Ibrani 3:12 - Abun Scripture

¹² Sane ji bi nji, ji bi nyanggon, men kadik-kadik mewa men nggwa sisu ndo subere men bi sukjimnut ibit nde. Men mewa men nggwa subere men yo bariwa men jammo Yefun Allah nde. Men mewa men nggwa sane subere men mu brek wé kadit Yefun Allah gato gesyos ne bi os-i nde.

Ibrani 3:12 ပူးပေါင်းရင်းမြစ်များ

Matius 16:16

Simon Petrus ki do, ”Nan anato Yekwesu gato Yefun Allah bes gum Kristus, gato Yefun Allah syogat ma mo bur ré wa nai men yetu kadit sukye ete jowa men. Nan anato Yefun Allah gato gesyos ne bi Gan.”

Matius 24:4

Yefun Yesus ki do, ”Nin mewa nin nggwa sawe yé yo ma kidar nin.

Markus 13:23

Sane nin mewa nin nggwa kadit ye gato kidar nin, we sukdu bok ne, yo bor nde tó, Ji ki napyo nai nin jam nyim wé re.”

Markus 13:33

Sane nin frawa nin nggwa et! Nin jam nde kam gato Ji ma su ne re. Nin mewa sor!

Markus 13:9

Su kam gane ma, nin mewa nin nggwa, we bere yé but nin, ete yé gwat nin mu mo ye Yahudi bi yepasye. Yé gwat nin deyo mu mo ye Yahudi bi nu ari dom, ete ye Yahudi kwam nin su bus mone. Bere yé but nin, we nin onyar kem mo Ji, ete nin ben Ji bi suk-i. Bere yé gwat nin mu mo yepasye gato jowa bur ré yo, bere nin ti mo yeraja si gubernur gwem, ete nin ki sukdu subot Ji nai yepasye ne jam.

Lukas 21:8

Yefun Yesus ki do, ”Nin mewa nin nggwa sawe ye yo ma kidar nin. Bere yé mwa ma ki do, ’Ji anato Kristus, kam gane ana ma it, bur ré kru it anare,’ ete kidar yé bok ne sino jammo án re. Yé do ma ki sukdu sane yo, nin simo yé ne nde.

Roma 11:21

we Yefun Allah tot i-guk gato tepsu ye Yahudi gato misyar Kristus ne wé re, Yefun yo nutbot nde. Sane nin do misyar Yesus Kristus it yo, bere Yefun Allah tot nin wé re, An yo nutbot dom nde.

1 Korintus 10:12

Sane ye to nut mo an dakai do, an sa, ye gato onyar kem pe mo Yefun Yesus it yo, ndo sa an mewa an nggwa, sawe an ges satu mo os ibit o.

Kolose 2:8

Nin mewa nggwa sisu ndo et, sawe ye deyo ma wergat nin subere nin jambot yetu bi sukdu-i gato bere yo ós nin nde. Yetu bi sukdu-i ne bere ben kidar nin ete gwat nin mu ges mo os ibit o re. Yetu bi sukdu-i ne yo ma kadit Kristus nde, wo sukdu ne ma kadit yenggras bi sukdu-i si suk gato nggiwa jom bur ré gato i-mok mone bi sukdu-i. Yé ne yo duno nin subot Kristus nde.

1 Tesalonika 1:9

we yé mwa mo bur ré iwedewe ne nuk subot sukndo gato nin ben su men tomgato men ma si nin kem mo kota Tesalonika ne. Yé mwa ne nuk do, nin iwa men ma ku nin mone. Yé mwa ne nuk o do, nin misyar sukdaret mwa mo bur ré gato nin som daret, orete nin brek ma nin bi nin nggwa mo Yefun Allah gato sangge, ete nin ben Yefun Allah gato gesyos ne bi suk-i sor.

Ibrani 10:31

Ye gato ben suk siri kadit os be ne, do ges mo Yefun Allah syim-i it yo, bere ye ne kwabom dek subot sukye gato bere Yefun syo nai an ne.

Ibrani 10:38

Wo Ji bi rus-i gato ben bi suk-i tepsu Ji mit, bere án onyar kem mo Ji anato án kem ndo; sarewo án ge dik yo do brek dari tak Ji it yo, bere Ji yo iwa ye ne nde.”

Ibrani 12:15

Nin mewa yu sawe nin deyo mu brek dari tak Yefun Allah gato ben bi suk-i ne ndo wai su men dakai yi. Nin mewa yu sawe nin deyo gwat os ibit wa nin. Tepsu sukjan gato bi ri mó, ete ri ne waii tok sukjan yi mwa neya, bere te re, nin mewa yu kadit ye gato gwat os ibit gane ma, sawe os ne ben sukye wa nin sino, ete kom mo rut ben nin ibit o re.

Ibrani 12:22

Nin yo ku sukye tepsu ye Israel ku ne nde, wo ben sato nin mu kom mo banbo Sion it, nin mu kom mo Yefun Allah gato gesyos ne bi kota re. Kota ne anato tepsu Yerusalem be gato Yefun fro mo gu nim. Mone malaikat mwa yé ndo nde sum, malaikat mwa ne wi, malaikat ambre mo sukndo gato Yefun Allah ben ne. Ben sato nin mu kom mo pe gato malaikat mwa kem mone re.

Ibrani 12:25

Sane yo, men mewa men nggwa subere men yo bariwa jammo sukdu gato Yefun Allah ki ne nde. Yé gato bariwa jammo Yefun Allah bi sukdu gato ye ki mo banbo Sinai ne sa, yé ne yo ku os wa titi kadit sukye gato Yefun Allah fro ne nde. Sane dom, men ré do bariwa jammo sukdu gato Yefun gato gum kok mo gu ki ne ma it yo, bere sa u ne? Bere men yo ku os nde go!

Ibrani 3:1

Sane ji bi nji, ji bi nyanggon, nin si men sino anato yé gato Yefun Allah nai sok mo An bi rus-i. Sane men nutbot Yefun Yesus sisu ndo o et. Yefun Allah syogat Yesus Kristus gwat Yefun bi sukdu ne ma wa men tepsu Yekwesu gato gum kok wai mo Yefun Allah bi nu. An sa, tepsu yegweswai wa men si Yefun Allah gato men onyar kem mó.

Ibrani 3:10

Sane anato tomgane Ji maskwa ket án it. Ji ki do, ’Yé mwa ne bariket Ji, án bariwa jammo Ji bi sukdu-i o re.’

Ibrani 3:19

Su ré men jam it, men bi amui gato bariket Yefun Allah bi sukdu-i ne yo sok mo nat gato Yefun Allah fro wa án nde, we án yo onyar kem mo Yefun Allah nde.

Ibrani 9:14

Sane kambing si sapi dé-i, si sapi gato ye gre ne bi bofuf-i ne do nggiwa ós nje subere yé ne si Yefun Allah kem ndo su yu satu o it yo, bere Kristus dé-i ne te, sa u ne? Kristus dé-i nggiwa ós men wai kadit sapi dé-i ne o re fe! Yefun Allah Gen gato gesyos ne ben Kristus nggiwa Kristus dakai bi An nggwa mo Yefun Allah, An dé sye tepsu suktot win men. Kristus ben sukibit wokgan yo dom nde, sane suktot ne tep mó re. Kristus dé sye anato sombok men bi sukjimnut mo men mit ne wé kadit os gato nyim ne bi sukdu-i, subere men nutbot suk mone o nde, wo men bi sukjimnut sye mo suk gato Yefun Allah gato gesyos ne iwa men ben ne sor.