Ibrani 13:4 - Abun Scripture

⁴ Yetu ge we kra yu it yo, suk ne ndo wai, sane men sino mewa sukra sisu ndo sor. Yebris si bi nggon bi nggwa nai yu sor re. Yebris si bi nggon ne bi nggwa nai ye yi yo dom nde, we ye ben suk siri sane it yo, bere Yefun Allah syo sukye nai ye ne. Sane dom, bere Yefun Allah syo sukye nai yé mwa ne sino gato ben siri.

Ibrani 13:4 ပူးပေါင်းရင်းမြစ်များ

1 Korintus 6:18

Sane men yebris si nggon mewa men nggwa kadit men ben siri su yu daret nde. Sukibit de yi neya men ben mo men kaim de nden sor re, wo sukibit gato men ben siri su yu daret ne ben men dakai kaim ibit re.

1 Korintus 6:9

Ye gato ben sukibit ne gum yo sok mo Yefun Allah bi rus-i nde, nin jam sukdu ne bado, nde tó e? Nin jam sukdu ne, sane nin dakai kidar nin dakai nde, Yefun Allah bariwa nai ye gato ben bi suk-i ibit sok mo An bi rus-i, sato ré: yebris si nggon gato ben siri su yu daret e, ye gato som sukdaret e, yekra gato ben siri su nggon daret si nggonkra gato ben siri su ye daret e, yebris gato iwa ben siri wa meret sugum e, yebris gato ben siri su yu e,

1 Korintus 7:38

Saneyo ye gato kra it yo, ben bi suk-i ndo anane, wo ye gato yo kra nde it yo, an ben an bi suk-i ndo wai o re anane.

1 Korintus 9:5

Yerasul yi sato Petrus si Yefun Yesus bi nji do mubot os yo, án bi nggon gato onyar kem mo Yefun Yesus si án mu sino. Suk gato Petrus si yerasul yi ben ne anato ndo. Wo, ji do bi nggon gato si ji mubot os yo, bere yé ki ji gum ibit mone wa suma ne?

2 Korintus 5:10

we su kam gato Kristus ma ne, bere An ndobot men yetu mwa ne sino. Mone yetu gedik-gedik ku suk tepsu suk gato án ben mo bur ré. Men yé gato ben sukndo, bere men ku suk gato ndo mone, wo yé gato ben sukibit, bere yé ne ku sukye mone.

Galatia 5:19

Sukjimnut gato tik men yetu mit wa ben sukibit gato yetu iwa ben ne bor wa men jam sino sato ré: yebris si nggon iwa ben siri su yu daret e; án da bro wa ben sukdaret ket án i e; án ben suk siri dakai daret bu e,

Galatia 5:21

án gro sye wa ye yi bi suk-i e; án iwa án yenau bu e; án iwa án kamo noru nombrak, án yenau su, ete án ben siri mwa su e ne. Án ben suk mwa gane si kwa yi neya dom. Suga nyim ji ki subot sukibit bok ne nai nin jam mó re. Ré ne, ji ki suknapa wa nin wam dik yo o sare do, ye to ben bi suk-i sane, bere Yefun Allah yo nai ye ne sok mo An bi rus-i nde.

Efesus 5:5

Men jam rer do, yebris si nggon gato ben siri su yu daret e, ye gato da bro wa nggon e, nggon gato da bro wa yebris e, ye gato gro sye wa nai suk mwa wa an dakai (ye gato ben suk gare yo, ye ne bes sukdaret sye wai kadit Yefun Allah o re). Ye gato ben bi suk-i sane, bere an yo sok mo rus gato Yefun Allah si Yesus Kristus jom ne nde.

1 Tesalonika 4:6

Sane nin ben siri su nin bi nji mo Kristus bi rus-i ne bi nggon nde. Nin kidar yé ne dom nde. Tomga nyim men ki suknapa wa nin wam bok yo mó re, sare do, bere Yefun Allah syo sukye nai ye gato ben suk siri kadit sukduno ne.

1 Timotius 3:12

Ye gato ós yekwesu mo nu ari ne, an kra nggon ka dik sor. An ye gato mewa an bi rus sisu ndo dom.

1 Timotius 3:2

Sane, ye gato gum yekwesu mo nu ari, an ben an bi suk-i sato re, an ye gato ben sukndo sor, ye yo ki an gum ibit mo nde; an kra nggon ge dik sor, an mewa nggwa kadit an ben sukdaret, an mewa nggwa kadit an ben sukibit, an ben sukndo sor; yé yo ma mo an bi nu yo, an iwa, an syo sugit nai yé ne sor; an jam an duno nje sisu ndo;

1 Timotius 3:4

An mewa an bi rus sisu ndo; an duno an bi pa sisu ndo, subere pa ne jammo an sisu pa mit dik sor,

1 Timotius 4:3

Yeguru ne duno nje do, yé fowa kra yu. Yeguru ne duno nje do, yé fowa git sugit wis bok yo. Yeguru ne ki do, men yetu fowa git sugit ne, sarewo Yefun Allah ut sugit mwa ne ndo sino wa men git. Men yé gato onyar kem mo Kristus, ete jam Yefun Allah bi sukduno-i gato sangge, men ki ndo mo Yefun wa sugit ne sa, men git sor, men yo fowa sugit ne nde.

1 Timotius 5:14

Sane anato ji dakai duno nggonna gato yo din nde tó subere mom kra sor, mom pe pa, mom mewa mom bi pa si mom bi ya mo bi nu-i, subere ye gato bariket men yo ku os wa ki men gum ibit mone nde.

Titus 1:6

Ye gato nan bes gum yekwesu mo nu ari, an ye gato ben an bi suk-i ne ndo sor, kwa gato ibit yo mo nde; an ye gato kra nggon ge dik sor; an ye gato bi pá onyar kem mo Kristus, an bi pá ben bi suk-i ne ndo sor, ye ki an bi pá gum ibit mo gato pá ben sukdaret e, pá su krat e ne nde.

Ibrani 12:16

Nin mewa yu subere nin ge dik yo ben siri su nggon daret nde. Nin mewa yu subere nin deyo misyar Yefun bi suk-i sato Esau ben ne nde. Esau yo nutbot Yefun Allah nde anato Esau so sugit mbem dik su an bi sukrok gato bere an ku tepsu pa ketke ne.

Wahyu 22:15

Sarewo yé gato yo ku os wa sok mo kota ne nde anato yé gato bariket Yefun. Yé ne ben bi suk-i sato ré: án kwa syua e, kro ri, frum suk e ne e, án ben siri su yu daret e, án gu ye yi kwop daret e, án som sukdaret e, án mit iwa kidar nje ket kwayo-kwayo e ne. Yé mwa gato ben bi suk-i sane, yo ku os wa sok mo kota ne nde.