Filipi 3:3 - Abun Scripture

³ Men ré anato yé gato simo sunat gato sangge, wo án yo simo sunat gato sangge nde re. {Men yo onyar kem mo suk gato án ben sato sunat nde. Ye Israel gato simo sunat, án nut do, án sok mo Yefun Allah bi rus-i it anane. Sarewo sunat ne ye ben mo men kaim de nden ne sor re.} Wo men sa, Yefun Allah Gen bok nggwa mo men anato men bes Yefun Allah gum kok. Men si Yesus Kristus tepsu dik ete men un An, sane men sok mo Yefun Allah bi rus-i mone it, tepsu ye bisunat men sisu sangge anane. Men yo onyar kem mo sunat gato yetu ben mo men kaim de nden ne nde.

Filipi 3:3 ပူးပေါင်းရင်းမြစ်များ

Roma 1:9

Ji ki suk su Yefun Allah yo, ji napawa nin petok sor. Sangge, ji yo kidar nde, Yefun Allah gato ji ben suk wa ne, An dakai jam sukdu gato ji ki ré sangge, ji yo kidar nde. Ji ben Yefun Allah bi suk-i su ji mit dik si ji onyar dik, ji mu ji ki sukdu subot os ndo gato An bi Gan kak wa men yetu ne. Yefun Allah gato ji ben suk wa ne jam do, ji sa, napawa nin pe re.

Roma 15:17

Yesus Kristus kak os ndo wa men yetu, sane anato ji mit at wa ji ben suk gato Yefun Allah syogat ji ben ne.

Roma 7:6

Sarewo su ré, men sombok kadit ye Yahudi bi sukduno-i ne it. Suga nyim ne sukduno ne jom men krat, wo su ré ben sato men kwop kadit re. Men sombok kadit sukduno ne, subere men jammo os be tepsu sukdu gato Yefun Allah Gen kadum nai men re. Sane men yo jammo ye Yahudi bi sukduno-i gato Musa krom ne o nde, wo men jammo sukduno gato Yefun Allah Gen kadum nai men ne sor.

Roma 8:15

Yefun Allah Gen, gato bok nggwa mo men ne, yo ben men tepsu pakwerut wa suknyu o nde, wo Yefun Allah Gen ben men tepsu Yefun Allah bi pa-i. Sane Yefun Allah Gen mo men mit ben men kendo Yefun Allah do, ”Ai o, ji bi Ai o.”

Roma 8:39

suk mwa gato nggi mo gu nim ne si bur ré sino yo ku os wa yawa miten wa men si Kristus dom nde. Yefun Allah bi sukjimnut sye kas subot men pe sor anato men bi Yekwesu Yesus Kristus mewa men, sukye bok neya yo ku os wa yawa miten wa men si Kristus mo nde.

Roma 9:6

Suk gato Yefun Allah tom su ye Israel ne, ye Israel deyo ki do, Yefun Allah yo benbot nde, sarewo ji yo bi sukdu-i sane nde re. Yefun Allah benbot suk gato An tom ne, An yo nai ye Israel bi pa-i mwa ne sino tepsu Yefun dakai bi pa-i nde.

2 Korintus 11:18

Yé mwa dakai un án dakai tepsu yetu mo bur ré ben ne, sane ji waii un ji dakai wokgan tepsu yé mwa neya dom et.

Galatia 5:25

Yefun Allah Gen anato ós men kem ndo, sane men nai sukjimnut dik do, suk gato Yefun Allah Gen kiwa men ben ne yo, men benbot petok sor.

Galatia 6:16

Yefun Allah ete mewa ye gato jammo sukdu gato ji krom ré. Yefun Allah ete dakai jimnotku yé mwa gato jammo sukdu ré. Yefun Allah ete mewa An bi rus-i ne sino.

Efesus 6:18

Men jom suk e, men it suk bok ne, men ki suk su Yefun dom et. Men ki suk tepsu suk gato Yefun Allah Gen kadum nai men sor. Sane men fro men nggwa, men werwa men ki suk su Yefun petok sor, men misyar wokgan yo dom nde. Men ki suk su Yefun Allah wa ye gato onyar kem mo Yefun Yesus ne sino petok sor.

Filipi 1:1

Ji gato gum do Paulus, ji si Timotius, men ka we gato Yesus Kristus bi pakwerut anato krom surat ré wa nin. Men ka we krom sukdu ré wa nin yé gato onyar kem mo Yesus Kristus gato sum mo nu ari mo kota Filipi. Men ka we krom surat ré wa nin yé gato gum yekwesú mo nu ari si yé gato ós yekwesú mo nu ari ne sino.

Filipi 3:12

Ji dakai yo jam Yesus Kristus kom mo mit nde tó. Ji yo jam An bi suktinggi ne sisu ndo nde tó. Ji yo ben ji bi suk-i mwa ne sino tepsu Yesus Kristus iwa ne sisu ndo nde tó. Sarewo ji wergat ji nggwa subere ji ku suk gato Yesus Kristus fro wa ji ne, we ji ré, Yesus Kristus nai ji sok mo An bi rus-i it.

Filipi 3:14

Sane anato ji wergat ji nggwa nggi gat petok sor, tepsu ji werwa ji kas nggi wai kadit ye yi neya, subere ji kom mo pe gato or nyim kadit ye yi ne, ete ji ku suk gato ndo mone. Suk gato ji iwa ji ku ne anato ji kem gesyos mo gu sisu Yesus Kristus. Yefun Allah fro os wa men subere men kem gesyos mo suk gato Yesus Kristus ma ben mo bur ré re.

Kolose 2:11

Nin si Kristus tepsu dik it, sane tepsu ye bisunat nin it anane. Sunat gare yo tepsu sunat gato yetu ben mo yetu kaim ne nde, wo sunat ne ma kadit Kristus. Sunat gato ma kadit Kristus ben sato kum nin bi sukjimnut gato tik nin mit iwa nin ben sukibit bu ne toko wé re.

Yudas 1:20

Sarewo sukdu subot Yesus Kristus anato ma kadit Yefun Allah dakai. Sukdu ne yo ma kadit yetu bi sukjimnut-i nde. Sane ji bi nji ji bi nyanggon, nin ós yu, nin duno yu su sukduno gato ndo wai subot Yesus Kristus ne petok sor, subere nin onyar kem mo Yesus Kristus nggi wai o et. Nin ki suk su Yefun su suktinggi gato Yefun Allah Gen syo nai nin ne et.