Filipi 4:3 - Abun Scripture

³ Sane dom, ji ndek mo Sunsugus do, ”Nan si ji ben Yefun Yesus bi suk-i sino mó re, ji onyar kem mo nan. Sane Sunsugus, ji ndekwa nan tepsu yegweswai wa nggon we ne et, we nggon we ne si ji ben suk sino, men ki sukdu subot os ndo gato Yesus Kristus kak ne nai ye yi jam re.” Sugane an we wergat nggwa wa ós ji ki subot sukdu ne. An we sor nde, wo Klemens si yetu ge bok yo ós ji ki subot sukdu ne. Yé bok gane, Yefun Allah krom án gum mo An bi Buku Yegesyos re.

Filipi 4:3 ပူးပေါင်းရင်းမြစ်များ

Lukas 10:20

Semda da jammo nin ete titi, sarewo nin mit at teker mone sor nde, wo ndo sa, nin mit at wa Yefun Allah krom nin gum mo An bi rus-i mo gu re.”

Roma 12:1

Sane, ji bi nji, ji bi nyanggon, Yefun Allah dakai jimnotku men anato An yo ben suk su men tepsu sukibit gato men ben su An nde, wo An ben sukndo su men sor. Sane nin benbot suk gato ji ki ré et: Tepsu suga nyim yé gu suge kwop wa yé som Yefun su ne, su ré men bi men nggwa su mbau wa men som Yefun su et. Men werwa men bi men nggwa wa men ben Yefun bi suk-i tepsu An mit sor. Men som Yefun Allah su sangge it anane.

Roma 16:12

Nin ki nai Trifena si Trifosa do, ji ki ndo mo án we. Nggon we ne samok wa ben Yefun bi suk-i. Nin ki nai Persis gato ji jimnotku do, ji ki ndo mo mom. Nggon ne dom samok wa ben Yefun bi suk-i.

Roma 16:9

Nin ki nai Urbanus, men bi yesyim gato men si an ben Kristus bi suk-i do, ji ki ndo mo an. Nin ki nai Stakhis gato ji jimnotku do, ji ki ndo mo an.

Filipi 1:12

Ji bi nji, ji bi nyanggon gato onyar kem mo Yesus Kristus, ji iwa nin jam do, sukye gato ji ku mo sel ré kak os wa yé mwa jam ete onyar kem mo sukdu subot os ndo gato Yesus Kristus kak wa men yetu ne.

Filipi 1:16

Ye gato mit kwo ne, án ki sukdu subot Yesus Kristus, we án bi sukjimnut sye kas subot ji si Yefun Allah sino. Án ki sukdu subot Yesus Kristus, we án jam do, Yefun Allah bes ji wa ji ki rer subot os ndo ne sare do, os ne sangge.

Filipi 1:27

Yé sombok ji yo, ji kem more tó yo, nin ben nin bi suk-i tepsu sukdu subot os ndo gato Yesus Kristus kak ne sor. Nin ben suk tepsu sukdu gato ji duno nin su ne. Ji iwa nin ben nin bi suk-i sane subere ji ba ku nin yo, ji yo ba ku nde yo, ji jam sukdu subot nin do, nin tepsu dik wa nin jom Yefun bi sukdu-i pe sor. Nin mit dik si nin onyar dik wa nin duwer ye gato bariwa sukdu subot os ndo ne. Nin onyar kem mo sukdu ne pe sor.

Filipi 1:5

Ji mit at wa ji ki suk su Yefun wa nin, we nin ós ji mu frot sukdu subot os ndo gato Yesus Kristus kak wa men yetu ne nai ye yi jam, kadit kam ketke gato nin onyar kem mo Yefun sor kom mo kam ré.

Filipi 1:7

Ji mit at wa nin, ji jimnutbot nin anato ndo, we ji gen ne kem pe su nin mone re. Sane dom, ji jimnotku nin, we yé bok ji mo sel more yo, ji duno nje su sukdu subot os ndo gato Yesus Kristus kak ne yo, ji ki rer subot sukdu ne nai ye gato duwer ji mo sukdu ne yo, nin si ji tepsu dik wa ben suk gato Yefun Allah fro wa ji ben ne sino.

Filipi 4:2

Euodia si Sintikhe, nin ka we jammo ji bi sukdu ré et. Ji kiwa nin ka we bi sukjimnut tepsu dik et. Nin ka we duwer yu o nde, we nin ka we onyar kem mo Yefun Yesus it. Sane nin ka we kibot subere nin ka we kem not et.

Kolose 1:7

Sukdu ne Epafras ki nai nin jam mó re. Epafras ré gato men ka we jimnotku, an si men ka we ben suk wa Kristus. Epafras ben bi suk-i ne ri-roi tepsu Kristus mit wa os men sino.

Wahyu 13:8

Yetu mwa ne sino gato kem mo bur ré bere bes suge ne gum kok, wo yetu bok gato Yefun Allah krom gum mo Domba Gan gato ye gu kwop wé ne bi Buku Yegesyos suga nyim tuya Yefun ut bur ré nde tó, bere yé bok ne yo bes suge krok ne gum kok nde.

Wahyu 17:8

Suge doketke gato nan me ré, suga nyim sa, mbau, wo ré yo, yo mbau o nde. Bergan suge ne syesyar kadit kwoye sye mo bur desnak ne ma nim mo bur ré o. {Orete bere Yesus Kristus gu suge ne kwop wé,} suge ne bere ibit or re. Suga nyim sa, suge ne mbau, wo ré ne, yo mbau o nde, sarewo bere suge ne mbau satu o re. Sane anato yetu gato gum yo sok mo Yefun Allah bi Buku Yegesyos nde, bere yeket mone. Yefun fro Buku ne su kam gato An yo ut bur ré nde tó. Bere yé mwa gato kem mo bur ré, gato gum yo sok mo Buku ne nde yo, bere yé mwa ne yeket suge ne re.

Wahyu 20:12

Ji sokme yé mwa ne sino gato kwop sum mo kursi sye ne gwem. Yé gato gum sye e, yé gato gum wok e ne, yé mwa gato kwop ne sino ti mo kursi sye ne gwem. Buku bok yo kak mone. Orete ye nai Buku dik yo o ma, ye kak mone dom. Ye krom yé gato bere kem gesyos ne gum mo Buku ne. Or o Yefun Allah syo sukye nai yetu gato kwop ne tepsu sukdu gato ye krom mo buku bok ne. Yefun Allah syo suk nai yetu mwa ne tepsu suk gato yetu mwa ne ben re.

Wahyu 20:15

Ye to ye yo krom an gum mo Buku Yegesyos nde yo, bere ye am ye ne mu ngga mo bot sye gato tepsu em ete ru ne.

Wahyu 21:27

Sarewo yé gato ben bi suk-i siri kadit Yefun mit ne, bere yé ne yo sok mo kota ne nde, wam dik yo dom nde. Yé gato som sukdaret e, kidar suk e ne yo sok mo kota ne nde. Sarewo yé gato ye krom gum mo Domba Gan bi Buku Yegesyos sor anato sok mo kota ne.

Wahyu 3:5

Yé gato nggi wai kadit bur ré bi suk-i yo, bere án si yé bok ne sino it san gato kwo ndo. Bere Ji yo rus án gum wé kadit Buku Yegesyos nde. Bere Ji ki mo Ji bi Ai si malaikat mwa ne gwem do, Ji bi rus-i mo án.