Ibrani 13:9 - Abun Scripture

⁹ Sane men jammo sukdu daret gato tara kadit Yefun Yesus bi sukdu-i ne nde, sawe sukdu ne gwat men mu mo os siri kadit Yefun bi os-i. Sa ndo sa, men nutbot sukndo gato Yefun Allah ben su men dakai yi sor. Sane bere men bi sukjimnut nggi, wo sukduno daret subot sugit e neya bere yo ós men nde. Ye gato simo sukdu ne yo kom mo pe yo dom nde.

Ibrani 13:9 ပူးပေါင်းရင်းမြစ်များ

Matius 24:24

Ye gato ben kidar do, an dakai anato Kristus gato Yefun Allah syogat ma mo bur ré wa nai men yetu kadit sukye ete jowa men ne bere mó. Sane dom yenabi gato ma wa kidar nin bere mó. Yé bok ne bere kadum bi suktinggi, ete ben suk gato ben nje yeket ndo nde. Yé bok ne ben bi suk-i, bergan án ben kidar nje gato Yefun fro suga nyim wa Yefun nai sok mo Yefun bi rus-i, sarewo án yo ku os mone nde.

Matius 24:4

Yefun Yesus ki do, ”Nin mewa nin nggwa sawe yé yo ma kidar nin.

Lukas 5:38

Men ben sane nde, wo men sye nau anggur be mo sukbo be, subere nau si bi sukbo ne sino kem ndo.

Suk Gato Yerasul Ben Ne 20:30

Sane sor nde, wo kadit nin miten, bere yé bok yo bes án nggwa kok, ete ki Yefun Allah bi sukdu brek kadit sukdu gato sangge, subere án ben kidar ye gato onyar kem mo Yefun Yesus, subere ye ne misyar Yefun Yesus ete simo án.

Suk Gato Yerasul Ben Ne 20:32

Sane, ji syo nin mo Yefun Allah syim-i, bere An mewa nin tepsu sukdu gato An ki ne. Nin jammo An bi sukdu ne sa, bere sukdu ne ós nin onyar kem mo Yefun Yesus nggi wai o, ete bere An syo sukndo nai nin si yé mwa ne sino gato sok mo An bi rus-i ne.

Roma 14:17

Yefun Allah tepsu men bi Yekwesu, sane it yo, men nutbot syur gato men da teker o nde, men nutbot sugit gato men git e ne teker o nde, wo men bi sukjimnut sye mo suk gato Yefun Allah Gen ben men nggiwa ben sato ré: men nggiwa ben suk gato Yefun Allah iwa men ben ne e, men ku os wa men si Yefun Allah kem ndo su yu e, men mit at wa Yefun Allah bi suk-i e ne.

Roma 14:2

Sato yetu ge dik yo nut mo an dakai do, an git suk mwa neya daret sor. Wo yetu ge dik yo o gato bi sukjimnut yo nggi mo Yefun Allah nde tó, an nut do, ye gane bi sukjimnut-i siri re, wo an dakai nut do, an git sugit daret nde, an git sukom sor re.

Roma 14:6

Ye gato bes kam deyo gum kok kadit kam deyo o, an ben sane, we an iwa bes Yefun Allah gum kok mone. Ye gato git suk mwa daret, an ben sane, we an iwa bes Yefun Allah gum kok mone, ete an ki ndo mo Yefun Allah mo suk mwa gato an git ne. Sane dom, ye gato bariwa git sugit deyo, an ben sane, we an iwa bes Yefun Allah gum kok mone, ete an ki ndo mo Yefun Allah mo suk gato an git ne.

1 Korintus 6:13

Yé deyo ki do, ”Yefun Allah ut sugit wa men git ngga mo men ondim. Sane dom Yefun ut men ondim fro ndek wa sugit.” Sarewo su kam sari ne ma Yefun Allah ben men ondim si sugit ne sino ibit or re. Sane dom Yefun fro yebris kaim wa nggon, ete nggon kaim wa yebris. Sarewo Yefun Allah yo ut men yebris si nggon kaim wa men ben siri su yu daret nde, wo An ut men kaim wa men ben men bi Yekwesu bi suk-i. Ete An mewa men kaim re.

1 Korintus 8:8

men do git sugit ne yo, suk ne yo tepsu sukye yawa mit wa men si Yefun Allah nde. Kapre men git o, men yo git nde o, sugit ne yo ben men karowa Yefun Allah nde, sugit ne yo ben men kem ko kadit Yefun Allah dom nde.

2 Korintus 1:21

Yefun Allah dakai anato kak os wa men sisu nin sino subere men yo misyar Yefun nde, wo men jom Yesus Kristus bi sukdu ne krat sor. Men si nin sino si Yesus Kristus tepsu dik it. Yefun Allah bes men sino tepsu An bi rus-i subere men ben An bi suk-i.

Galatia 6:1

Ji bi nji, ji bi nyanggon, men ku yetu ge dik yo gato ben sukibit it yo, men yé gato ben men bi suk-i tepsu Yefun Allah Gen mit ne mu ku an, ete men duno an subere an satu ma mo os gato ndo o et. Wo men duno an it yo, men duno an sisu njep sor. Men mewa men nggwa dom, sawe suk yo tik men mit, ete men waii ges mo os ibit ne dom.

Efesus 4:14

Sane bere men bi sukjimnut tepsu pa wokgan o nde. Yé gato werwa ben kidar men su bi sukduno gato siri, án syeret os wa men, sarewo bere yé ne yo ku os wa tik men muya-muma saga sem bak si nofuf gwat kwem muya-muma ne o nde.

Efesus 5:6

Ye yi do ma werwa kidar nin subere nin misyar sukdu gato ji ki ré subot Yefun bi sukdu-i ne yo, nin jambot nde, we ye gato ben bi suk-i siri kadit Yefun Allah bi sukdu-i ne, bere an ku sukmaskwa kadit Yefun Allah.

Kolose 2:4

Ji ki ji bi sukdu-i ré nai nin jam nyim subere ye yi do ma ki bi sukdu-i meret os wa ben kidar nin yo, nin jambot nde. Kapre án ki suk su án syokwet ndo, nin jambot dom nde.

2 Tesalonika 2:17

Mo sukndo mwa gato nin ben si nin ki ne sino, Yefun Allah si Yesus Kristus ete ben nin nggi. Yefun Allah si Yesus Kristus ete ben nin mit iwa nin ben An bi suk-i mo suk mwa ne sor.

2 Tesalonika 2:2

nin jam ye yo ki do, men bi Yekwesu Yefun Yesus satu ma mo bur ré it yo, nin gensu sukdu sane nde, nin kwabom kro mo sukdu sane nde. Kapre ye yo ki do, Yefun Allah Gen kadum nai án do, Yefun Yesus ma it yo, nin jambot sukdu sane nde. Kapre ye yo o ki do án jam sukdu do, Yefun Yesus satu ma mó re yo, nin jambot sukdu sane nde. Kapre ye yo o ki nai nin do, men krom sukdu mo surat dik yo do, Yefun Yesus satu ma mo bur ré, an jam mó re yo, nin jambot sukdu sane dom nde.

1 Timotius 6:20

Timotius, Yefun Allah bi sukduno mwa gato Yefun grem kem su nan wa nan duno nje su ne, nan mewa sisu ndo et, nan jamwa pe sor. Sane ye ki subot sukduno gato siri kadit Yefun Allah mit yo, nan si nje kibot sukdu sino mone nde. Sane dom, ye duwer nan mo Yefun bi sukduno-i it yo, nan si nje duwer yu mo sukduno ne nde. Sukduno ne, yé bok ne ki do, ”Sukjimnut kru,” anane, sarewo ye kidar kone. Nan si nje duwer yu mo sukduno ne nde,

1 Yohanes 4:1

Ji bi nji ji bi nyanggon gato ji jimnotku, yé mwa ki do, Yefun Allah Gen bok nggwa mo án, sane sukdu gato án ki ne ma kadit Yefun Gen. Sarewo nin jammo án bi sukdu-i kekro nde, nin watbot sukdu ne kom-kem et, subere nin jam do, án ku án bi sukdu-i kadit Yefun Allah Gen bado, án ku án bi sukdu-i kadit suk yi neya e? Sane nin watbot sisu ndo et, we su ré yenabi mwa gato kidar suk mu ki bi sukdu-i bot peyo-peyo mó re.

Yudas 1:12

Yé gato ben bi suk-i sato yé bok ne, án si nin sum wa git sugit sino sa, án ben nin sino gum ibit mo sukdaret gato án ben ket án í mone sor, tepsu án jam nde án nggwa re, án yo damen dom nde. Án nutbot án dakai sor re, án yo nutbot ye yi nde re, tepsu ye gato mewa suksi, wo án dakai nai sugit wa án dakai sor, án yo syo sugit nai suksi ne nde, wokgan yo dom nde. Án tepsu nyotem gato nofuf sam ma, ndendu, men nut do bere nogi, sarewo nogi yo mo nde. Men nut do, bere án ós men tepsu nogi os men, sarewo suk yo mo nde. Án tepsu kwe gato bi aina tep wa bo, sarewo kwe ne yo bo mo nde. Men nut do, bere án syo suk gato ndo nai men, wo suk yo mo nde. Án tepsu kwe gato yé tik i-brot buk kadit bur re, sane bere kwe ne te re, yo kom o nde it. Án tepsu suk gato men nut do ndo wa ós men, ondewo suk yo mo nde.

Yudas 1:3

Ji bi nji ji bi nyanggon gato ji jimnotku, sangge ji da iwa krom surat wa nin subot os ndo gato Yefun Yesus kak wa men kem ndo to kapyo mato kapyo ne. Ji da iwa krom subot sukdu ne gato men sino jammo mó re, sarewo suk yo ben sato tik ji mit wa ji krom sukduno wa nin subere nin bes sukdu subot Yesus Kristus ne kok o et. Nin jammo suk gato ji krom ré et. Yefun Allah bi sukduno subot Yesus Kristus ne, An grem kem wam dik su men yé gato onyar kem mo Yesus Kristus. Sukdu ne kwa yo gwet mo nde. Sane nin werwa nin bes sukdu ne kok wai kadit sukdu yi neya et. Sane dom nin duwer yé gato ma wa duwer nin mo sukdu ne et. Ji syogat nin ben sane,