Kolose 1:23 - Abun Scripture

²³ Nin onyar kem mo sukdu subot os ndo ne tepsu jam biro kom mo kwe guk ne yo, bere Yefun Allah nai nin gum sok mo An bi rus-i. Nin brek kadit os ndo ne nde, wo nin jom sukdu ne krat yo, bere nin si Yefun Allah kem ndo mo An bi nat-i. Sukdu ne anato sukdu gato yé ki nai nin jam re. Sukdu ne, yé mu ki frekbot bur ré iwedewe re. Ji gato gum do Paulus ré anato tepsu pakwerut wa ji mu kibot sukdu ne.

Kolose 1:23 ပူးပေါင်းရင်းမြစ်များ

Markus 16:15

Orete Yefun Yesus ki nai An bi pakon do, ”Nin mu mo yewis mwa ne sino mo bur ré iwedewe. Nin mu ki sukdu subot os ndo gato Yefun Allah fro wa yetu subere yé ku os wa yé gum sok mo Yefun Allah bi rus-i.

Lukas 22:32

Sarewo Simon, Ji ndek Yefun Allah wa ós nan, subere nan onyar kem pe mo Ji mo sukye ne, subere nan misyar Ji nde. Kapre nan ges mo os ibit mo sukye ne yo, bere nan kwet kadit, ete nan duno nan bi nji mo Yefun Allah bi rus-i, subere án onyar kem mo Ji nggi wai kadit nyim ne o re.”

Lukas 6:48

Ye ne anato tepsu ye gato jam suk, ete an nggo an bi nu mo jok. An rom bur wak kru mu kom mo jok mo bur, ete an syut kwedi mo jok gato krat mone. Nu ne an nggo krat mo jok, sane syur syé do ma pet mo nu ne yo, nu ne yo e nde.

Yohanes 15:6

Ye to yo ut krat mo Ji tepsu dik nde yo, ye ne tepsu kweguk gato yé tot, ete yé am wé. Bere kweguk ne gu, ete yé sum wa yé gre mo bot wé.

Suk Gato Yerasul Ben Ne 1:17

Yudas gato Yefun Yesus bes gum yerasul ne, an si men ben suk sino.”

Suk Gato Yerasul Ben Ne 1:25

subere ye ne ben Nan bi suk-i tepsu yerasul win Yudas gato misyar Nan bi suk-i, ete ku sukye re.”

Suk Gato Yerasul Ben Ne 1:8

wo su kam gato Yefun Gen bok nggwa mo nin, bere nin ku suktinggi wa nin mu ki sukdu subot os be gato Ji kak wa yetu sok mo Yefun Allah bi rus-i. Bere nin mu ki sukdu ne nai nje mo Yerusalem, mo bur Yudea, mo bur Samaria sane sor, kom mo bur ré iwedewe or sino.”

Suk Gato Yerasul Ben Ne 11:23

Barnabas mu kom motu sa, an me sukndo gato Yefun Allah dakai ben su yewis yi gato onyar kem mo Yefun Yesus mone. An me do, Yefun Allah ós yé ne ben suk tepsu Yefun Allah mit. Barnabas mit iwa suk gato an me ne. Barnabas ki do, ”Nin mit dik wa Yefun Yesus sor, nin brek kadit Yefun Yesus bi os gato ndo ne nde.”

Suk Gato Yerasul Ben Ne 2:5

Tomgane ye Yahudi mwa gato jammo Yefun Allah kadit bur ré iwedewe ma kem mo Yerusalem.

Suk Gato Yerasul Ben Ne 20:24

Sarewo ji yo bi sukjimnut subot ji dakai teker eta nde, wo ji nut mo suk gato Yefun Yesus syogat ji ben anato sye. Ji werwa ji ben suk gato men bi Yekwesu Yesus Kristus syogat ji ben ne, ji werwa ji ben wa pe sane sor, dakai or su. Yesus Kristus syogat ji mu ki sukdu subot os ndo gato Yesus Kristus kak wa men yetu nai nje jam. Kapre men yetu yo ben suk yo nyim wa An nde, Yefun Allah dakai bi sukjimnut sye kas subot men anato An fro os ndo wa men yi sor.

Suk Gato Yerasul Ben Ne 26:16

Ré ne nan sun et. Ji kadum Ji nggwa nai nan wa Ji bes nan tepsu Ji bi pakwerut, Ji bes nan wa nan mu ki sukdu subot Ji nai nje jam. Nan ki sukdu gato nan me su nan gro si suk gato bere Ji kadum nai nan dom.

Suk Gato Yerasul Ben Ne 4:12

Yefun Yesus ka dik sor anato kak os ndo wa nai men wé kadit bot gesyos, subere men kem ndo to kapyo mato kapyo. Yetu yi yo mo nde, kadit yetu mwa ne sino, Yefun Yesus An ka dik sor anato nggiwa kak os ndo wa men kem gesyos.”

Roma 10:18

Sarewo ji ndo mó do: Sangge, ye Israel jam sukdu subot os ndo ne nde tó bado? Nde re, án jam it, we ye krom mo Yefun Allah bi sukdu do, ”Yé ki sukdu ne frekbot bur ré iwedewe it. Án bi sukdu-i ne kas kom mo pe mwa ne or sino re.”

Roma 15:16

Ji anato tepsu Yesus Kristus bi pakwerut gato An syogat mu ki subot An bi sukdu nai yewis yi neya. Ji ben suk tepsu yegweswai gato gwat Yefun Allah bi sukdu subot os ndo gato Yesus Kristus kak ne mu wa ki nai yewis yi jam. Ji mu ki sukdu ne subere yewis yi ne brek kadit os ibit ete jammo Yefun Allah yo, bere án tepsu suksom gato tep wa yé som Yefun Allah su ne, bere Yefun Allah kak Yefun Allah mit wa án.

Roma 2:7

Ye gato werwa ben bi suk-i ne ndo, we ye ne kwabom kam mo Yefun Allah do, bere Yefun bes án gum kok mone yo, bere Yefun un án gum mone, bere Yefun kak os wa án kem gesyos mone, bere Yefun Allah kak os wa yé ne kem ndo to kapyo mato kapyo.

Roma 5:5

Men kwabom kam mo Yefun Allah sane bere men damen mone nde, we bere suk gato An tom ne bor mone tó, we men jam do, Yefun Allah Gen gato bok nggwa mo men anato kadum nai men do, Yefun Allah bi sukjimnut sye kas subot men re.

1 Korintus 15:58

Sane, ji bi nji, ji bi nyanggon gato ji jimnotku, nin misyar Yefun nde, wo nin jom Yefun Yesus bi sukdu ne krat sor. Nin samok wa ben men bi Yekwesu Yesus Kristus bi suk-i sor, we nin jam do, suk mwa ne sino gato nin ben wa An ne yo ges yak yi nde.

1 Korintus 3:5

Je u anato ji ne? Je u anato Apolos ne? Nin bes men ka we gum kok nde. Men ka we anato Yefun Allah bi pakwerut gato ós nin sor. Men ka we ki sukdu gato ós nin nai sukjimnut subere nin brek kadit os ibit, ete nin onyar brek ma kem mo Yesus Kristus. Men ka we dakai benbot suk gato men bi Yekwesu syogat men kadik-kadik ben ne sor re.

2 Korintus 10:1

Ji dakai, gato gum do Paulus, ji kiwa nin jammo suk gato ji ki ré et. Ji jam do, yé bok yo ki ji gum ibit. Yé bok ne ki do, ji si nin mone yo, ji ki ji bi sukdu-i nai nin sisu ji nyu sor, wo ji kem os syu kadit nin yo, yé bok ne ki do, ji krom ji bi sukdu-i nai nin ne krat yé. Kristus bi sukjimnut-i ndo wa men, An ben An bi suk-i ne njep su men,

2 Korintus 11:23

Yé ne, Kristus bi pakwerut-i bado? Ji ré, Kristus bi pakwerut-i dom, sarewo ji ben ji bi suk-i ndo wai kadit yé mwa ne o re. (Mban! Ji ki ji bi sukdu-i ne tepsu ye gato jimgon ko ré go!) Sarewo ji samok wa ji ben suk mwa wai kadit yé bok ne o re. Ji ré anato ye sok mo sel wam bok yo mó re, mwa wai kadit án o re. Ye kwam kete is ji wam bok yo mó re, mwa wai kadit án o re. Ji ré anato ku sukye mwa wam bok yo mó re, karowa ji kwop rok. Ji ku sukye mwa wai kadit án o re.

2 Korintus 3:6

Yefun Allah anato ben men nggiwa men gwat sukdu subot os be gato Kristus kak wa men ne. Os be bi sukduno-i yo tepsu sukduno gato kam nyim Musa krom ne nde, wo sukduno be ne ma kadit Yefun Allah Gen. Sukduno nyim ne gwat sukkwop wa men, wo sukduno be gato men jam kadit Yefun Allah Gen ne sa, bere kak os wa men mbau to kapyo mato kapyo.

2 Korintus 4:1

Yefun Allah dakai jimnotku men anato An bes men wa men gwat Yefun bi sukduno-i mu ki nai nje jam. Sane men misyar wokgan yo dom nde, men kibot sukdu ne petok sor.

2 Korintus 6:1

Men anato ye gato ben Yefun Allah bi suk-i, sane men ki nai nin do, nin kamo su os ndo gato Yefun Allah dakai fro yi wa nin nde. Yefun Allah dakai fro os ne wa nin, nin yo ben suk yo nyim wa An nde, sane nin misyar os ndo ne nde, wo nin simo os ne sisu sangge sor.

Galatia 4:11

Sane ji nutbot nin ndo nde, ji da wergat ji nggwa wa duno nin ware, sukdu gato ji duno nin su ne yo ós nin kom mo pe yo nde bado?

Galatia 5:5

Wo men ré sa, men onyar kem mo Kristus, sane men kwabom kam mo Yefun Allah Gen do, bere An ós men sok mo Yefun Allah bi rus-i, bere men si Yefun Allah kem ndo su yu mo pe gato ndo tó.

Galatia 5:7

Tomgato nyim sa, nin werwa nin sibot os gato sangge ré, wo su ré, je u anato ma duyawa suk gato nin ben, ete werwa brek nin wé kadit Yefun Allah bi os-i gato sangge ne?

Galatia 6:9

Sane men bambrai wa men ben sukndo petok nde, men syim syu wa nde. Men misyar dom nde, men werwa sane sor, bere tepsu bi kam-i, men ku suk gato ndo kadit Yefun mone tó.

Efesus 1:18

Ji ki suk su Yefun, ji ndek mo Yefun Allah subere Yefun kak nin bi sukjimnut-i ne rer, subere nin kwabom kam mo Yefun Allah gato nai nin sok mo An bi rus-i ne. Ji ki suk su Yefun subere Yefun Allah kak nin bi sukjimnut subere nin jam subot suk mwa gato ndo wai, si suk mwa gato Yefun Allah fro wa An syo nai yé gato onyar kem mo Yefun Yesus ne.

Efesus 2:21

Yefun Yesus dakai anato nggo nu ne sino, subere nu ne ndo wai o re. An fro nu ne dor tep wa men bi Yekwesu Yesus Kristus dakai bi nu-i ne sor.

Efesus 3:17

subere Yesus Kristus kem pe mo nin mit si nin onyar, we nin onyar kem mo Kristus re. Sane dom, ji ki suk su Yefun Allah wa nin mo suk mwa gato nin ben ne, subere nin bi sukjimnut sye kas subot nje petok sor, ben sato sukjimnut ne jom nin, ete nin bi nin nggwa wa nje tepsu Kristus bi An nggwa ne.

Efesus 4:16

Men anato tepsu yetu gwes e, syim e, tunap e ne mo kaim ne. Men dini rit ne ós jom men kaim ne tok yu krat ete ut mo men su. Men su anato Kristus. An jom pe mwa mo kaim ne sino subere men tepsu dik wa men ben Yefun bi suk-i. An jom men, sane bere suk gato men ben ne kas sisu ndo, bere men bi sukjimnut sye kas subot yu mwa o mone, gedik-gedik dakai ben bi suk-i tara kadit yu nde, wo men ben suk mwa ne wa men kaim kom sye o, nggi o sor.

Kolose 1:25

Yefun Allah bes ji tepsu pakwerut wa ós nin. An syogat ji ki subot An bi sukdu mwa ne ai nje jam or sino, kwa yo gwet mo nde.

Kolose 2:7

Nin onyar kem pe mo An sato kwebrot marum kom krat mo bur ré ne et. Mo suk mwa gato nin ben ne, nin jammo An pe. Nin onyar kem mo An nggi o et, tepsu sukduno gato yé duno nin su ne. Nin ki ndo mo Yesus Kristus wam dik sor nde, wo nin ki ndo mo An petok sor.

1 Tesalonika 3:3

Sane kapre men sino ku sukye, nin yo brek kadit Yefun bi os-i nde. Nin dakai jam do, Yefun Allah fro sukye wa men sino ku re.

1 Tesalonika 3:5

Sane ji jimnotbot nin ndo nde anato ji syogat Timotius ba ku nin mone. Ji syogat an ba ku nin subere an jam kret nin do, nin onyar kem mo Yesus Kristus tó bado nde e? Ji nokwa sawe biris bi yekwesu meret os wa nin sawe ben nin ges mo os ibit re. Sane bere suk mwa gato men ben su nin yo ós nin o nde.

1 Tesalonika 5:8

Sarewo men ré anato tepsu ye gato ben bi suk-i su nombrak. Sane men mewa men nggwa su sukjimnut gato ndo sor. Men onyar kem mo Yefun, men bi sukjimnut sye kas subot ye yi anato tepsu men it san gato krat kewa men kaim, san krat ne mewa men. Sane dom, men kwabom kam mo Yefun do, bere An ós men kem gesyos anato tepsu men bom topi krat kewa men su.

2 Tesalonika 2:16

Men bi Yekwesu Yesus Kristus, An dakai si men bi Ai, Yefun Allah gato bi sukjimnut sye kas subot men ne, Yefun dakai bi sukjimnut sye kas subot men anato An ós men kem ndo to kapyo mato kapyo. An kak men bi sukjimnut anato men kwabom kam mo An do, sangge, bere An ben sukndo su men sino.

1 Timotius 1:12

Ji ki ndo mo men bi Yekwesu Yesus Kristus. An syo suktinggi nai ji wa ji ben An bi suk-i re. An nut mo ji do, ji sa, bere ben An bi suk-i ri tepsu An mit anato An bes ji wa ji ben An bi suk-i re,

1 Timotius 2:7

Sane anato Yefun Allah bes ji gum yerasul wa ji mu ki sukdu ne frekbot nje. Sangge, ji yo kidar nde, Yefun Allah syogat ji mu wa ji ki subot sukdu ne nai ye Yahudi sor nde, wo An syogat ji mu wa ji ki subot sukdu ne nai yewis yi neya mo bur ré jam.

1 Timotius 3:16

Suk gato men krom ré suksangge, men bi sukduno gato nyim neya Yefun Allah gurik ne ndo wai o re, sato ré: Yefun Yesus ma mo bur re, An kaim tepsu yetu kaim. Yefun Allah Gen kadum do, Kristus sa, ben bi suk-i ne sangge sino. Malaikat mwa ne sino me An re. Yé ki sukdu subot An frekbot yetu wisyo-wisyo. Yé mwa mo bur ré iwedewe onyar kem mo An re. An it mo gu nim, mo pe gato ndo wai o re.

Titus 3:7

Yefun Yesus dakai ben sukndo su men yi, men yo ben suk yo nyim wa An nde, anato An yo ben sukye nai men tepsu sukibit gato men ben ne nde, wo An ki do, men sa, tep wa sok mo Yefun Allah bi rus-i. Sane anato suk gato men bi sukjimnut kem pe mone do, bere men kem ndo to kapyo mato kapyo ne yo, men jam men ku it.

Ibrani 10:38

Wo Ji bi rus-i gato ben bi suk-i tepsu Ji mit, bere án onyar kem mo Ji anato án kem ndo; sarewo án ge dik yo do brek dari tak Ji it yo, bere Ji yo iwa ye ne nde.”

Ibrani 3:14

Tepsu men onyar kem pe mo Yefun Yesus su ketke ne, men waii werwa men onyar kem pe mo Yefun sane sor kom mo pe gato or mó. Sane bere men sino si Yesus Kristus tepsu dik mo suk mwa gato An ben ne.

Ibrani 3:6

Sarewo Kristus, An tepsu pakwerut sato Musa nde, wo An ben suk tepsu Yefun Allah dakai bi Gan. An ben An bi suk-i mo Yefun Allah bi nu sisu ri-roi sor. Kristus jom suk mwa mo nu ne tepsu Yefun Allah mit. Men anato tepsu yé gato Kristus jom mo Yefun Allah bi nu, wo men bi sukjimnut kem krat mo An, men jammo An su men mit dik si men onyar dik sor.

Ibrani 4:14

Men bi Yekwesu gato gum kok wai mo Yefun Allah bi nu, An sa, mu kom mo Yefun Allah dakai gwem mo gu, An ki suk wa men mone. Men bi yegweswai ne gum do, Yesus, Yefun Allah bi Gan. Men ki do, men onyar kem mo An, sane men jom An bi sukdu-i gato men onyar kem mone krat et.

Ibrani 6:19

Men kwabom kam mo suk gato Yefun tom ne. Suktom ne tepsu kamutu gato jom kapal krat. Sane suk gato Yefun tom ne jom men krat, subere ye yo ku os wa gwat men mu mo os ibit nde, wo Yefun Allah uttok men, we men ut krat mo suk gato An tom ne. Men ut krat mo suk gato Yefun tom ne yo, ben sato men bi kamutu kas mu kom mo Yefun Allah bi gumwak fo mo Yefun bi nu mo gu ne. Men bi kamutu kom mo gumwak fo mit ne gato san det sye kok yawa, ete men bi kamutu kas mu mo san det ne de dari mo gumwak fo mit kai. Mone men bi kamutu ut krat mo Yefun dakai.

1 Petrus 1:3

Men bes Yefun Allah, men bi Yekwesu Yesus Kristus bi Ai ne gum kok et. Yefun Allah dakai jimnotku men sye wai o re, sane anato An sun Yesus Kristus kadit sukkwop, ete An fro os mone wa men subere men kem ndo tepsu yetu gato be o re. Sane men kwabom kam mo An do,

1 Petrus 1:5

Yefun Allah grem suk mwa ne kem mo gu wa men. Bere men ku mone tó, wo men kem mo bur ré tó, men onyar kem pe mo Yefun Allah, sane An mewa men su An bi suktinggi ne sane sor, An nai men wé kadit bur ré, ete An gwat men mu sok mo An bi nat-i su kam gato bur ré kru re.

1 Yohanes 2:27

Yesus Kristus syo Yefun Allah Gen bok nggwa mo nin dakai mo re. Yefun Allah Gen kem mo nin mit si nin onyar sane yo, nin yo mitwa ye yi ma duno nin nde, we Yefun Allah Gen mo nin mit ne dakai duno nin subot suk mwa ne sino. Sukduno gato Yefun Allah Gen duno nin su ne sangge, yo siri mo nde. Sane nin jambot sukduno ne, nin si Yesus Kristus tepsu dik mo suk mwa gato nin ben mo bur ré sor.

Wahyu 2:10

Bere nin ku sukye, wo nin nyuwa nde. Ji ki sare do, bere biris bi yekwesu ben yetu ge bok yo but nin ge bok yo, ete sok nin mo sel. Sane bere biris bi yekwesu gato ben sukibit ne werwa gwat os wa nin subere nin misyar Yefun mone. Mo sel mit ne bere nin ku sukye sor kom mo kam musyu dik rek. Kapre karowa nin kwop rok mone, nin onyar kem mo Ji, nin ben Ji bi suk-i sane sor kom mo pe gato or mó yo, bere Ji bi os wa nin kem ndo to kapyo mato kapyo, tepsu ye gato nggi wai ku hadiah mo koirut.