Kolose 1:22 - Abun Scripture

²² Wo, su ré, Yefun Allah syo An bi Gan ma kwop subere kak os wa nin si An kem ndo satu it. Yefun Allah fro os ré subere An bi Gan kar nin ma mo An, ete mone, An nutbot nin do, nin sa, tepsu An dakai bes wa nin ben An bi suk-i sor, ye yo ku os wa ki nin gum ibit mo Yefun gwem nde. Sane dom, Yefun nutbot nin do, sukibit wokgan yo ut mo nin o nde, we An bi Gan kwop wa tot sukibit ne wé re.

Kolose 1:22 ပူးပေါင်းရင်းမြစ်များ

Lukas 1:75

subere men ben suk tepsu Yefun Allah mit, men bi men nggwa wa ben Yefun Allah bi suk-i, su kam mwa ne sino gato men kem mo bur ré sor kom mo kam gato men kwop su.”

Roma 7:4

Sane, ji bi nji, ji bi nyanggon, tepsu yekra bi sukduno-i yo jom nggon gato bi ya kwop kadit ne o nde, ye Yahudi bi sukduno-i ben sato kwop kadit nin re, sukduno ne yo jom nin o nde, we nin si Yesus Kristus tepsu dik, ete nin si An sino kwop kadit sukduno ne re. Sane ye Yahudi bi sukduno-i yo jom nin o nde, wo nin jammo Kristus bi sukduno-i, we nin tepsu Kristus bi yetuge-i it. Nin jammo Kristus gato Yefun Allah sun kadit sukkwop ne bi sukduno-i subere sukndo gato Yefun Allah iwa men ben ne bor re.

2 Korintus 11:2

Ji mit iwa nin mit dik wa Kristus sor, tepsu Yefun Allah mit dik wa nin. Sarewo ben sato ji fro nin tepsu nggonnak be gato yo ben siri yo mo nde, orete ji tom do, ji syo nin kra su yebris ge dik yo gato gum do, Yesus Kristus dakai.

2 Korintus 4:14

Men iwa men kibot os ne, we men jam do, Yefun Allah sun Yesus Kristus kadit sukkwop. Sane tepsu Yefun Allah sun men bi Yekwesu Yesus Kristus bere An waii sun men si nin sino kadit sukkwop, ete An gwat men sino mu kom mo Yefun Allah bi nat-i ne, men jam ware. Sane men iwa men ki subot Yefun bi os be ne.

2 Korintus 5:18

Yefun Allah fro os wa men subere men anato ye gato be. An syogat Kristus ma mo bur ré kak os wa men si Yefun kem ndo su yu. Or o, Yefun Allah syogat men mu ki subot os be gato Yesus Kristus kak ne nai ye yi neya jam, subere yé ne si Yefun Allah kem ndo su yu dom.

Efesus 1:4

Yefun Allah yo ut bur ré nde tó, An bi sukjimnut wa An nai men tepsu An bi rus-i. Yefun bi sukjimnut nyim wé sare do, An fro men dor subere men ben suk gato ndo sor. Men ben kwa gato ibit yo mo nde, wo men ben suk tepsu An mit sor. Yefun Allah bi sukjimnut sye kas subot men

Efesus 5:27

Sane anato Kristus fro men sino gato onyar kem mo An ne kwo ndo mo An dakai gwem. An fro men subere men da ibit nde, men dini bor mo nde, men brot bor mo nde, men wip no mo nde, suk yo gato ibit mo men kaim ne yo mo nde, wo suk mwa mo men kaim ne ndo sino. Yesus Kristus bi sukjimnut sye kas subot men digane.

Kolose 1:28

Sane men kibot Yesus Kristus nai yé mwa ne sino jam. Men ki suknapa wa nje e, men duno nje e, men ki men bi sukdu-i ne, men nutbot sisu ndo, orete men kibot. Men ki men bi sukdu-i sane subere men kar yetu kadik-kadik ma mo Yefun Allah tepsu ye gato onyar kem pe mo Kristus, subere án sino tepsu yenggras gato bi sukjimnut kak mo Kristus bi suk-i.

1 Tesalonika 4:7

Yefun Allah nai men sok mo An bi rus-i subere yebris si nggon men sem su yu daret nde, wo An nai men subere men ben men bi suk-i ndo sor, sukibit wokgan yo dom nde.

Titus 2:14

Yesus Kristus bi An nggwa wa tot suktot mo sukibit mwa ne sino gato men ben ne wé, subere men tepsu nje gato ben sukibit o nde, ete men sok mo An dakai bi rus-i gato mit iwa ben suk gato ndo sor.

Ibrani 10:10

Kristus benbot suk gato Yefun Allah mit iwa ne, sane anato Kristus bi An nggwa kwop wa men wam dik sor re, tep wa kapyo mato kapyo. An bi nggwa subere tot sukibit gato men ben ne or wé kadit men sino, men bi sukjimnut waiyu mo sukibit gato men ben ne o nde, wo men onyar kwo it.

Ibrani 10:20

Yefun Yesus bi An nggwa anato ben sato An dakai syik san det sye gato kewa gumwak fo ne, subere men ku os wa men ku Yefun Allah mone. An kak os be wa men sok mo Yefun Allah bi gumwak fo ne it. Sane bere men kwop mo men bi sukibit ne o nde, wo men mbau tepsu Yefun Yesus dakai mbau mone.

Ibrani 13:21

Yefun Allah ós men kem ndo ete fro men su sukndo mwa gato men mitmo ne subere men nggiwa ben suk tepsu An mit. Yesus Kristus kak os wa men it, sane Yefun Allah ete ben suk mo men mit tepsu pe gato An imo ne. Men bes Kristus gum kok sane sor to kapyo mato kapyo. Sangge.

1 Petrus 3:18

Ndo sa, men ku sukye mo sukndo gato men ben ne, we Kristus dom ku sukye mo sukndo gato An ben ne re. Kristus kwop wam dik sor, tep wa tot sukibit mwa gato men ben ne wé re. Kristus yo ben sukibit mo nde. An kwop wa men yé gato ben sukibit, subere An kak os wa men ma sok mo Yefun Allah bi rus-i. An da kridek kwop, wo Yefun Allah Gen sun An kaim gesyos satu kadit sukkwop ne o re.

2 Petrus 3:14

Sane it yo, ji bi nji ji bi nyanggon gato ji jimnotku, men eswa kam gato Yefun Yesus tom ré it yo, men kamo nde, wo men wergat men nggwa, subere men ben suk mwa ne ndo sor, kwa yo gato ibit mo An gwem mo nde. Sane dom, men werwa men si Yefun Allah kem ndo su yu petok sor.

Yudas 1:24

Yesus Kristus ete nggiwa mewa nin kadit nin ges mo os ibit. An ete nggiwa gwat nin ma kem mo Yefun Allah gato gum kok ne gwem. Mo An bi nat-i gato ndo wai ne sukibit yo ut mo nin o nde, bere nin mit at wa sor.