Kolose 1:17 - Abun Scripture

¹⁷ Yefun Allah yo fro wa ut suk yo mo nde tó, Yesus Kristus mó re. Kristus anato ut suk mwa gato mo bur ré si gu nim ne mo bi nat-i re, subere suk mwa ne sino kas sisu ndo sor.

Kolose 1:17 ပူးပေါင်းရင်းမြစ်များ

Yohanes 17:5

Ji bi Ai, Nan yo ut bur ré nde tó, Ji si Nan, ete Nan bes Ji gum kok mone re. Sane su ré, Nan bes Ji gum kok sye wai satu o et.

Yohanes 8:58

Yefun Yesus ki nai yé ne do, ”Suk gato Ji ki ré suksangge anare, Abraham bi im yo pe an nde tó, Ji mó re.”

Suk Gato Yerasul Ben Ne 17:28

Kadit An bi suktinggi anato men mbau e, men nggiwa ben suk, ete kem mo bur ré re. Yefun Allah ne, An tepsu men bi Ai, sagato nin bi nje-i gato krom sukbadek bi sukdu-i. An krom sare do, ’Men anato An bi pa-i.’

1 Korintus 8:6

sarewo men yé gato onyar kem mo Kristus jam do, Yefun Allah ne ka dik sor. An anato nggi wai o re. Yefun Allah anato men bi Ai. An anato ut suk mwa mo bur ré si gu nim ne. Men kem mo bur ré wa men ben An bi suk-i sor. Men bi Yekwesu gato men jammo ne ka dik sor. Men bi Yekwesu ne anato Yesus Kristus. Yesus Kristus ne anato ós Yefun Allah ut suk mwa mo bur ré si gu nim. Kadit Yesus Kristus ne anato men mbau mó tó re.

Kolose 1:15

Men yo me Yefun Allah su men gro nde, sarewo Kristus gato men ku ne, An tepsu Yefun Allah dakai. Kristus ré, An gum kok wai kadit suk mwa gato Yefun Allah ut ne sino, sane anato ye kendo An gum do, Yefun Allah bi Pa doketke.

Ibrani 1:3

Yefun Allah dakai ben sato An rer-rik wai o re tepsu kam, ete An bi Gan ne ben sato An rer-rik wai o re dom tepsu kam yor gato gat men. Yefun Yesus gwat Yefun Allah bi rer ne ma wa men jam. Sane An bi Gan ré anato tepsu Yefun Allah dakai ne it, tara kadit Yefun Allah wokgan yo dom nde. An bi Gan ki bi sukdu-i gato nggi wai subere An bi Gan mewa suk mwa mo bur ré si gu nim ne sino subere suk mwa ne kas sisu ndo sor. An bi Gan kak os wa men yetu subere Yefun Allah yo nutbot sukibit gato men ben ne o nde, ete Yefun Allah nai men gum sok mo An bi rus-i. Orete An bi Gan ne kem tak An de syim ge mo gu, mone An bi Gan si Yefun Allah gato sye wai o re, jom suk mwa ne sino.

Ibrani 13:8

Kadit kam nyim, su ré, sor kom mo kapyo mato kapyo, Yesus Kristus ben An bi suk-i ne tepsu yu sor, An ben An bi suk-i tara mo nde.

Wahyu 1:11

Ji jam ye ne ki sukdu sare do, ”Suk gato bere nan sokme ne yo, nan krombot mo buku. Orete nan syo buku ne nai yé gato onyar kem mo Yefun Yesus mo nu ari mo kota Efesus e, Smirna e, Pergamus e, Tiatira e, Sardis e, Filadelfia si Laodikia ne et.”

Wahyu 1:17

Ji sokme An sa, ji bare ji nggwa mo An gwem tepsu ji kwop re. Orete An ak An syim ge mo ji, ete An ki do, ”Nan nyu nde! Ji anato ut suk kadit ketke ete jom suk mwa ne sane sor kom mo pe gato or mó.

Wahyu 1:8

Yefun Allah ki do, ”Ji anato Yefun gato ut suk kadit ketke ete Ji jom suk mwa ne sane sor kom mo pe gato or mó. Ji anato Yefun gato su ré mó, kadit ketke mó, si kam sari ne ma bere mó tó ne. Ji anato Yefun Allah gato nggi wai kadit suk mwa ne sino o re.”

Wahyu 2:8

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Smirna sare do: Ji gato ut suk kadit ketke ete jom suk mwa ne kom mo pe gato or mó, Ji gato kwop, orete sun satu o bi sukdu-i anare: