Galatia 2:5

Sarewo men yo iwa jammo án bi sukdu-i wokgan yo dom nde. Men wergat men nggwa subere men yo fros sukdu rok si sukdu gato sangge subot os ndo gato Yesus Kristus kak ne nde, subere sukdu gato men duno nin su ne sangge sor, kwa wokgan gato siri yo mo nde.

Galatia 5:5

Wo men ré sa, men onyar kem mo Kristus, sane men kwabom kam mo Yefun Allah Gen do, bere An ós men sok mo Yefun Allah bi rus-i, bere men si Yefun Allah kem ndo su yu mo pe gato ndo tó.

Efesus 1:13

Nin ye Efesus dom jam Yefun Allah bi sukdu subot os ndo gato Yesus Kristus kak ne. Sukdu ne ós nin kem ndo to kapyo mato kapyo. Nin jam, orete nin onyar kem mo Yesus Kristus, sane anato nin sok mo Yefun Allah bi rus-i ne it. Nin onyar kem mo Kristus, sane Yefun Allah bok An Gen mo nin tepsu An tom ne, subere yé jam do, nin anato Yefun Allah bi pá-i it.

Efesus 4:21

Nin onyar kem mo An, sane nin jam sukdu subot An mó re. Yé duno nin su sukdu gato sangge mó re anato nin jam suk gato An iwa nin ben ne.

Kolose 1:23

Nin onyar kem mo sukdu subot os ndo ne tepsu jam biro kom mo kwe guk ne yo, bere Yefun Allah nai nin gum sok mo An bi rus-i. Nin brek kadit os ndo ne nde, wo nin jom sukdu ne krat yo, bere nin si Yefun Allah kem ndo mo An bi nat-i. Sukdu ne anato sukdu gato yé ki nai nin jam re. Sukdu ne, yé mu ki frekbot bur ré iwedewe re. Ji gato gum do Paulus ré anato tepsu pakwerut wa ji mu kibot sukdu ne.

Kolose 1:27

Yefun Allah iwa An bi rus-i gato ma kadit yewis yi neya jam sukdu gato ndo ré, gato nyim tuya An gurik ne. Yefun Allah iwa yetu mwa ne sino jam An bi sukdu ré gato bi sukjimnut kru ete ndo wai ne. Sukdu gato suga nyim An gurik ne anato sukdu subot Yesus Kristus gato ma ete si nin tepsu yedik sino. Men kwabom kam mo Yesus Kristus gato kak os ndo wa men kem mo Yefun Allah bi nat-i gato ndo wai o re.

Kolose 3:16

Kristus bi sukduno-i gato ndo wai ne, nin nai ma nin grem pe mo nin mit si nin onyar et. Nin grem Kristus bi sukduno-i ne pe mo nin mit or wé ete nin duno yu e, nin ki suknapa wa yu e ne. Nin do ki Kristus bi sukduno-i nai yu yo, nin nutbot suk ne pare et. Nin kos sukos mazmur e, nin kos sukos gato nin un Yefun su si sukos gato Yefun Allah Gen ben nin mit it wa nin kos ne. Nin kos, ete nin mit at wa Yefun Allah dom et.

1 Tesalonika 2:13

Men ki ndo mo Yefun Allah mo suk dik yo o gato nin ben ne, sare do, tomgato men ki Yefun Allah bi sukdu nai nin jam, nin nai sukdu ne tepsu yetu bi sukdu-i nde, wo nin nai sukdu ne tepsu Yefun Allah bi sukdu-i. Sangge, sukdu ne ma kadit Yefun Allah. Yefun Allah bi sukdu-i ne kak nin yé gato onyar kem mo Yesus Kristus ne bi sukjimnut-i subere nin nggiwa nin ben An bi suk-i ne sor.

2 Tesalonika 2:16

Men bi Yekwesu Yesus Kristus, An dakai si men bi Ai, Yefun Allah gato bi sukjimnut sye kas subot men ne, Yefun dakai bi sukjimnut sye kas subot men anato An ós men kem ndo to kapyo mato kapyo. An kak men bi sukjimnut anato men kwabom kam mo An do, sangge, bere An ben sukndo su men sino.

1 Timotius 1:15

Sukdu gato ji ki ré suksangge, men nai ma, men grem kem pe mo men mit sor, sare do, ”Yesus Kristus ma mo bur ré wa ós men yetu gato ben sukibit, subere men ges mo bot gesyos nde, wo men kem ndo to kapyo mato kapyo.” Mo yé mwa gato ben sukibit mo bur ré, ji anato ben sukibit mwa wai kadit yé mwa ne sino o re.

2 Timotius 4:8

Ré yo, Yefun Allah fro suk gato bere An syo nai ji mo suk gato ji ben ne, Yefun fro ndek. Bere kam gato bur ré kru re, men bi Yekwesu Yefun Yesus ma ndobot men yetu mo bur ré. Bere Yefun ndobot men sisu ri-roi sor. Bere Yefun syo suk gato An fro ne nai ji mo suk gato ji ben tepsu An mit re. Bere An syo suk gato An fro ne nai ji wadigan sor nde, wo An syo nai ye gato eswa Yefun Yesus satu ma mo bur ré su án mit iwa wai ne dom.

Titus 1:2

Án jammo Yefun Allah, we án kwabom kam mo Yefun Allah do, bere Yefun nai án gum sok mo Yefun bi rus-i, bere án si Yefun kem ndo to kapyo mato kapyo, tepsu Yefun Allah tom su men sugato An ut bur ré nde tó. Suk gato Yefun Allah tom su men ne, bere An benbot sor, An yo kidar nde.

Ibrani 7:19

Sukduno ne yo ós ben suk yo ndo mo nde. Sane su ré Yefun Allah fro os gato ndo wai wa men o re. Men kwabom kam mo Yefun Allah do, sukduno be gato An fro ne anato kak os wa men subere men karowa Yefun Allah it.

1 Petrus 2:2

Sarewo nin mit iwa Yefun Allah bi sukdu ne tepsu pabom er sosa wa da bi im sus et. Sane bere nin nggiwa nin ben nin bi suk-i tepsu Yefun Allah mit nggi wai kadit nyim ne, ete Yefun nai nin sok mo An bi rus-i.

1 Petrus 3:15

Sarewo nin jammo Yesus Kristus su nin mit dik si nin onyar dik, nin jammo An tepsu nin bi Yekwesu gato gum kok wai o re. Nin fro nin nggwa ndek, sawe ye ndobot nin do, ”Suma ben anato nin kwabom kam mo Yesus Kristus ne?” Nin fro nin nggwa ndek su sukdu gato bere nin ki nai ye ne jam, nin fro sukdu ne nyim wé et.

2 Petrus 1:12

Sane anato ji ki suknapa wa nin subere nin simo sukdu gato ji krom more petok sor. Nin da jam sukduno ne kom mo mit, ete nin onyar kem mo sukduno ne, sarewo ji ki suknapa wa nin petok sor.

1 Yohanes 3:3

Ye gato kwabom kam mo sukdu gare gato bere bor ne, bere an mewa an nggwa subere an yo ben sukibit o nde, wo an ben an bi suk-i ne ndo sor, tepsu Yesus Kristus dakai ben ne.