यूहन्ना 19:4 - बिलासपुरी नौआं नियम

⁴ पिलातुस इक बार भीं मैहला ते बाहर आया कने लोकां ने बोल्या, देक्खा, हऊँ तिस्सो तुहां लोकां रे सामणे बाहर ल्याया रां, तिसते जे तुहें ये जाणी लो भई मिन्जो तिसच कोई खोट नीं मिल्या।

यूहन्ना 19:4 ပူးပေါင်းရင်းမြစ်များ

मत्ती 27:19

पिलातुस ताहली जे न्याय रे आसणा पर बैठिरा था तां तिसरिये जनाने तिसले इक संदेशा भेज्या, “तिस सिधे-साधे कने सच्चे माहणुये सौगी किछ बी देखां करदा, काँह्भई मैं तिसरे बारे च इक सपना देख्या तिसरे कारण आज्ज हऊँ बौहत बेचैन रैई।”

मत्ती 27:24

ताहली जे पिलातुसे देख्या भई हुण कोई फैदा निआं कने दंगा भड़कदा इ चली रा था, तां तिने थोड़ा पाणी लेआ कने भीड़ा रे सामणे अपणे हात्थ धोये कने गलाया, “हऊँ इस धर्मी माहणुये रे खून्ना ते निर्दोष आ, तुहें इ जाणा।”

मत्ती 27:4

कने गलाया, “मैं इक बेदाग माहणुये रा खून करने खातर पकड़वाई ने पाप कित्या।” तिन्हे लोकें गलाया, “अहांजो क्या? तूई जाण।”

मत्ती 27:54

फेरी सुबेदार कने होर सिपाही सै जे तिस सौगी यीशुये रा पैहरा देई कराँ थे, हिल्लण कने सै जे किछ तित्थी हुया था तिस्सो देखीने बड़े भरी डरिये कने गलाया, “सच्ची जो ये परमेशरा रा पुत्र था।”

लूका 23:4

फेरी पिलातुस मुखियायाजकां कने लोकां खा मुड़ीने गलाया, “मिन्जो इस माहणुये च कोई बी दोष नीं दिखदा।”

लूका 23:41

मिन्जो कने तिज्जो त अहांरे कित्तिरे जुरमां री सजा मिली राईं, पर इने माहणुये त कोई बी जुरम नीं कित्तिरा।”

लूका 23:47

सुबेदारे, सै जे तिस कम्मां री निगरानी करी रां था, तिने ये सब किछ हुन्दे हुये देख्या, तां तिने परमेशरा री बडयाई करदे हुये गलाया, “सच्चमुच ये माहणु बेकसूर था।”

यूहन्ना 18:33

फेरी पिलातुस राजपाल्ला रे मैहला च वापस चलिग्या कने यीशुये जो मैहला रे अन्दर सद्दीने तिसते पुच्छया, क्या तू यहूदियां रा राजा?

यूहन्ना 18:38

पिलातुसे तिस्सो पुच्छया, सच्च क्या? कने ये बोलीने, पिलातुस बाहर आईने यहूदी अगुवेयां ले गया, कने तिन्हांने बोल्या हऊँ तिसच कोई खोट नीं कड्डी सक्कया।

यूहन्ना 19:6

मुखियायाजकें कने मंदरा रे पैहरेदारें तिस्सो देखदे इ रौल़ा पाया, कने बोल्या, “इस्सो क्रूसा पर चढ़ाओ! इस्सो क्रूसा पर चढ़ाओ!” पिलातुसे तिन्हांने बोल्या, इस्सो तुहें इ लईजो कने क्रूसा पर चढ़ाओ, हऊँ इसच कोई खोट नीं पान्दा।

2 कुरिन्थियों 5:21

परमेशरे मसीह जो अहांरे पापां रे खातर पाप बल़ि बणाया तिने जे कदीं पाप नीं कित्या, ताकि अहें तिसरे जरिये परमेशरा रे सामणे धर्मी समझे जायें।

इब्रानियों 7:26

इस खातर येढ़ा महायाजक अहां रियां जरूरतां जो पूरा कराँ, सै जे पवित्र, निष्कपट, कने निर्मल आ, कने पापियां ते लग आ, कने तिस्सो जे परमेशर स्वर्गा च लेईग्या।

1 पतरस 1:19

पर निर्दोष कने कलंक रहित मेमने यनि मसीह रे कीमती खून्ना ते हुई।

1 पतरस 2:22

पवित्रशास्त्र बोलां, मसीहे कदी कोई पाप नीं कित्या, कने तिने कदीं कोई झूठ नीं बोल्या।

1 पतरस 3:18

हऊँ इस खातर सै बोलां भई, मसीहे बी दुख सैहण कित्या कने अहांरे पापां रे खातर इक इ बार मरया। सै धर्मी माहणु था सै जे पापी लोकां रे खातर मरया, ताकि सै तुहांजो परमेशरा रे नजदीक ल्याई सक्को। तिसरी शारीरिक मौत त हुईगी, पर सै परमेशरा रिया आत्मा रे जरिये जिऊंदा कित्या गया।

1 यूहन्ना 3:5

कने तुहें त जाणाँ ये, भई मसीह लोकां रे पापां जो हरने रे खातर इ प्रगट हुया, कने तिसरे स्वभावा च पाप निआं।