Kolose 1:10 - Abun Scripture

¹⁰ Men ki suk su Yefun wa nin sane subere nin kem mo bur ré, nin ben nin bi suk-i tepsu Yefun Allah mit, nin ben suk gato An iwa nin ben ne petok sor. Nin ben sane yo, bere suk gato bor kadit suk mwa gato nin ben ne ndo sino, bere nin jam Yefun Allah sisu ndo wai o kadit nyim neya o re.

Kolose 1:10 ပူးပေါင်းရင်းမြစ်များ

Yohanes 15:16

Nin anato bes Ji gum Yekwesu wa nin nde, wo Ji anato bes nin gum pakon wa Ji. Ji bes nin, orete Ji syogat nin mu ben suk mwa gato ndo, tepsu kwebo bor mo kweguk. Ji syogat nin ben sukndo gato tepsu kwebo gato bere yo ibit nde, wo bo gato kem pe sor. Nin ben sukndo gato kem pe, sane bere suk to nin ndek mo Ji bi Ai, ete nin ki Ji gum mó yo, bere Ji bi Ai syo nai nin re.

Yohanes 15:8

Nin do ben suk mwa gato ndo, tepsu bo mwa gato kom yo, nin tepsu Ji bi pakon gato sangge, ete bere yé bes Ji bi Ai gum kok sye wai o mone re.

Yohanes 17:3

Án jam Nan, Yefun Allah ka dik gato sangge, ye yo nggi tepsu Nan mo nde. Án jam Ji, gato Nan bi Gan, Yesus Kristus gato Nan syogat ma more anato án kem gesyos.

Roma 1:13

Ji bi nji ji bi nyanggon ji mit iwa nin jam do, ji da fro os wa ji ba ku nin wam bok yo, sarewo kom more suk yo kwa wa ji petok sor. Ji iwa ba ku nin subere ji duno nin subot Yefun Yesus subere nin ge bok yo o waii sok mo Kristus bi yetuge-i, tepsu ji duno yewis yi neya gato tara kadit ye Yahudi ne, ete yé bok yo mone sok mo Kristus bi yetuge-i ne mó re.

Roma 4:12

Abraham dom, an tepsu ye gato kadum os wa yé mwa gato simo sunat. Abraham kadum os wa yé mwa gato simo sunat sor nde, wo an kadum os wa yé mwa gato onyar kem mo Yefun dom. Men bi amui Abraham yo simo sunat nde tó, an onyar kem mo Yefun suga nyim tuya re.

Roma 6:4

Sane ye ras men mo syur bi sukjimnut do, men si Kristus kwop sino re. Ben sato men kwop kadit sukibit gato men ben ne. Orete ben sato ye bi men mo makwe si Yesus Kristus sino dom re. Ye bi men mo makwe subere tepsu men bi Ai bi suktinggi gato sye wai ne sun Yesus Kristus kadit sukkwop, sane dom, bere Yefun Allah waii sun men. Ben sato men syesyar kadit syur tepsu yetu gato be, men kem mo bur ré, men ben men bi suk-i ne ndo, tara kadit nyim neya o re.

2 Korintus 2:14

Men ki ndo mo Yefun Allah, we An gwat men tepsu Kristus bi rus-i gato An but ne ma wa yé mwa neya sokwa ete bes Kristus gum kok mone. Yefun Allah nai men wa men ki sukdu subot Yesus Kristus frekbot peyo-peyo. Men ki sukdu ne frekbot pe mwa ne tepsu nofuf gwat suk gato grik ndo frekbot peyo-peyo.

2 Korintus 4:6

Yefun Allah ki bi sukdu-i do, ”Nyot rer ku pe gato ndendu ne et,” sane Yefun Allah anato tepsu rer gato ku men mit re, anato men tepsu An bi pakwerut. Rer ne ku men mit, ete kak men bi sukjimnut subere men jam Yefun Allah bi suktinggi gato bor mo Yesus Kristus sugato An gwat os be ne ma.

2 Korintus 5:9

Sane anato kapre men kem mo bur ré o, men kem mo gu nim ne o, men wergat men nggwa subere men ben suk tepsu Yefun mit sor,

2 Korintus 9:8

Yefun Allah sa, nggiwa An syo suk mwa wai kadit suk gato men mit mone, subere suk mwa gato men dakai mitmo ne men ku wai kadit ne petok sor. Sane bere men ku suk mwa wa men syo nai ye yi gato yewa suk.

Efesus 1:17

Ji ndek mo men bi Yekwesu Yesus Kristus bi Ai, Yefun Allah gato kem kok ne, subere An Gen bok nggwa mo nin, subere nin bi sukjimnut kak ko, ete An Gen kadum Yefun Allah rer nai nin, subere nin jam An sisu ndo o et.

Efesus 2:10

Yefun Allah anato ut men re. An syo Yesus Kristus ma kak os wa men sok mo An bi rus-i. An ben men nggi mone subere men ben sukndo gato An fro wa men ben ne.

Efesus 4:1

Sane, ji gato gum do Paulus ré, gato yé bok mo sel, we ji ben Yefun bi suk-i, ji ki sare do, Yefun Allah nai nin wa nin sok mo An bi rus-i tepsu An bi pá-i. Sane nin ben suk tepsu Yefun bi pá-i ne et. Nin jammo suk gato ji ki ré et.

Efesus 4:13

sane sor, men sino onyar kem pe mo An, ete men jam Yefun Allah bi Gan sisu ndo, subere men sino tepsu dik it. Sane dom, bere An bi suktinggi gato An syo nai men ós men, ete ben men bi sukjimnut kak mo Yefun bi suk-i ne mwa wai o re. Or o bere men ben men bi suk-i tepsu Yesus Kristus dakai.

Efesus 5:10

Nin werwa nin jam suk gato Yefun Allah iwa nin ben ne et.

Efesus 5:15

Sane nin mewa nin nggwa subere nin ben sukndo mo bur ré sor. Nin ben suk tepsu ye gato jimgon nde, wo nin ben suk tepsu ye gato jam suk mwa ko et.

Efesus 5:2

Men kem mo bur ré, men bi sukjimnut sye kas subot ye yi sor, tepsu Kristus bi sukjimnut sye kas subot men, ete An bi An nggwa wa men. An bi An nggwa tepsu suksom gato An som Yefun Allah su, ete mone An tot men bi suktot. Yefun Allah iwa suk gato Kristus ben ne, tepsu ye iwa ni suk gato grik. Sane men waii bi men nggwa wa men ós ye yi su ne sor.

Filipi 1:11

Ji ndek mo Yefun subere An ós nin subere suk mwa gato nin ben ne ndo sino tepsu Yefun Allah mit, sukibit yo mo nde, subere yé mwa un Yefun Allah ete bes An gum kok mo suk gato nin ben ne.

Filipi 1:27

Yé sombok ji yo, ji kem more tó yo, nin ben nin bi suk-i tepsu sukdu subot os ndo gato Yesus Kristus kak ne sor. Nin ben suk tepsu sukdu gato ji duno nin su ne. Ji iwa nin ben nin bi suk-i sane subere ji ba ku nin yo, ji yo ba ku nde yo, ji jam sukdu subot nin do, nin tepsu dik wa nin jom Yefun bi sukdu-i pe sor. Nin mit dik si nin onyar dik wa nin duwer ye gato bariwa sukdu subot os ndo ne. Nin onyar kem mo sukdu ne pe sor.

Filipi 4:18

Su ré ji ku suk mwa gato nin syo wa ji more re. Sane su ré ji yo yewa suk o nde, suk gato nin syo ma ne wai mó re. Suk mwa gato nin syo nai Epafroditus ne, an gwat ma, an syo nai ji more re. Suk mwa gato nin syo ré tepsu suksom gato grik mo Yefun Allah gwem, tepsu suksom gato yé gre wa yé som Yefun Allah su ne. Sane Yefun Allah iwa suk gato nin ben ne.

Kolose 2:19

wo an yo jammo Kristus tepsu an bi Yekwesu o nde. An sombok kadit Kristus, tepsu yetu kaim sombok kadit i-su. Kristus anato tepsu yetu su gato jom kaim ne tepsu dik. Men yetu brot si men dini rit ne ós jom men kaim ne krat tok yu ete ut mo men su. Kristus jom An bi rus-i digane, subere men sino tepsu dik, ete tepsu men kaim kom sye o, men ut mo Kristus krat waii o tepsu Yefun Allah dakai imo ne.

Kolose 2:6

Nin nai Yesus Kristus tepsu nin bi Yekwesu it, sane anato nin ben nin bi suk-i tepsu ye gato sok mo Kristus bi nje-i petok sor.

Kolose 3:20

Pa wokgan, nin jammo nin bi ai si nin bi im petok sor, we Yefun Allah mit iwa nin ben sane.

Kolose 4:5

Nin ben suk su ye gato yo onyar kem mo Yefun nde tó yo, nin nutbot suk gato nin ben ne sisu ndo et. Nin kamo su án sor nde, wo nin werwa nin ben suk su án subere án waii jammo Yefun et.

1 Tesalonika 2:12

Men duno nin, men ós nin ben suk tepsu suk gato men duno nin su ne. Men wergat nin subere nin ben suk tepsu Yefun Allah mit sor, we Yefun Allah nai nin sok mo An bi rus-i, subere nin si An kem mo pe gato ndo wai o re.

1 Tesalonika 4:1

Sane, men bi nji, men bi nyanggon, men duno nin su sukduno gato kadum os wa nin subere nin jam suk gato ndo wa nin ben tepsu Yefun Allah mit it. Nin benbot sukduno ne napyo it. Sarewo su ré men kiwa nin jammo sukduno gato men bi Yekwesu Yefun Yesus tarubot men ne. Nin jammo ete nin werwa nin benbot sukduno mwa ne sino wai kadit nyim neya o re.

2 Timotius 2:4

Yesukmise gato benbot án bi yekwesu bi sukdu it yo, án yo ben suk yi nde, wo án iwa án ben suk tepsu án bi yekwesu mit sor.

Titus 3:1

Nan ki suknapa wa yé gato onyar kem mo Yefun Yesus mone subere án jammo án bi yekwesu si yepasye gato jowa bur ré, subere suk gato yekwesu ne ki yo, án benbot sor, án fro nggwa wa ben suk gato ndo.

Titus 3:14

Men bi nje-i gato men duno ne, án ben suk gato ndo sor, subere kamdik-kamdik án ku suk gato án mitmo ne, subere án kem mo bur ré, án bambrai wa ben suk nde.

Ibrani 11:5

Henokh onyar kem mo Yefun Allah, sane anato Henokh yo kwop nde, wo Yefun dakai gwat an it mu mo gu re. Ye yo ku an mukri mo nde, we Yefun dakai gwat an su gro mbau it mu mo gu re. Ye krom mo Yefun Allah bi sukdu do, Yefun yo gwat Henokh it mu mo gu nde tó, Henokh sa, an ben an bi suk-i tepsu Yefun Allah mit sor.

Ibrani 13:16

Men werwa men ben sukndo su yu et, men mbrinket nde. Men ós yu mo suk gato men ben ne et, men mbrinket nde. Men ben sukndo su yu, men ós yu anato tepsu men gwat suksom wa men som Yefun Allah su it anane, bere Yefun Allah iwa re.

Ibrani 13:21

Yefun Allah ós men kem ndo ete fro men su sukndo mwa gato men mitmo ne subere men nggiwa ben suk tepsu An mit. Yesus Kristus kak os wa men it, sane Yefun Allah ete ben suk mo men mit tepsu pe gato An imo ne. Men bes Kristus gum kok sane sor to kapyo mato kapyo. Sangge.

2 Petrus 1:8

Men ben men bi suk-i sane et. Men ben men bi suk-i sane mwa o yo, bere men jam men bi Yekwesu Yesus Kristus sisu ndo, ete bere suk mwa gato men ben ne kas sisu ndo, orete men nggiwa men ós ye yi dom.

2 Petrus 3:18

Men bi Yekwesu Yesus Kristus gato nai men kadit sukye ete jowa men yetu ne, An ben sukndo su men yetu dakai yi. Sane nin dom ben nin bi suk-i ne ndo mwa wai o kadit nyim ne sor. Nin jam Yesus Kristus sisu ndo o et. Men bes An gum kok su ré sor to kapyo mato kapyo. Sangge.

1 Yohanes 3:22

Men do benbot An bi sukduno, ete men ben suk gato An iwa men ben ne yo, bere An syo suk gato men ndek mo An ne nai men sor.

1 Yohanes 5:20

Men jam o do, Yefun Allah bi Gan ma mo bur ré re, An ós men, An kak men bi sukjimnut, subere men jam Yefun Allah gato sangge ne. Men si Yefun Allah gato sangge ne tepsu dik. Men si An bi Gan Yesus Kristus ne tepsu dik it. An sor anato Yefun gato sangge re. An sor anato ós men kem ndo to kapyo mato kapyo re.

3 Yohanes 1:6

Ye gato nan ós ne ma ki napyo nai nje mo nu ari more jam subot sukndo gato nan ben ne re. Sane nan ós ye gato ma mone su suk gato án mitmo, subere án mu ben Yefun bi suk-i mo pe gato án mu mone. Sane bere Yefun Allah mit iwa re.