Ibrani 4:16 - Abun Scripture

¹⁶ Sane men yo nggi nde yo, men karowa Yefun et. Men nyuwa men ki men bi sukdu-i su Yefun Allah nde, wo men ki sor, men damen wa nde. Men jam do, men yo ben suk yo nyim wa An nde, wo Yefun ben An bi suk-i su men yo, An dakai bi sukjimnut sye kas subot men yi sor, bere Yefun ós men mone. Sane men ndekwa An os men et, subere An syo suk mwa gato ndo nai men dakai yi tepsu bi kam gato men mitmo suk ne su.

Ibrani 4:16 ပူးပေါင်းရင်းမြစ်များ

Efesus 2:18

Yefun Allah Gen ka dik ne gwat men subot os gato Yesus Kristus kak wa men sino, ye Yahudi si yewis yi ne, subere men sino karowa men bi Ai, Yefun Allah ne.

Efesus 3:12

Yesus Kristus kak os wa men anato men yé gato onyar kem mo An, men yo damen wa ki suk su Yefun Allah o nde, wo men jam rer do, suk gato men ki nai An, bere An iwa An jam.

Ibrani 13:6

Sane men mit kem pe mo sukdu sare do, ”Yefun Allah gato gesyos ne anato sisu ji, sane ji yo nyuwa suk daret nde. Yetu nggiwa ben sukye teker sato suma nai ji ne? Ji yo nyu nde.”

Ibrani 3:6

Sarewo Kristus, An tepsu pakwerut sato Musa nde, wo An ben suk tepsu Yefun Allah dakai bi Gan. An ben An bi suk-i mo Yefun Allah bi nu sisu ri-roi sor. Kristus jom suk mwa mo nu ne tepsu Yefun Allah mit. Men anato tepsu yé gato Kristus jom mo Yefun Allah bi nu, wo men bi sukjimnut kem krat mo An, men jammo An su men mit dik si men onyar dik sor.

Ibrani 7:19

Sukduno ne yo ós ben suk yo ndo mo nde. Sane su ré Yefun Allah fro os gato ndo wai wa men o re. Men kwabom kam mo Yefun Allah do, sukduno be gato An fro ne anato kak os wa men subere men karowa Yefun Allah it.

Ibrani 7:25

Sane anato Yefun Yesus nggiwa ben suk tepsu yegweswai wa ós men yé gato iwa ma mo Yefun Allah bi nat-i sor to kapyo mato kapyo. Yefun Yesus kem gesyos, An ós wa ki suk su Yefun Allah tepsu yegweswai wa men petok sor.

Ibrani 9:5

Ye ut suge we kadit emas gato i mó, suge we ne kwop mo peti ne yu. Mo suge we ndet ne Yefun Allah kadum An nggwa mó. Suge we ne ye kendo gum do Kerub. Mo peti yu ne, yesu gato ben suk mo Yefun Allah bi nu ne dar suge dé mone tepsu suktot wa tot sukibit gato ye Israel ben ne wé. Sarewo su ré, men yo ki subot sukdu mwa ne rek kom mo mit nde tó re.

1 Petrus 2:10

Suga nyim nin yo tepsu Yefun Allah bi rus-i nde, wo su ré sa, nin tepsu An bi rus-i it. Suga nyim Yefun Allah dakai jimnotku nin ndo nde, sarewo nin jam nde re. Wo su ré sa, nin jam rer it. Yefun Allah dakai jimnotku nin anato An nai nin sok mo An bi rus-i it.