Filipi 3:2 - Abun Scripture

² Nin mewa nin nggwa kadit yé gato mise. Nin mewa nin nggwa kadit yé gato bi sukjimnut ibit. Án mise yé ré, án wergat nin subere án kum nin da napyo wé. Án werwa bisunat nin re.

Filipi 3:2 ပူးပေါင်းရင်းမြစ်များ

Matius 24:10

Sugane, yé mwa gato onyar kem mo Ji, bere misyar Ji or re. Bere yé meret os wa yu, bere yé bariket yu.

Matius 7:15

”Nin mewa nin nggwa kadit yenabi gato kidar nin. Yenabi ne ma ku nin, ete án brek nden we, án ben án nggwa sato domba mo de nden, wo án mit ne tepsu ndar krok.

Matius 7:6

Nin syo Yefun Allah bi suk-i nai ndar nde, we bere ndar brek ma ete gu nin. Sane dom, nin syo nin bi suk gato bi sugum sye sato mutiara nai jot nde, we bere jot ne yakos mo bur sor re. {Sane ye gato bariket Yefun Allah bi sukdu ne, nin gwat sukdu ne mu ki nai an daret nde.}”

Roma 2:28

Ye gato ben nggwa mo de nden ne tepsu ye Yahudi sor re, ye ne yo tepsu ye Yahudi sangge nde. Sane dom ye simo sunat mo ye kaim de nden ne sor re, ye ne yo simo sunat gato sangge nde.

2 Korintus 11:13

Yé bok gane, Yefun Allah yo syogat án ma kibot Yesus Kristus bi sukdu-i nde, án tepsu yerasul gato sangge nde, wo án dakai ben án nggwa tepsu ye gato Yefun Allah syogat ma ki subot Kristus bi sukdu-i ne sor re, án werwa án ben kidar nin sor.

Galatia 5:13

Ji bi nji, ji bi nyanggon, sangge, Yefun Allah nai nin tepsu An bi pá-i subere ye Yahudi bi sukduno-i yo jom men tepsu pakwerut o nde, wo men sok mo Yefun Allah bi rus-i it. Men sok mo Yefun Allah bi rus-i tepsu An bi pá-i orete yo, men nut do, ”Ré ne ji tepsu Yefun bi pa-i it, sane ji ben sukibit ket ji i ne sor,” sane bere siri re. Men ben sane nde, wo men bi sukjimnut sye kas subot yu sor, men ben sukndo su yu sor.

Galatia 5:15

Wo nin maskwa ket yu e, nin ben yu ket kwayo-kwayo e ne yo, bere nin sino dakai ibit mo koirut o re. Sane nin mewa nin nggwa kadit suk sane.

Galatia 5:6

Yesus Kristus kak os wa men anato men sok mo Yefun bi rus-i it. Sane yo, kapre men simo sunat e, men simo sunat nde e, suk ne yo ós men nde. Wo suk dik yo sor re anato tep wa ós men, sare do, men onyar kem mo Kristus. Men onyar kem mo Kristus sane sa, bere men ben sukndo su ye yi neya sor, bere yé mwa ne me bor re.

Filipi 3:19

Kom mo rut, bere Yefun Allah ben án ibit re, we án bi sukjimnut sye mo án kaim budat ré sor re. Án jam nde án damen mo sukibit gato án ben ne, ete án nut do, suk ne ndo wai, we án bi sukjimnut kem pe mo sukibit gato yetu ben mo bur ré sor re.

Filipi 3:3

Men ré anato yé gato simo sunat gato sangge, wo án yo simo sunat gato sangge nde re. {Men yo onyar kem mo suk gato án ben sato sunat nde. Ye Israel gato simo sunat, án nut do, án sok mo Yefun Allah bi rus-i it anane. Sarewo sunat ne ye ben mo men kaim de nden ne sor re.} Wo men sa, Yefun Allah Gen bok nggwa mo men anato men bes Yefun Allah gum kok. Men si Yesus Kristus tepsu dik ete men un An, sane men sok mo Yefun Allah bi rus-i mone it, tepsu ye bisunat men sisu sangge anane. Men yo onyar kem mo sunat gato yetu ben mo men kaim de nden ne nde.

1 Timotius 1:19

Nan jom sukdu subot Yefun Yesus gato sangge, ete nan duwer yé gane sor. Sane dom nan kidar nan dakai nde, wo nan jammo sukjimnut gato ndo mo nan mit petok sor. Yé bok yo jammo án bi sukjimnut gato ndo mo án mit o nde anato án ges mo os siri, án yo onyar kem mo Yefun Yesus o nde,

Titus 1:16

Án da ki do, án jam Yefun Allah, sarewo men me mo sukibit gato án ben ne anato men jam do, án jam nde Yefun Allah or re. Yefun Allah bariwa án. Án su krat, án yo nggiwa ben suk gato ndo mo nde.

2 Petrus 2:22

Ye ne do brek an dari ket Yefun it yo, tepsu sukamno kwa we gato ye ki do, ”Ndar gwi or, ndar satu ma git ndar gwi ne o re,” si ”Ye mus jot kwo re, orete jot ne satu ma ngga mo budat o re.”

Yudas 1:4

we, su ré ji jam do, yetu ge bok yo gato misyar Yefun Allah da ma fros men mo nu ari re, sarewo men jam nde án si men mone. Yefun Allah bi sukdu-i subot os ndo gato An fro wa men ne, yé ne brek sukdu ne tara kadit bi sukjimnut gato sangge ne or re, subere án ku os wa án dakai ben siri su nggon ket án í sor. Án bariket men bi Yekwesu ka dik ne sor. Án misyar Yesus Kristus gato gum kok sye wai o re. Sane kam sari ne ma án ku sukye tepsu ye krombot mo Yefun Allah bi sukdu suga nyim tuya re.

Wahyu 2:9

Ji jam do, nin ku sukye, nin yewa suk, sarewo Yefun syo suk mwa wa nin da gesyos ne mó re. Ye Yahudi bok yo ki do, án sa, Yefun nai án gum sok mo Yefun bi rus-i. Án ma ki nin gum ibit ket kwayo-kwayo. Ji jam sukibit gato án kiket nin su ne o re. Yé bok ne jam nde Yefun, wo yé gato ben bi suk-i sane sok mo biris bi yekwesu bi rus-i ne sor re.

Wahyu 21:8

Sarewo ye gato ben an bi suk-i siri kadit Ji mit, bere Ji am mo bot gesyos. Ye gato bere Ji am mo bot gesyos anato ye gato ben bi suk-i sato ré: ye gato rewa Ji e, ye gato bariket Ji e, ye gato som sukdaret ete ben sukibit su e, ye gato gu ye yi kwop daret e, yebris si nggon gato ben siri su yu daret e, ye gato kwa syua e, kro ri, frum suk e ne, ye gato som sukdaret e, yé mwa ne sino gato kidar suk e ne. Yé mwa ne sino gato ben bi suk-i ibit sane yo, bere Ji am ngga mo bot sye gato tepsu em ete ru sye basmi kwik su belerang. Bot sye ne anato tepsu sukkwop kedowe.”

Wahyu 22:15

Sarewo yé gato yo ku os wa sok mo kota ne nde anato yé gato bariket Yefun. Yé ne ben bi suk-i sato ré: án kwa syua e, kro ri, frum suk e ne e, án ben siri su yu daret e, án gu ye yi kwop daret e, án som sukdaret e, án mit iwa kidar nje ket kwayo-kwayo e ne. Yé mwa gato ben bi suk-i sane, yo ku os wa sok mo kota ne nde.

Wahyu 3:9

Yé bok yo gato kidar do, án tepsu ye Yahudi, sarewo Yefun yo nai án gum sok mo Yefun bi rus-i nde yo, yé bok ne jam nde Ji. Yé bok ne sok mo biris bi yekwesu bi rus-i. Bere Ji ben án ma bare án nggwa mo nin gwem. Bere án jam do, Ji anato bi sukjimnut sye kas subot nin re.