2 Timotius 1:9 - Abun Scripture

⁹ Yefun Allah fro os ndo wa nai men wé kadit bot gesyos, subere men kem ndo to kapyo mato kapyo. Yefun Allah kiwa men brek ma kadit os ibit gato men muket ne, ete men tepsu An bi rus-i ben An bi suk-i gato ndo petok sor. An yo me mo sukndo gato men ben ne nde, wo An dakai fro An bi os-i, An dakai bi sukjimnut sye kas subot men yi sor, men yo ben suk yo nyim wa An nde. Sane anato An yo ut bur ré nde tó, An fro os ndo ne su Yesus Kristus nyim wé re, subere ri ma Kristus ma wa kak os ne wa men re.

2 Timotius 1:9 ပူးပေါင်းရင်းမြစ်များ

Matius 1:21

Bere Maria kem su pa yebris, orete nan kendo pa ne gum do Yesus, we Pa ne ma mo bur ré wa ós An bi nje-i. Bere An tepsu suktot wa tot sukibit gato An bi yetuge-i ben ne wé re.”

Lukas 10:21

Sugane Yefun Yesus mit at ndo nde, we Yefun Allah Gen pet mo An, ete Yefun Yesus ki nai Yefun Allah do, ”Ji bi Ai, Nan anato Yekwesu mo gu nim ne si bur ré, Ji ki ndo mo Nan, we Nan gurik sukdu gato Ji ki ne bi sukjimnut-i kadit yepasye gato jam suk mwa, ete Nan kadum sukjimnut ne nai ye gato ben nggwa sato pa wokgan. Ji bi Ai, Nan ben suk tepsu Nan mit anato Ji ki ndo mo Nan ne.” {Yefun Yesus ki suk su An bi Ai, orete An ki nai nje mone do:}

Yohanes 17:24

Ji bi Ai, Nan syo Ji bi pakon nai Ji re. Ji iwa án si Ji kem mo nat gato bere Ji kem mone, subere án me do Ji anato gum kok sye wai o re. Nan yo ut bur ré nde tó, Nan bi sukjimnut sye kas subot Ji, Nan bes Ji gum kok sye wé re.

Yohanes 17:9

Ji ki suk su Nan wa án, yé mwa gato Nan syo nai Ji ne. Ji yo ki suk su Nan wa yetu mo bur ré nde. Wo Ji ki suk su Nan wa yé gato Nan syo nai Ji, we án anato sok mo Nan bi rus-i.

Yohanes 6:37

Yé mwa gato Ji bi Ai syo nai Ji, bere án sino ut mo Ji. Ye to ma ut mo Ji yo, Ji yo syun ge dik yo wé dom nde.

Suk Gato Yerasul Ben Ne 15:18

Yefun Allah ki bi sukdu-i ne kadit nyim tuya re.”

Suk Gato Yerasul Ben Ne 2:47

Án un Yefun Allah. Yé mwa ne sino mo Yerusalem nut mo án do, án sino ben sukndo. Ye mo Yerusalem ne mit iwa án. Kamdik-kamdik Yefun Allah ben ye deyo o ne sor yé bok ne brek kadit os ibit, ete yé bok ne waii sok mo Yesus Kristus bi yetugei tó án, dobe sok gat o re.

Roma 11:14

Ji mit iwa ji ós yewis yi sok mo Yefun Allah bi rus-i, subere kak ji dakai bi yewis-i bi sukjimnut sane sor án nut subot sukndo gato yewis yi ku mone. Ji mit iwa án nut subot sukndo gato yewis yi ku ne sane sor án waii mit wa án sok mo Yefun bi rus-i ne dom.

Roma 11:29

Sane sukndo gato Yefun Allah fro wa An ben ne, An ki kwop mone it. Yefun Allah yo brek kadit suk gato An tom su nje nde.

Roma 16:25

Men bes Yefun Allah gum kok et. Ji ki sukdu subot os ndo gato Yefun Allah fro wa men yetu, ji ki subot Yesus Kristus gato kak os ne, orete nin jammo sukdu ne. Sane Yefun Allah ós nin anato nin onyar kem mo Yefun nggi wai kadit nyim ne o re. Kadit nyim tuya kom more, Yefun yo kadum sukdu ne rer wa ye jam nde, Yefun gurik sukdu subot os ne re,

Roma 3:20

Sane anato kapre men yetu werwa men benbot ye Yahudi bi sukduno-i ne yo, bere men yo ku os ndo mone nde. Yefun Allah ki mo ye gato werwa benbot sukduno ne do, sukduno ne yo kak os wa án sok mo Yefun Allah bi rus-i nde, wo sukduno ne ós wa kadum suk gato Yefun Allah bariwa men yetu sino mo bur ré ben ne sor re.

Roma 9:11

Suga nyim tuya Ribka kem su pa ge we ne nde tó, Yefun Allah fro pa we wok tepsu yeketke mo yewis ye Yahudi ne nyim wé re. Pa we sye si pa we wok yo ben suk gato ndo si suk gato ibit mo nde tó, wo Yefun Allah dakai bes pa we wok nyim wé re, tepsu pe gato Yefun Allah dakai iwa fro ne, we Ribka bi pa yebris ge we ne yo ben suk gato ndo si suk gato ibit mo nde tó.

Roma 9:24

Men ré anato yé gato Yefun Allah fro wa ku suk gato ndo yé ne, men ye Yahudi sor nde, wo yewis yi neya dom re.

1 Korintus 1:18

Ye gato bere ges mo bot gesyos ne nut do, sukdu subot Yefun Yesus mo kwesukwin ne, yé ki daret kaii. Wo men yé gato Yefun nai kadit sukye mo bot ne, subere men kem ndo to kapyo mato kapyo, men jam do, sukdu subot Yefun Yesus mo kwesukwin anato kadum Yefun Allah bi suktinggi ne bor wa men jam re.

Efesus 1:11

Yefun Allah fro Yesus Kristus wa men sane anato Yefun Allah nai sukjimnut ete ben suk mwa ne sino tepsu pe gato An ki kwop mone it. Kadit ketke it, An iwa nai men sok mo An bi rus-i tepsu pe gato An dakai fro ne. Sane An ben suk mwa ne kas subere suk gato An fro ne bor.

Efesus 1:9

Os ndo gato Yefun Allah fro wa men ne, gato nyim tuya yo bor nde, An iwa ki bor wa men jam it anare. Os gato An fro wa men anato bor mo Yesus Kristus it.

Efesus 2:5

Yefun Allah bi sukjimnut sye kas subot men sye teker, sane kapre ben sato men kwop mo sukibit gato men ben ne, Yefun Allah sun men mbau satu, ete men si Kristus kem ndo it. Men yo ben suk yo nyim wa Yefun Allah nde, wo An dakai bi sukjimnut sye kas subot men yi sor anato An nai men wa men si An kem ndo to kapyo mato kapyo.

Efesus 3:11

Su ré Yefun Allah kadum os gato An fro ne tepsu An bi sukjimnut kadit ketke ne it. Sane anato An syo men bi Yekwesu Yesus Kristus ma wa kak os gato ndo ne wa men it.

Filipi 3:14

Sane anato ji wergat ji nggwa nggi gat petok sor, tepsu ji werwa ji kas nggi wai kadit ye yi neya, subere ji kom mo pe gato or nyim kadit ye yi ne, ete ji ku suk gato ndo mone. Suk gato ji iwa ji ku ne anato ji kem gesyos mo gu sisu Yesus Kristus. Yefun Allah fro os wa men subere men kem gesyos mo suk gato Yesus Kristus ma ben mo bur ré re.

1 Tesalonika 4:7

Yefun Allah nai men sok mo An bi rus-i subere yebris si nggon men sem su yu daret nde, wo An nai men subere men ben men bi suk-i ndo sor, sukibit wokgan yo dom nde.

1 Timotius 1:1

Ji gato gum do Paulus anato krom surat ré wa nan. Ji krom sukdu ré wa nan, Timotius. Nan anato tepsu ji bi pa mo Yefun bi de-i, we ji duno nan anato nan onyar kem mo Yesus Kristus. Yefun Allah gato fro os ndo wa men kem ndo to kapyo mato kapyo, An bes ji gum yerasul wa ben Yesus Kristus bi suk-i. Yesus Kristus gato men kwabom kam mó, An bes ji ete syogat ji mu wa ji ben An bi suk-i tepsu yerasul. Men bi Ai, Yefun Allah si men bi Yekwesu Yesus Kristus ete mewa nan. Yefun Allah si Yesus Kristus ete jimnotku nan. Yefun Allah si Yesus Kristus ete uttok nan petok sor.

2 Timotius 1:1

Surat ré, ji krom wa nan, Timotius, ji bi pa gato ji jimnotku ndo nde. Ji gato gum do Paulus anato krom surat ré wa nan. Yefun Allah bes ji gum yerasul wa ji ben Yesus Kristus bi suk-i. Ji mu ki sukdu subot os ndo gato Yefun Allah tom su men yetu subere men kem ndo. Yesus Kristus anato kak os ndo ne wa men kem ndo to kapyo mato kapyo. Men bi Ai, Yefun Allah si men bi Yekwesu Yesus Kristus ete mewa nan. Yefun Allah si Yesus Kristus ete jimnotku nan. Yefun Allah si Yesus Kristus ete uttok nan petok sor.

Titus 1:2

Án jammo Yefun Allah, we án kwabom kam mo Yefun Allah do, bere Yefun nai án gum sok mo Yefun bi rus-i, bere án si Yefun kem ndo to kapyo mato kapyo, tepsu Yefun Allah tom su men sugato An ut bur ré nde tó. Suk gato Yefun Allah tom su men ne, bere An benbot sor, An yo kidar nde.

Ibrani 3:1

Sane ji bi nji, ji bi nyanggon, nin si men sino anato yé gato Yefun Allah nai sok mo An bi rus-i. Sane men nutbot Yefun Yesus sisu ndo o et. Yefun Allah syogat Yesus Kristus gwat Yefun bi sukdu ne ma wa men tepsu Yekwesu gato gum kok wai mo Yefun Allah bi nu. An sa, tepsu yegweswai wa men si Yefun Allah gato men onyar kem mó.

1 Petrus 1:20

Yefun Allah ut bur ré nde tó, An fro Yesus Kristus tepsu suktot nyim wé re. Yefun Allah fro Yesus Kristus kadit ketke ne it, wo su ré, karowa bur ré kru sa, Kristus bor mo bur ré. An ma wa tot sukibit gato men ben ne wé, subere nin dom ku os ndo wa nin sok mo Yefun Allah bi rus-i re.

1 Petrus 2:9

Wo nin sa, Yefun Allah nai nin tepsu An dakai bi rus-i it. Nin anato tepsu yewis gato Yefun Allah bes tepsu yesu mo Yefun Allah bi nu wa nin ben suk wa Yefun gato gum kok wai o re. Nin anato yewis gato Yefun Allah fro tepsu An bi rus-i wa nin ben An bi suk-i sor. Yefun Allah kiwa nin mu kadit pe gato ndendu ma mo An bi pe gato rer ndo yé. Sane nin ki subot suk gato An ben ndo wai ne nai ye yi jam.

Wahyu 13:8

Yetu mwa ne sino gato kem mo bur ré bere bes suge ne gum kok, wo yetu bok gato Yefun Allah krom gum mo Domba Gan gato ye gu kwop wé ne bi Buku Yegesyos suga nyim tuya Yefun ut bur ré nde tó, bere yé bok ne yo bes suge krok ne gum kok nde.

Wahyu 17:8

Suge doketke gato nan me ré, suga nyim sa, mbau, wo ré yo, yo mbau o nde. Bergan suge ne syesyar kadit kwoye sye mo bur desnak ne ma nim mo bur ré o. {Orete bere Yesus Kristus gu suge ne kwop wé,} suge ne bere ibit or re. Suga nyim sa, suge ne mbau, wo ré ne, yo mbau o nde, sarewo bere suge ne mbau satu o re. Sane anato yetu gato gum yo sok mo Yefun Allah bi Buku Yegesyos nde, bere yeket mone. Yefun fro Buku ne su kam gato An yo ut bur ré nde tó. Bere yé mwa gato kem mo bur ré, gato gum yo sok mo Buku ne nde yo, bere yé mwa ne yeket suge ne re.