Ibrani 11:4 - Abun Scripture

⁴ Habel onyar kem mo Yefun Allah, sane anato Habel gwat suksom gato ndo wai kadit suk gato Kain gwat ma ne ete gre wa som Yefun su ne. Habel ben bi suk-i, an onyar kem mo Yefun, {wo Kain gwat bi suksom ne yi, an yo onyar kem mo Yefun nde.} Sane anato Yefun Allah iwa suksom gato Habel gwat ma ne sor re, ete Yefun Allah nut mo Habel ne do, an sa, tep wa Yefun nai sok mo Yefun bi rus-i. Habel ne kwop re, sarewo sukdu subot suk gato an ben tepsu ye gato onyar kem mo Yefun Allah ne kem su men tó anare.

Ibrani 11:4 ပူးပေါင်းရင်းမြစ်များ

Matius 23:35

Sane ri ma, bere nin ku sukye mo yé mwa gato ben sukndo tepsu Yefun mit gato nin si nin bi amui gu kwop wé ne. Ketke kadit nin bi amui gu Habel, gato ben sukibit yo mo nde. Or o nin bi amui gu ye yi bok yo o sor kom mo Zakaria, gato Berekia bi pa. Nin bi amui gu an kwop mo Yefun Allah bi nu si bot kot wa ye gre suge mó wa som Yefun su mone ndet.

Lukas 11:51

Kadit ketke nin bi amui gu Habel. Or o nin bi amui gu ye yi bok yo o sor kom mo Zakaria, gato nin bi amui gu kwop mo Yefun Allah bi nu si bot kot wa ye gre suge wa som Yefun su mone ndet. Sangge, Ji ki sare do, nin yé gato kem mo bur su kam ré, bere nin anato ku sukye mo yé mwa gato nin bi amui gu kwop su kam nyim neya.

Titus 1:16

Án da ki do, án jam Yefun Allah, sarewo men me mo sukibit gato án ben ne anato men jam do, án jam nde Yefun Allah or re. Yefun Allah bariwa án. Án su krat, án yo nggiwa ben suk gato ndo mo nde.

Ibrani 11:2

Men bi amui onyar kem pe mo sukdu gato Yefun Allah ki ne anato Yefun Allah mit iwa án.

Ibrani 12:1

Sane yo, men jam sukdu mwa yé subot yé gato onyar kem mo Yefun Allah ne. Yé gato onyar kem mo Yefun Allah kam nyim ne, yé mwa ne ben sato án wairi wa men, án sokwa suk gato men ben wa Yefun Allah. Sane it yo, men bare suk gato kwawa men ben Yefun Allah bi suk-i wé kadit men et. Men am sukibit gato ut mo men wé kadit men et. Sane suk mwa gato Yefun Allah fro wa men ben ne, men ben sisu men mit dik si men onyar dik et, tepsu ye kas bitanding yu mo perlombaan, ye wergat ye nggwa sisu ye mit dik si ye onyar dik subere ye kas nggi mone sor kom mo pe gato or mó.

Ibrani 12:24

Mone nin ku Yefun Yesus gato dé sye wa kak os be tepsu yegweswai wa men yetu. Yefun Yesus dé-i ne sa, ben sato ye dar mo nin mo sukibit gato nin ben ne subere tot sukibit ne or wé kadit nin re. Yefun Yesus dé-i gato sye wa kak os gato be ne sa, bi sukdu-i gato Yefun Allah tom su men ndo wai kadit sukdu subot Habel dé-i ne o re. Sane nin yo ku sukye tepsu ye Israel nde, wo ben sato nin ku suk mwa gato ndo mo gu ne it.

Ibrani 5:1

Suga nyim tuya, Yefun Allah bes ye Israel ge bok yo tepsu yekwesu gato gum kok wai mo Yefun Allah bi nu. Yekwesu ne ben suk tepsu yegweswai wa Yefun Allah si ye Israel. Yekwesu ne tepsu ye gato mo miten wa Yefun Allah si An bi rus-i. Suksom gato Yefun Allah bi rus-i ne syo wa som Yefun Allah su ne, yekwesu ne syo nai Yefun Allah. Yekwesu ne gu suge ne kwop tepsu suktot wa tot sukibit gato ye Israel ben ne wé dom.

Ibrani 9:22

Sane tepsu os nyim ne bi sukdu-i do, men gu suge kwop, suge ne dé sye, ete ye dar i-dé mo suk bok neya subere suk bok ne bi sukibit ne or wé kadit re. Sane suge dé sye sa, bere men ku os wa sukibit mwa gato men ben ne or wé kadit men re.

2 Petrus 2:8

Lot gato ben sukndo ne, an si yé mwa ne kem sino mo kota Sodom. Kamdik-kamdik Lot dakai me sukibit mwa gato yé ben ne, ete an jam yé deyo ma nukbot sukibit yo o mone, sane an nutbot ware, sukibit mwa gato yé ben ne ben an suwar waiyu ndo nde.

Yudas 1:11

Bere Yefun Allah syo sukye nai án sor. Án gu nje kwop daret tepsu Kain ben ne. {Kain anato gu an bi nji, Abel ne, kwop.} Yeguru gane gro sye wa ku sugum anato án syi suk mo Yefun bi rus-i sato Bileam ben ne. {Bileam ré syi sukfo mo ye Israel wa ku sugum.} Yeguru gane duwer suk nggi tepsu Korah ben ne. {Korah si bi det-i anato duwer Musa si Harun mo pe gato yé ne.} Sane bere Yefun Allah gu án kwop wé tepsu Yefun gu Korah kwop wé mo gato án duwer nje subot Yefun bi os-i ne nggi.