Ibrani 4:12 - Abun Scripture

¹² Men jammo Yefun Allah bi sukdu sor, we sukdu gato Yefun ki ne bere ós men kem ndo. An bi sukdu-i ne pet mo men mit. An bi sukdu-i ne pet mo men mit kru wai kadit nyom gato ot de we gato ye syer men su ne. Ye syer men su nyom ot de we it yo, nyom ne bere kom mo de nden sor nde, wo kom mo men de mit kai. Sane dom Yefun Allah bi sukdu-i pet mo men de nden sor nde, wo pet mo men de mit kai, bere kru wai kadit nyom ne o re. An bi sukdu-i pet kom mo men mit kai, mo pe gato men da kridek si men da gesyos miten. An bi sukdu-i pet kom mo mit kai, kom mo pe gato men yetu dini rit si men gus mo men dini ne miten. An bi sukdu-i kak men bi sukjimnut subot suk gato men nutbot si suk gato men iwa men ben ne. Sane Yefun bi sukdu-i pet kom men mit sane sor men jam suk gato ndo kadit suk gato ibit mone.

Ibrani 4:12 ပူးပေါင်းရင်းမြစ်များ

Lukas 8:11

”Sukamno subot ye gato am mbet gro ne bi sukjimnut mó, sare do: mbet gro anato tepsu Yefun Allah bi sukdu.

Yohanes 12:48

Ye to bariwa Ji, ye to jambot Ji bi sukdu nde, bere ye ne ku sukye re. Su kam gato bur ré kru it yo, bere án ku sukye mo gato án yo jammo Ji bi sukdu-i nde re.

Yohanes 6:51

Ji dakai anato tepsu sugit gato is kadit gu ma ré. Sugit ré ben yetu mbau. Ye to git sugit ré yo, ye ne kem gesyos it, an mbau to kapyo mato kapyo. Sugit gato Ji bi wa ben yetu mo bur ré mbau anato Ji dakai ku.”

Suk Gato Yerasul Ben Ne 2:37

Yé mwa jam Petrus bi sukdu-i ne or sa, án kwabom kro, án ki nai Petrus si yerasul yi neya do, ”Sane men bi nji, men ben suma ne?”

Suk Gato Yerasul Ben Ne 4:31

Án sino ki suk su Yefun Allah, orge nat gato án sum mone gwi. Yefun Allah Gen bok nggwa mo án sino. Án sino mu, án ki Yefun Allah bi sukdu subot Yefun Yesus, án yo nyuwa nde.

Suk Gato Yerasul Ben Ne 5:33

Yepasye mwa ne jam Petrus bi sukdu-i sa, án on sa ndo nde. Sane án iwa gu yerasul bok ne kwop wé,

Suk Gato Yerasul Ben Ne 7:38

Musa anato si men bi amui sino mo pe gato kwe yo kom mo nde. Tomgane malaikat dik yo ki suk nai Musa mo banbo Sinai. Or o Musa waii ki sukdu gato Yefun tarubot malaikat ne nai men bi amui jam. Musa jam Yefun Allah bi sukduno gato ós men kem ndo. Orge Musa waii ki sukduno ne nai men jam re.

Roma 1:16

Ji mit kem pe mo sukdu subot os ndo gato Yesus Kristus kak ne, ji yo damen wa nde, we Yefun Allah bi suktinggi bor mone anato yé mwa gato onyar kem mo Yesus Kristus ne sino, ku os wa án titi fro wé kadit bot gesyos, ete kem ndo to kapyo mato kapyo. Yefun Yesus kak os ne wa ye Yahudi sor nde, wo Yefun Yesus kak os ne wa yewis yi neya dom re.

1 Korintus 1:24

Sarewo ye Yahudi si yewis yi gato Yefun Allah nai sok mo An bi rus-i jam sukdu subot Kristus gato Yefun Allah bi ma kwop mo kwesukwin anato án sino jam mone do, Yefun Allah sa, bi sukjimnut ne ko, Yefun Allah sa, bi suktinggi ne nggi wai o re.

2 Korintus 2:17

Men ki subot Yefun Allah bi sukdu-i yo, men meret sugum su dom nde, tepsu yé mwa neya ben ne. Men ben sane nde, wo men sok mo Kristus bi rus-i anato men ki subot Yefun Allah bi sukdu-i ri-roi sor, Yefun dakai jam re. Men anato ye gato Yefun Allah bes wa ki Yefun bi suktaru nai nje jam re.

2 Korintus 4:2

Men duno nje yo, men yo gurik os gato sangge kadit nje nde. Men do ben sane bere men damen mo koirut o re. Sane men duno nje yo, men yo meret os mone dom nde, men bariwa re. Men yo ki subot Yefun Allah bi sukdu-i brek tara kadit An bi sukdu gato sangge ne nde, wo Yefun Allah dakai jam do, men ki subot An bi sukdu-i ne ri-roi sor, subere yé mwa ne sino onyar kem mo men bi sukdu-i re.

Efesus 5:13

Sarewo sukndo gato nin ben ne tepsu sukru gato rer ete bere kadum sukibit ne bor wa yé mwa jam, ye yo ku os wa gurik sukibit ne o nde,

Efesus 5:26

Kristus bi An nggwa wa nai sukibit wé kadit men. An bi sukduno tepsu syur gato An de mo men wa rus sukibit wé kadit men re. Sane An fro men wa men sok mo Yefun Allah bi rus-i.

Efesus 6:17

Sane o, men jom sukdu subot os ndo gato Yefun Yesus kak wa men kem gesyos ne krat sor, tepsu men bom topi krat gato kewa men su anane. Men jom Yefun Allah bi sukdu-i, tepsu men jom nyom ot de we anane.

1 Tesalonika 2:13

Men ki ndo mo Yefun Allah mo suk dik yo o gato nin ben ne, sare do, tomgato men ki Yefun Allah bi sukdu nai nin jam, nin nai sukdu ne tepsu yetu bi sukdu-i nde, wo nin nai sukdu ne tepsu Yefun Allah bi sukdu-i. Sangge, sukdu ne ma kadit Yefun Allah. Yefun Allah bi sukdu-i ne kak nin yé gato onyar kem mo Yesus Kristus ne bi sukjimnut-i subere nin nggiwa nin ben An bi suk-i ne sor.

1 Tesalonika 5:23

Yefun Allah gato ós men kem ndo su yu, Yefun dakai ete kak nin bi sukjimnut subere nin ben An bi suk-i sisu nin mit dik nin onyar dik petok sor. Yefun Allah ete mewa nin da kridek si nin da gesyos sino sane sor subere nin ben nin bi suk-i ibit yo mo nde, kwa dik yo dom nde, subere men bi Yekwesu Yesus Kristus satu ma mo bur ré it yo, ye yo ku os wa ki nin gum ibit mo suk yo mo nde.

Ibrani 13:7

Men napawa men bi yekwesu bok yo gato ki Yefun Allah bi sukdu nai men jam. Suk gato men bi yekwesu ben mo bur ré sor kom mo kam gato án kwop su ne, men nutbot sisu ndo et. Men nutbot suk mwa gato án ben ne, án tepsu ye gato onyar kem mo Yefun. Án nut do, suk gato Yefun Allah ki ne sangge anato án jammo Yefun Allah. Sane men waii benbot suk gato án ben ne dom et.

Ibrani 6:5

Mo suk bok yo gato bor mo an dakai ne, an jam do, Yefun Allah bi sukdu ne ndo. Yefun Allah bi suktinggi gato bere bor sye su kam sari ne ma, bor mo an mó re.

Yakobus 1:18

Yefun Allah dakai iwa ki bi sukdu gato sangge ne ma kak os wa men subere men tepsu An bi pá-i. An kak os wa men subere men kem mo nat gato ndo kok wai kadit suk mwa gato An ut ne sino re.

1 Petrus 1:23

Nin mewa yu sane, we Yefun Allah bi sukdu gato kem gesyos ne ben nin tepsu ye gato be it. Nin bi im pe nin wam dik yo, wo ben sato Yefun Allah bi sukdu anato pe nin wam dik yo o. Sane nin tepsu ye gato be it.

Wahyu 1:16

An jom bí ge mufit mo An syim ge. Nyom gato ot de we syesyar kadit An syokwet. An gro ru nggi tepsu kam yor sugato kam ti ri.

Wahyu 19:15

Nyom gato ot de we syesyar kadit An syokwet. Bere An ben sukye nai nje mo bur ré iwedewe su nyom ne. Bere An ben sukye nai nje su nggarmom muk sane sor yé mwa ne sino jammo An petok sor. An gwat os wa Yefun Allah gato nggi wai ne bi sukmaskwa bor mo bur ré. An ben yetu mwa dé sye, tepsu ye yakos anggur bo, bere i-rom ne syesyar re.

Wahyu 19:21

An we bi yeko ne yé gu yé mwa ne kwop su nyom gato syesyar kadit Ye gato it mo kuda kwo ne syokwet. Orete ndam mwa ne sino ma git yekri ne ku sor, ndam git gat sane sor, ndam on don su yekri ku ne.

Wahyu 2:16

Sane nin brek kadit sukdu gato ibit ne se! Nin yo brek kadit sukdu gato ibit ne nde yo, bergan sor ete Ji futma gu nin yé gato jom sukdu ne su nyom gato ot de we gato syesyar kadit Ji syokwet.

Wahyu 2:23

Yé bok ne sino gato simo nggon ne, bere Ji gu kwop wé. Ji gu yé bok ne kwop wé, subere yé gato onyar kem mo Yefun Yesus mo nu ari mwa ne sino jam do, Ji anato jam kadik-kadik bi sukjimnut-i kom mo mit re. Yé bok ne yo ku os wa gurik sukibit gato án ben ne nde. Bere Ji ben sukye nai kadik-kadik tepsu sukibit gato án ben ne.

Wahyu 20:4

Orete ji sokme yekwesu bi kursi bok yo. Yé gato kem mone anato yé gato ku suktinggi wa jom ete ndobot yetu. Sane dom ji sokme yetu ge bok yo gato ye gu kwop. Ye tot yé bok ne su toko wé su mbam, we yé bok ne ki subot suk gato Yefun Yesus ben ne, án ki subot Yefun Allah bi sukdu-i. Yé bok ne yo som suge doketke si suk gato ye ut ka sa suge ne nde. Ye yo syat suge doketke bi ja mo yé bok ne git det nde. Ye yo syat ja mo yé bok ne syim rut ne dom nde. Yé bok ne Yefun sun kadit sukkwop o re, án si Kristus jom nje tepsu yekwesu sane sor kom mo tahun ribu dik.