1 Timotius 6:3 - Abun Scripture

³ Yé gato duno nje su sukduno daret gato siri kadit men bi Yekwesu Yesus Kristus bi sukduno-i gato sangge, yé gato duno nje su sukduno gato siri kadit Yesus Kristus bi sukduno-i gato kadum Yefun bi os-i nai men ne yo,

1 Timotius 6:3 ပူးပေါင်းရင်းမြစ်များ

Matius 22:21

Yé ki do, ”Yé krom Kaisar kaim mone si yé krom Kaisar gum mone.” Sane Yefun Yesus ki nai án do, ”Sane, Kaisar bi suk-i yo, men syo nai Kaisar, wo Yefun Allah bi suk-i yo, men syo nai Yefun sor.”

Matius 28:20

Nin duno nje ne subere yé ne benbot suk mwa ne sino gato Ji syogat nin ben ne. Nin jammo suk gato Ji ki ré et, nin mu duno nje yo, bere Ji sisu nin petok sor kom mo kapyo mato kapyo.”

Roma 16:17

Ji bi nji, ji bi nyanggon, nin mewa nin nggwa kadit ye gato ma wa wat nin ko kadit yu et. Nin mewa nin nggwa kadit ye gato ben nin bi sukjimnut waiyu mo sukduno gato ye ne kibot siri kadit sukduno gato yeguru duno nin suga nyim ne. Nin mu karowa ye ga sane nde.

1 Tesalonika 4:8

Sane ye gato bariwa sukduno ne it yo, án bariwa yetu bi sukduno-i nde, wo án bariwa Yefun Allah bi sukduno-i. Yefun Allah anato bok An Gen mo nin, sane nin bariwa An bi sukduno-i nde.

1 Timotius 1:10

yekra gato ben siri su nggon daret si nggonkra gato ben siri su ye daret e; yebris si yebris gato ben siri su yu e; nggon si nggon gato ben siri su yu e; ye gato but pakwerut ete so mo ye yi e; ye gato kidar suk e; ye gato ki do, án sa, bi sukdu-i sangge, ondewo án syeret os wa nje e; ye gato ben suk siri kadit Yefun Allah bi sukduno gato sangge e ne. Ye krom Yefun Allah bi sukduno ne wa yé mwa gato ben sukibit sane, subere án jammo sukduno ne et.

1 Timotius 1:3

Su kam gato ji mu kadit nan mu mo bur Makedonia, ji wergat nan subere nan kem pe mo kota Efesus. Ji wergat nan kem pe mone subere nan duyawa yé bok yo gato duno nje su sukduno gato siri.

1 Timotius 1:6

Yé bok ne, án misyar sukdu gato ndo ne. Án brek kadit sukdu ne, ete án ki subot sukdu gato yo ós men yetu nde.

2 Timotius 1:13

Sane nan simo sukdu gato sangge, gato ji duno nan su ne sor, nan simo sisu nan mit dik si nan onyar dik et. Nan simo sukdu ne yo, nan onyar kem mo Yefun Yesus, nan bi sukjimnut sye kas subot ye yi petok sor, tepsu Yesus Kristus ben ne.

2 Timotius 4:3

Nan duno nje gat sor, we kapyo tak bere yé bariwa sukduno gato sangge, wo yé iwa yé jam sukduno gato tepsu án mit sor. Bere án sum yeguru bok yo gato duno án su sukduno gato án iwa án syaretwa ne sor re.

Titus 1:1

Ji gato gum do Paulus anato krom surat ré wa nan, Titus, gato ji bi pa. Ji anato Yefun Allah bi pakwerut. Ji anato Yesus Kristus bi yerasul. Yefun Allah bes ji, ete syogat ji mu duno yé gato Yefun Allah fro suga nyim wa An nai sok mo An bi rus-i ne. Ji mu duno án subere án jam sukdu gato sangge, subere án onyar kem mo Yefun Allah, subere án ben Yefun bi suk-i.

Titus 1:9

Sukduno gato sangge gato men duno an su ne, an grem sukduno ne pe mo an mit sor, subere yekwesu ne nggiwa an duno nje su sukduno ne. An jom sukduno gato sangge ne pe, subere an nggiwa an duwer ye gato ki bi sukduno-i siri kadit Yefun Allah bi sukduno-i ne.

Titus 3:8

Sukdu ne sangge sor. Nan kibot sukdu ne gat sor, subere yé gato onyar kem mo Yefun Yesus ne wergat án nggwa wa án ben suk gato ndo su án mit dik án onyar dik sor, subere án ós yé mwa ne sino.