रोमियो 8:28 - बिलासपुरी नौआं नियम

²⁸ अहें जाणाँ ये भई परमेशर तिन्हां सारयां लोकां रे खातर अच्छी चीजां ल्यौआं सै जे तिस्सो प्यार कराँ ये; यनिके तिन्हांरे खातर सै जे तिसरिया मर्जिया रे मुतावक तिस्सो जे तिने चुणीरा।

रोमियो 8:28 ပူးပေါင်းရင်းမြစ်များ

मरकुस 12:30

इस खातर, तू प्रभु अपणे परमेशरा ते अपणे सारे मन, अपणे सारे प्राण, अपणी सारी अक्कल, अपणी सारिया ताकता ते प्रेम रख।’

प्रेरितां 13:48

ये सुणी ने अन्यजातियां खुशी हुये, कने परमेशरा रे वचना री बडयाई करने लगे कने जितने अनन्त जीवना खातर ठहराईरे थे, तिन्हें विश्वास कित्या।

रोमियो 11:29

काँह्भई परमेशर अपणे बरदानां ते कने अपणिया बुलाहटा ते कदीं अपणा मन नीं बदलदा।

रोमियो 8:30

फेरी तिन्हांजो जे तिने पैहले ते तैह कित्या, तिन्हाजो बी तिने चुणया, कने सै जे तिने चुणे, सै तिने धर्मी घोषित कित्ते, कने तिन्हाजो जे तिने धर्मी घोषित कित्या, तिन्हां सौगी तिने अपणी महिमा बी बन्डी।

रोमियो 9:11

जुड़वा बच्चयां रे जमणे ते पैहले कने सै किछ बी भला बुरा करने ते पैहले परमेशरे रिबका जो बोल्या, भई “तेरे बड्डे बेटे छोट्टे री सेवा करनी।” परमेशरे ये दसणे खातर ये बोल्या भई सै अपणा चुनाब खुद कराँ कने इसरी वजह ये नीं थी भई तिन्हां चते किन्हिये किछ कित्या था।

1 कुरिन्थियों 1:2

हऊँ ये चिट्ठी परमेशरा रिया तिसा कलीसिया रे लोकां जो लिख्या राँ सै जे कुरिन्थुस नगरा ची, तिस्सो जे परमेशरे मसीह यीशुये च पवित्र कित्तिरा कने पवित्र हुणे खातर सद्दीरा; कने तिन्हां सारयां विश्वासियां जो बी सै जे हर जगह अहांरे कने तिन्हारे प्रभु यीशु मसीह रे नौआं री प्राथना कराँ ये।

1 कुरिन्थियों 1:24

पर जिस किसी जो परमेशरे अपणे लोक हुणे खातर सद्दीरा, चाये यहूदी या यूनानी, दोन्नां रे खातर येई मसीह परमेशरा रा सामर्थ कने परमेशरा रा ज्ञान आ।

1 कुरिन्थियों 1:9

परमेशर बफादार आ, तिने जे तुहांजो अपणे पुत्र अहांरे प्रभु यीशु मसीह रिया संगतिया च सद्दीरा।

1 कुरिन्थियों 2:9

पर तियां जे पवित्रशास्त्रा च लिखिरा, “सै गल्लां जे किन्हिये नीं देखियां कने किन्हिये नीं सुणियां, कने सै जे अदभुत गल्लां किसी माहणुये नीं समझियां, तिन्हौं परमेशरे अपणे प्यार रखणे औल़यां रे खातर त्यार कित्तिरा।”

2 कुरिन्थियों 5:1

काँह्भई अहें जाणाँ ये भई धरतिया पर अहांरा ये शरीर तम्बुये साई आ तिसच जे अहें रैयां ये, जे ये तम्बू नष्ट हुई जांगा, तां अहांजो परमेशरा रिया तरफा ते स्वर्गा च हमेशा खातर इक बणया-बणाया घर मिलणा सै जे माहणुआं रे हत्था ते बणाया नीं गईरा।

गलातियां 1:15

पर परमेशर तिने जे मेरे जमणे ते पैहले इ मिन्जो चुणया कने तिने अपणे अनुग्रह ने मिन्जो सद्दया।

गलातियां 1:6

हऊँ तुहांरे बारे च हैरान आ! भई तुहें लोक इतणी जल्दी तिस परमेशरा जो छड्डया राँये तिने जे तुहांजो मसीह रे अनुग्रह रे जरिये सद्दया, कने किसी होर सन्देशा जो सै जे खुशखबरी बोल्या जां तिसजो तुहें ग्रहण करया राँये।

गलातियां 5:8

येढ़ि सीख सै जे तुहांजो सच्चाईया ते दूर करी राईं, तुहांरे सद्दणे औल़े परमेशरा रिया तरफा ते नीं आईरी।

इफिसियां 3:11

ये तिस सनातन इच्छा रे मुतावक हुया सै जे तिने अहांरे प्रभु यीशु मसीह च पूरी कित्तिरी।

इफिसियां 4:1

इस खातर हऊँ सै जे प्रभुये री सेवा रे खातर कैदी आ, तुहां लोकां ने विनती कराँ भई तुहौं परमेशरे तियां जे जीणे खातर सद्दीरा तिस तरिके ने जीआ।

फिलिप्पियां 3:14

तां हऊँ ईनाम जितने रे खातर सिधा मकसदा रिया तरफा दौड़ां, सै जे अनन्त जीवना रे खातर यीशु मसीह रे जरिये मिन्जो परमेशरा रा बुलावा।

1 थिस्सलुनीकियां 5:9

काँह्भई परमेशरे अहौं अपणे गुस्से ते सजा देणे रे खातर अहाजों नीं चुणीरा, पर इस खातर चणीरा भई अहें अहांरे प्रभु यीशु मसीह रे जरिये छुटकारा पाओ।

2 तिमुथियुस 1:9

तिने इ अहांरा छुटकारा कित्तिरा कने पवित्र जीवना खातर अहांजो सद्दीरा, ये अहांरे भले कम्मां रिया वजह ने नीं, पर तिसरी अपणी योजना कने अनुग्रह रिया वजह नेआ। ये अनुग्रह परमेशरे यीशु मसीह च अहांजो सृष्टिया ते पैहले दित्या,

2 तिमुथियुस 2:19

फेरी बी परमेशरे सै जे पक्की निऊं बणाईरी, सै मजबूत खढ़ीरी कने तिस पर ये लिखिरा : “प्रभु अपणे लोकां जो जाणाँ,” कने “सै जे कोई बोलां भई सै प्रभुये रा सै बुराईयां ते दूर रौ।”

इब्रानियों 9:15

इस वजह ते मसीह नई वाचा रा बिचौल़िया, ताकि तिन्हांजो जे परमेशरा रे जरिये सद्दया गईरे, सै अनन्त आशीष पाई सक्को तिस राजे परमेशरे वायदा कित्तिरा था। काँह्भई पैहले वाचा रे अधीन कित्ते गईरे पापां ते तिन्हांजो अजाद कराणे रे खातर मसीह फिरौतिया रे रुपा च सै अपणे प्राण देई चुक्कीरा।

याकूब 1:12

परमेशर तिसजो आशीष देआं सै जे मुशिबतां च अटल रैयां काँह्भई परीक्षां च खरा उतरने ते बाद तिस अनन्त जीवना रा मुकट पैहनणा, तिस्सो जे परमेशरे अपणे प्यार करने औल़यां जो देणे रा वायदा कित्तिरा।

याकूब 2:5

मेरे प्यारे साथी विश्वासियो, ध्याना ने सुणा, क्या परमेशरे तिन्हां लोकां जो नीं चुणीरा, सै जे संसारा रिया नजरां च गरीब ये, ताकि सै विश्वासा च अमीर हुई जो कने तिस राज्जा रे बारस बणो, तिसजो जे परमेशरे अपणयां भगतां जो देणे रा वायदा कित्तीरा?

1 पतरस 2:9

पर तुहें चुणीरे लोक ये कने याजक ये सै जे राजे साई परमेशरा री सेवा कराँ ये, पवित्र प्रजा कने परमेशरा रे लोक ये। तिने तुहांजो अन्धकारा चते अपणी अदभुत ज्योतिया च सद्दीरा ताकि तुहें तिसरे अदभुत कम्मां रा प्रचार करी सक्को।

1 पतरस 3:9

बुराईया रे बदले बुराई कने बेईज्जतिया रे बदले बेईज्जति मत करा बल्कि तुहौं आशीष देणी चाहिन्दी; काँह्भई आशीष देणे खातर तुहें परमेशरा रे जरिये चुणे गईरे, ताकि तुहें परमेशरा ते आशीष पाओ।

1 पतरस 5:10

तुहांजो थोड़िया देरा रे कष्ट सैहणे ते बाद सारे अनुग्रह देणे औल़ा परमेशर तिने जे तुहांजो मसीह च अपणी युगानुयुगा री महिमा रे खातर सद्दीरा, खुद इ तुहांजो सिद्ध, मजबूत, बलवन्त कने स्थिर करी देंगा।

1 यूहन्ना 4:10

सच्चा प्यार इसच निआं भई अहें परमेशरा ने प्यार कित्या, बल्कि इसच आ भई तिने अहांने प्यार कित्या कने अहांरे पापां रे प्रायश्चिता खातर अपणे पुत्रा जो भेज्या।

1 यूहन्ना 4:19

अहें इस खातर परमेशरा जो कने इक्की दूये जो प्यार कराँ ये काँह्भई पैहले परमेशरे अहांने प्यार कित्या।

प्रकाशितवाक्य 3:19

हऊँ तिस-तिसने जे प्यार कराँ, तिन्हां सब्बीं जो थिड़कीने सधेराँ; इस खातर ईमानदारिया ने अपणयां पापां ते मन फिरा।